សម្ភារៈសិក្សា សំលៀកបំពាក់សិស្ស រួមទាំងថវិកាមួយចំនួន ត្រូវបានផ្តល់ជារង្វាន់លើកទឹកចិត្តដល់សិស្សទទួលបានចំណាត់ថ្នាក់ល្អប្រចាំឆ្នាំ នាឱកាសវិស្សមកាលរបស់សាលាបឋមសិក្សាបន្ទាយឈើជ្រៃ ស្ថិតក្នុងសង្កាត់ទឹកវិល ក្រុងសៀមរាប ខេត្តសៀមរាប កាលពីថ្ងៃទី២៦ខែសីហាឆ្នាំ២០១៨។
ថវិកាសរុប ៤.៤៦៤.០០០,០០រៀលនេះ បានមកពីការរៃអង្គាសពីសប្បុរសជនជិតឆ្ងាយ របស់គណៈទ្រទ្រង់សាលាបឋមសិក្សាបន្ទាយឈើជ្រៃ ត្រូវបានយកមកបែងចែកទិញកង់ចំនួន៧គ្រឿង ក្នុងនោះបានបែងចែកទិញសំលៀកបំពាក់សិស្ស និងសម្ភារៈសិក្សា រួមទាំងថវិកាចាប់ពី៣ម៉ឺនរៀល ដល់៧ម៉ឺនរៀលផ្តល់ជារង្វាន់លើកទឹកចិត្តដល់សិស្សពីលេខ១ដល់លេខ៥ ព្រមទាំង លើកទឹកចិត្តលោកគ្រូអ្នកគ្រូចំនួន១៣នាក់ ក្នុងម្នាក់ៗ៣ម៉ឺនរៀលផងដែរ។
ព្រះគ្រូវិមលសំវរ នឿម វុទ្ឋី ប្រធានកិត្តិយសគណៈទ្រទ្រង់សាលាបឋមសិក្សាបន្ទាយឈើជ្រៃ និងជាព្រះគ្រូចៅអធិការវត្តបារាយមហានទីរតនារាម ហៅវត្តស្វាយរមៀត មានថេរដិកាថា៖សាលានេះ មានសិស្សសរុបចំនួន៣៧៤នាក់ លោកគ្រូអ្នកគ្រូចំនួន១៣នាក់ នេះជាលើកទីពីរហើយ ដែលគណៈទ្រទ្រង់សាលា ខិតខំប្រឹងប្រែង ដើររៃអង្គាស និងបិណ្ឌបាត្របច្ច័យពីពុទ្ឋបរិស័ទជិតឆ្ងាយ ដើម្បីកៀងគរប្រមូលថវិកាមកផ្តល់ឱ្យសិស្សដែលរៀនពូកែ ក្នុងបំណងតែម្យ៉ាងគត់គឺចង់ឱ្យក្មួយៗ ខិតខំសិក្សារៀនសូត្រ ស្តាប់ការអប់រំទូន្មាន អប់រំពីឱពុកម្តាយ ខិតខំត្រង់ត្រាប់ស្តាប់ការពន្យល់របស់លោកគ្រូអ្នកគ្រូ ដើម្បីក្លាយខ្លួនជាកូនល្អ សិស្សល្អ មិត្តភក្រ័ល្អ និងប្រជាពលរដ្ឋល្អ ប្រកបដោយចំណេះដឹង និងមានសមត្ថភាព ពិតប្រាកដ សម្រាប់ជាឈ្នាន់ ស្វែងរកការងារល្អ ជាប្រយោជន៍ជួយដល់សេដ្ឋកិច្ចក្រុមគ្រួសារ និងអភិវឌ្ឍសង្គមជាតិ។
ព័ត៌មានជាតិ ថ្មីៗ
ព្រះតេជគុណ ថេរដិកាទៀតថា៖ថ្វីត្បិតព្រះសង្ឃពុំមានធនធានថវិកាផ្ទាល់ខ្លួន រស់ដោយពឹងអាស្រ័យលើប្រជាពុទ្ឋបរិស័ទក្តី តែដោយសារចង់ឱ្យកូនចៅ ជំនាន់ក្រោយទទួលបានចេះដឹង យល់និងស្គាល់ពី បុណ្យបាប គុណទោស ទើបព្រះអង្គរួមជាមួយគណៈទ្រទ្រង់សាលា និងអាជ្ញាធរមូលដ្ឋាន បានបង្កើតកម្មវិធីរៃអង្គាស ដើម្បីរឹតចំណងសាមគ្គីភាព ផ្សារភ្ជាប់ រវាងព្រះសង្ឃ និងកុមារា កុមារី ក្នុងន័យជួយលើកកម្ពស់វិស័យអប់រំ និងលើកទឹកចិត្តដល់សិស្សានុសិស្សឱ្យយកចិត្តទុកដាក់សិក្សារៀនសូត្រ ក៍ដូចជាដើម្បីបណ្តុះគុណធម៌ អប់រំសីលធម៌ ចរិយាធម៌ដល់សិស្សានុសិស្ស ជារឿយៗ។
លោក ឡឹក សុជិត មន្ត្រីការិយាល័យអប់រំក្រុងសៀមរាប មានប្រសាសន៍ថា៖ ដើម្បីឱ្យការសិក្សារបស់កុមារក្នុងសាលានេះ បានលទ្ឋផលល្អគឺពឹងលើ មាតាបិតា អាណាព្យាបាល និងលោកគ្រូអ្នកគ្រូ គួរយកចិត្តទុកដាក់តាមដានការសិក្សារបស់កូនៗ និងលោកគ្រូអ្នកគ្រូ ខិតខំបង្ហាត់បង្រៀនឱ្យអស់ពីសមត្ថភាពដែលខ្លួនមាន រួមផ្សំនឹង អត្តចរឹក អាកប្បកិយាល្អ ដើម្បីកុមារយកលំអានតាម ព្រោះថា សាលារៀនជាថ្នាលបណ្តុះធនធានមនុស្ស។
លោក ក៏បានសំណូមពរ ដល់សិស្សានុសិស្សទាំងអស់ ត្រូវគោរពបទបញ្ជាផ្ទៃក្នុងសាលា ឲ្យបានល្អ និងខិតខំកសាងខ្លួន យ៉ាងហោចណាស់រៀនឱ្យចប់ថ្នាក់ទី៩ មួយវិញទៀតដើម្បីក្លាយជាសិស្សល្អ កូនល្អ មិត្តល្អ និងពលរដ្ឋល្អ ត្រូវគេចឲ្យឆ្ងាយពីគ្រឿងញៀននិងអំពើអបាយមុខផ្សេងៗ។
នាយកសាលា និងគណៈទ្រទ្រង់សាលាសង្ឃឹមថា សន្តានចិត្តដ៍ជ្រះថ្លានេះ នឹងក្លាយទៅជាវប្បធម៌ចែករំលែ កនិងជួយបណ្តុះគំនិតក្មេងៗជំនាន់ក្រោយឱ្យបន្តជួយចែករំលែកគ្នានៅពេលពួកគេធំឡើង ខណៈដែលគណៈទ្រទ្រង់សន្យាថានឹងរៀបចំពិធីនេះនៅឆ្នាំក្រោយទៀត ទៅតាមលទ្ឋភាព ធ្វើយ៉ាងណាឱ្យតែក្មួយៗខំរៀនឱ្យពូកែ ពូកែកាន់តែច្រើន រង្វាន់លើកទឹកចិត្តនឹងផ្តល់គ្រប់សិស្សពូកែ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
