ដើម្បីបញ្ជ្រាបការយល់ដឹកដល់ប្អូនៗ ជាសិស្សានុសិស្ស ពិសេសអ្នកចោលសំរាមគ្មានសណ្ដាប់ធ្នាប់នៅក្នុងក្រុងសៀមរាប មន្ទីរសាធារណការ រួមនិងអ្នកជំនាញការស្ម័គ្រចិត្ដជាន់ខ្ពស់ជប៉ុន នៃអង្គការ JICA បានចូលរួមក្នុងរើសសំរាម ក្នុងកម្មវិធីផ្សព្វផ្សាយ និងបញ្ជ្រាបការយល់ដឹងអំពី “ការលើកកម្ពស់សកម្មភាពសម្អាតបរិស្ថាន និងថែទាំប្រព័ន្ធលូទឹកក្នុងទីក្រុង”។
ថ្ងៃទី២៧ ខែសីហា ឆ្នាំ២០១៨ លោក គឹម ប៉ុណ្ណា ប្រធានមន្ទីរសាធារណការ និងដឹកជញ្ជូនខេត្ដសៀមរាប បានដឹកនាំមន្ដ្រីក្រោមឱវាទមន្ទីរទាំងអស់ រួមជាមួយ លោក មីយ៉ាមុតុ អាគីអូ (MIYAMOTO AKIO) អ្នកជំនាញការស្ម័គ្រចិត្ដជាន់ខ្ពស់ជប៉ុន នៃអង្គការ JICA ក្រោមកិច្ចសហការជាមួយ ការិយាល័យលូទឹក និងស្ថានីយ៍ចម្រោះទឹកកខ្វក់ នៃមន្ទីរសាធារណការ និងដឹកជញ្ជូនខេត្ដសៀមរាប បានចូលរួមក្នុងរើសសំរាម នៅតាមដងផ្លូវ និងមាត់ស្ទឹងសៀមរាប ចាប់ពីសាលាបឋមសិក្សាជាស៊ីម ដល់ស្ពានវត្តដំណាក់ ដើម្បីផ្សព្វផ្សាយ និងបញ្ជ្រាបលើការថែរក្សាបរិស្ថាន និងថែទាំប្រព័ន្ធលូទឹកក្នុងទីក្រុងសៀមរាប។
ឆ្លៀតក្នុងឱកាសនោះផងដែរ លោក គឹម ប៉ុណ្ណា ក៏បានថ្លែងអំណរគុណដល់ការិយាល័យ លូទឹក និងស្ថានីយ៍ចម្រោះទឹកកខ្វក់ និងលោក មីយ៉ាមុតុ អាគីអូ (MIYAMOTO AKIO) អ្នកជំនាញការស្ម័គ្រចិត្ដជាន់ខ្ពស់ជប៉ុន នៃអង្គការ JICA ដែលបានផ្ដួចផ្ដើមបង្កើតកម្មវិធីនេះឡើង ក្នុងគោលបំណង អប់រំដល់សិស្សានុសិស្ស កុមារា កុមារី ពិសេសអ្នកចោលសំរាមនៅក្នុងក្រុង តាមសងខាងមាត់ស្ទឹងទាំងអស់ មានការភ្ញាក់រលឹក ចូលរួមក្នុងការថែរក្សា និងស្រលាញ់បរិស្ថានរបស់យើងឡើងវិញ ទន្ទឹមនឹងនោះក៏សូមអរគុណដល់លោកគ្រូ អ្នកគ្រូ ក្មួយៗជាសិស្សានុសិស្សទាំងអស់ ដែលបានចំណាយពេលវេលាផ្ទាល់ខ្លួនមកចូលរួមក្នុងសកម្មសង្គមក្នុងឱកាសនេះផងដែរ ។
ព័ត៌មានជាតិ ថ្មីៗ
“ បរិស្ថានដើម្បីអ្នកទាំងអស់គ្នា អ្នកទាំងអស់គ្នាដើម្បីបរិស្ថាន! “
“គ្មានសំរាមបរិស្ថានស្អាត់ ទាក់ទាញភ្ញៀវទេសចរណ៍! “
“ រើសសំរាមចាប់ផ្ដើមពីខ្ញុំ ចូលរួមទាំងអស់គ្នា” ។
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
