មានប្រសាសន៍ក្នុងឱកាសបើកសន្និបាតបូកសរុបការងារបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ នៅខេត្តសៀមរាប កាលពីព្រឹកថ្ងៃទី១៨ ខែសីហា ឆ្នាំ២០១៨នេះ លោក ង៉ាន់ ភិរុណ អភិបាលរងខេត្តសៀមរាប បានសម្ដែងនូវការកោតសរសើរចំពោះគណបក្សនយោបាយ អ្នកសនង្កេតការណ៍ជាតិ អន្តរជាតិ និង អ្នកពាក់ព័ន្ធនានា ព្រមទាំងប្រជាពលរដ្ឋទាំងអស់ ដែលបានចូលរួមអនុវត្ត និង គោរពច្បាប់បោះឆ្នោត បទបញ្ជា នីតិវិធី និង ក្រមសីលធម៌សម្រាប់ការបោះឆ្នោត ប្រកបដោយស្មារតីទទួលខុសត្រូវ និង ភាពថ្លៃថ្នូរ ធ្វើឲ្យការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨នេះ ទទួលបានលទ្ធផលល្អប្រសើរ ទាំងទិដ្ឋភាពច្បាប់ និង ទាំងទិដ្ឋភាពបច្ចេកទេស ក្រោមបរិយាកាសសន្តិភាព មានស្ថិរភាព សន្តិសុខ សណ្ដាប់ធ្នាប់ និង មានសុវត្ថិភាពយ៉ាងល្អប្រសើរ ដោយគ្មានការគម្រាមកំហែង និង គ្មានអំពើហិង្សានោះឡើយ ។
លោក ង៉ាន់ ភិរុណ មានប្រសាសន៍ទៀតថា សមិទ្ធផលដែលសម្រេចបានទាំងនេះ អាស្រ័យដោយយើងទាំងអស់គ្នា ទាំងអាជ្ញាធរគ្រប់លំដាប់ថ្នាក់ គណៈកម្មការរៀបចំការបោះឆ្នោតគ្រប់លំដាប់ថ្នាក់ គណបក្សនយោបាយ និង អ្នកពាក់ព័ន្ធទាំងអស់ បានខិតខំធ្វើការកែលម្អដំណើរការបោះឆ្នោត ទាំងក្របខណ្ឌច្បាប់ និង ក្របខណ្ឌបច្ចេកទេស ពីការបោះឆ្នោតមួយ ទៅការបោះឆ្នោតមួយទៀត ដោយឈរលើមូលដ្ឋាននៃការប្រមែប្រមូលអនុសាសន៍ និង ធាតុចូលពីគ្រប់មជ្ឈដ្ឋាន និង ធ្វើការកែទម្រង់ស្ថាប័នរៀបចំការបោះឆ្នោត និង ច្បាប់បោះឆ្នោត ការរៀបចំបញ្ជីបោះឆ្នោត ។
លោក នឹម វ៉ាន់សំ ប្រធានគណ:កម្មការរៀបចំកាតបោះឆ្នោតខេត្តសៀមរាប បានមានប្រសាសន៍ថា ជាទូទៅការបោះឆ្នោតនៅថ្ងៃអាទិត្យ ទី២៩ ខែកក្កដា ឆ្នាំ២០១៨នេះ ត្រូវបានមតិជាតិ និងអន្តរជាតិ ដែលបានចូលរួមសង្កេតមើលការបោះឆ្នោត ភាគច្រើនវាយតម្លៃថា បានប្រព្រឹត្តទៅក្នុងបរិយាកាសសន្តិភាព ស្ងប់ស្ងាត់ល្អ គ្មានការគម្រាមកំហែង គ្មានអំពើហិង្សា ប្រកបដោយភាពរលូន តម្លាភាព សេរី ត្រឹមត្រូវ យុត្តិធម៌ ស្របតាមលទ្ធិប្រជាធិបតេយ្យ ហើយការបោះឆ្នោតត្រូវបានរៀបចំកាន់តែល្អប្រសើរឡើង ទាំងទិដ្ឋភាពច្បាប់ និង ទាំងទិដ្ឋភាពបច្ចេកទេស បើប្រៀបធៀបទៅនឹងការបោះឆ្នោតឆ្នាំ២០១៣ ។
ក្នុងឱកាសនោះដែរ លោក នឹម វ៉ាន់សំ បានសម្ដែងនូវការកោតសរសើរចំពោះគណបក្សនយោបាយទាំង១៨ ដែលបានចុះបញ្ជីបេក្ខជនឈរឈ្មោះបោះឆ្នោតនៅខេត្តសៀមរាប ដែលអនុវត្តបានយ៉ាងពេញលេញនូវសិទ្ធិ និងករណីកិច្ចរបស់ខ្លួន ដូចមានចែងក្នុងច្បាប់ បទបញ្ជា និង នីតិវិធី និង ក្រមសីលធម៌សម្រាប់គណបក្សនយោបាយ បេក្ខជន និង ភ្នាក់ងារគណបក្សនយោបាយ ប្រកបដោយភាពថ្លៃថ្នូរ និង ការទទួលខុសត្រូវខ្ពស់ ដែលកាយវិការដ៏ប្រសើរនេះ សរបញ្ជាក់ឲ្យឃើញច្បាស់នូវភាពចាស់ទុំខាងនយោបាយ និង រួមចំណែកក្នុងការពង្រឹងលទ្ធិប្រជាធិបតេយ្យ សេរី ពហុបក្សនៅកម្ពុជា ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
