ព័ត៌មានជាតិ ថ្មីៗ
អាជ្ញាធរមីនកម្ពុជា សហការជាមួយអង្គការអន្តរជាតិ សម្រាប់ការដោះមីនមនុស្សធម៌ក្រុងហ្សឺណែវ ( GICHD) បានរៀបចំសិក្ខាសាលាមួយ នៅសណ្ឋាគារអប្សរាអង្គរខេត្តសៀមរាប កាលពីព្រឹកថ្ងៃទី២៨ ខែសីហា ឆ្នាំ២០១៨នេះ ស្តីពីការគ្រប់គ្រងព័ត៌មានវិស័យមីនជាមួយភាគីពាក់ព័ន្ធ ក្នុងរយៈពេលបីថ្ងៃចាប់ពីថ្ងៃទី២៨ ដល់ថ្ងៃទី៣០ ខែសីហា ឆ្នាំ២០១៨ ជូនដល់ថ្នាក់ដឹកនាំ មន្ត្រី បុគ្គលិកអាជ្ញាធរមីន ប្រតិបត្តិករបោសសំអាតមីន ជាតិនិងអន្តរជាតិ ដៃគូពាក់ព័ន្ធ ក្រុមការងារផែនការសកម្មភាពមីនខេត្ត ដែលហៅកាត់ថា ម៉ាពូ មកពីខេត្តឧត្តរមានជ័យ បាត់ដំបង សៀមរាប បន្ទាយមានជ័យ និងខេត្តបៃលិន សរុបចំនួន៧០រូប ។
គោលបំណងនៃសិក្ខាសាលនេះ គឺពិភាក្សាពាក់ព័ន្ធទៅនឹងការគ្រប់គ្រងព័ត៌មានលើវិស័យមីន ជាមួយភាគីពាក់ព័ន្ធ ក្រោមបទបង្ហាញប្រព័ន្ធគ្រប់គ្រងទិន្នន័យ សកម្មភាពមុខងារ និងរូបរាងថ្មីនៃប្រព័ន្ធ អីមស្មាខរ ការពិភាក្សាអំពីផែនការផ្លាស់ប្តូរពីប្រព័ន្ធមុខងារតួនាទីចាស់ ដើម្បីផ្លាស់ទៅប្រើប្រាស់ប្រព័ន្ធមុខងាររូបរាងថ្មី ពិសេសគឺពិភាក្សាប្រមូលធាតុចូល ដើម្បីអភិវឌ្ឍន៍ទៅលើមុខងារបន្ថែមលើអីមស្មាខរ និង អាចឆ្លើយតបទៅនឹងតម្រូវការរបស់អ្នកប្រើប្រាស់នាពេលអនាគត ព្រមទាំងស្វែងរកយន្តការរួមគ្នា រៀបចំប្រព័ន្ធផែនទីសម្រាប់អនុវត្តបន្តលើផ្នែកគ្រប់គ្រងព័ត៌មានវិស័យមីន។
ឯកឧត្តម ព្រំ សុភមង្គល អគ្គលេខាធិការអាជ្ញាធរមីន មានប្រសាសន៍ថា នេះជាឱកាសល្អដែលប្រមូលផ្តុំទៅដោយអ្នកជំនាញផ្នែកគ្រប់គ្រងព័ត៌មានវិស័យមីន ជាប្រតិបត្តិករជាតិនិងអន្តរជាតិ ជាពិសេសក្រុមការងារអន្តរជាតិសម្រាប់ការដោះមីនមនុស្សធម៌ក្រុងហ្សឺណែវ ដូច្នេះរំពឹងទុកថា សមាជិក សមាជិកា នៃអង្គសិក្ខាសាលាទាំងមូល នឹងប្រើប្រាស់ពេលវេលាបីថ្ងៃនេះ ពិគ្រោះពិភាក្សាផ្លាស់ប្តូរយោបល់ ប្រកបដោយអត្ថន័យ ខ្លឹមសារដើម្បីជាផលប្រយោជន៍សម្រាប់ប្រើប្រាស់ប្រព័ន្ធគ្រប់គ្រងនិងផ្តល់ទិន្នន័យលើវិស័យមីននិងរៀបចំបង្កើនសកម្មភាពការងារប្រកបដោយប្រសិទ្ធភាព ហើយតាមរយៈសិក្ខាសាលានេះដែរសិក្ខាកាមនឹងទទួលបានចំណេះដឹងបន្ថែម និងយល់កាន់តែច្បាស់អំពីសារៈសំខាន់នៃគ្រប់គ្រងព័ត៌មានវិស័យមីន ព្រមទាំងបង្កើនកិច្ចសហការបន្ថែមទៀតរវាងអាជ្ញាធរមីនជាមួយអង្គការដៃគូរពាក់ព័ន្ធ សម្រាប់រួមគ្នារៀបចំផែនការអនុវត្តបន្ត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
