នាយទាហាននៃបញ្ជាការដ្ឋានយោធភូមិភាគទី៤ ចំនួន ២៨០ រូប ដែលមានស្នាដៃឆ្នើម ក្នុងការបំពេញភារកិច្ចជួនជាតិមាតុភូមិ ត្រូវបានទទួលការបំពាក់ឋានន្តរស័ក្តចាប់ពីថ្នាក់អនុសេនីយ៍ ថ្នាក់វរៈសេនីយ៍ ដល់ថ្នាក់ឧត្តមសេនីយ៍ត្រី ក្នុងនោះនាយទាហានចំនួន១១រូប ត្រូវបានប្រកាសតែងតាំងមុខងារ ចូលកាន់តំណែងផងដែរ ។ ពិធីប្រកាសតែងតាំង ផ្លាស់ប្តូរមុខងារ និង បំពាក់ឋានន្តរសក្តិនេះ បានធ្វើឡើងនៅបញ្ជាការដ្ឋានយោធភូមិភាគទី៤ នាព្រឹកថ្ងៃទី២៧ ខែសីហា ឆ្នាំ២០១៨ ។
ឧត្តមសេនីយ៍ទោ ពៅ ហេង មេបញ្ជាការរង និងជា នាយសេនាធិការយោធភូមិភាគទី៤ មានប្រសាសន៍ថា ៖ ការតំឡើងឋានន្តរសក្តិជូនដល់នាយទាហាន ប្រកាសមុខងារចូលកាន់តំណែង និង ផ្ទេរភារកិច្ច គឺត្រូវបានធ្វើឡើងតាមការតែងតាំងរបស់ក្រសួងការពារជាតិ ។
ឯកឧត្តម គូសបញ្ចាក់នៅក្នុងពិធីនោះថា ៖ កងយោធពលខេមរភូមិន្ទ គឺជាកម្លាំងស្នូលតែមួយគត់របស់ប្រទេសជាតិ ដែលស្មោះស័្មគ្រ ប្តេជ្ញាបំរើរាជរដ្ឋាភិបាលស្របច្បាប់ ដែលប្រសូត្រចេញពីឆន្ទៈរបស់រាស្រ្តតាមរយៈនៃការបោះឆ្នោតដ៏ត្រឹមត្រូវនិងយុត្តិធម៌ ។ កងទ័ពគឺជាកូនចៅរបស់ប្រជាជន ដូចនេះកងទ័ពត្រូវហ៊ានលះបង់អ្វីៗគ្រប់យ៉ាងដើម្បីសេចក្តីសុខសាន្តជូនប្រជាជន ។
ឯកឧត្តមសង្កត់ធ្ងន់ថា ភ្ជាប់ជាមួយភារកិច្ចការពារបូរណភាពដែនដីនៃមាតុភូមិ បណ្តាអង្គភាពដែលឈរជើងការពារខ្សែបន្ទាត់ព្រំដែន ត្រូវបន្តអនុវត្តឲ្យបានល្អប្រសើរបំផុត ផែនការយុទ្ធសាស្រ្តយូរអង្វែងរបស់រាជរដ្ឋាភិបាលកម្ពុជា លើទស្សនវិស័យនៃការកសាងព្រំដែនសន្តិភាព កិច្ចសហប្រតិបត្តិការជាមួយបណ្តាប្រទេសជិតខាង និង ការអភិវឌ្ឍន៍តំបន់ព្រំដែនទាំងនោះ ដោយឈរលើគោលនយោបាយ ផ្តល់ផលប្រយោជន៍ឲ្យគ្នាទៅវិញទៅមក ៕
អត្ថបទ និង រូបថត ៖ លោក ងិន គឹមឡេង
