ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានប្រកាសជាសាធារណថា សម័យប្រលងឆ្នាំ២០១៨នេះ នឹងផ្តល់ម៉ូតូថ្មីម្នាក់មួយគ្រឿង ជូនដល់បេក្ខជនទាំងអស់ ដែលប្រឡងជាប់សញ្ញាបត្រមធ្យមសិក្សាទុតិយភូមិ និទ្ទេស Aនៅក្នុងពិធីសម្ពោធ អគារសិក្សាថ្មី របស់សាលាវ៉េសហ្គេត ព្រឹកថ្ងៃទី២៤ខែសីហា ឆ្នាំ២០១៨នេះ។
ឯកឧត្តមបណ្ឌិត ឃឹម ប៊ុនសុង បានមានប្រសាសន៍ថា នៅនីតិកាលទី៥នៃរដ្ឋសភា រាជរដ្ឋាភិបាលកម្ពុជា ដែលដឹកនាំដោយសម្តេចអគ្គសេនាបតីតេជោ ហ៊ុន សែន ជានាយករដ្ឋមន្ត្រី បានយកចិត្តទុកដាក់យ៉ាងខ្លាំង ក្នុងការអភិវឌ្ឍលើគ្រប់វិស័យ ជាពិសេស វិស័យអប់រំ និង វិស័យសុខាភិបាល។
ឯកឧត្តមបណ្ឌិត បន្តថា តាមរយៈការកែទម្រង់ប្រព័ន្ធអប់រំ ដោយផ្តោតលើគុណភាពសិក្សារបស់សិស្សានុសិស្សនោះ ពីមួយឆ្នាំទៅមួយឆ្នាំ អត្រាចំនួនអ្នកប្រលងសញ្ញាបត្រទុតិយភូមិ គឺទទួលបាននិទេ្ទសA កើនឡើងជាលំដាប់។ ដូច្នេះសម្រាប់ឆ្នាំ២០១៨នេះ ឯកឧត្តមអភិបាលខេត្តបានរំពឹងថា ចំនួនអ្នកប្រលងសញ្ញាបត្រទុតិយភូមិនេះ នឹងមានចំនួនកើនឡើង ក្នុងនោះចំនួនអ្នកជាប់និទ្ទេសAក៏នឹងកើនឡើងផងដែរ។
ព័ត៌មានជាតិ ថ្មីៗ
ឯកឧត្តមបណ្ឌិត បានបញ្ជាក់ថា ជាការលើកទឹកចិត្ត ដល់បេក្ខជន ដែលខិតខំប្រែងរៀនសូត្រ រហូតទទួលបាននិទ្ទេសA សម្តេចពិជ័យសេនាទៀ បាញ់ និងឯកឧត្តមផ្ទាល់ នឹងផ្តល់ជូននូវម៉ូតូថ្មីម្នាក់មួយគ្រឿង ដូចបណ្តាឆ្នាំមុនៗដែរ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៨ កាលពីថ្ងៃទី២០និង២១ខែសីហាកន្លងទៅនេះ សម្រាប់ខេត្តសៀមរាប មានបេក្ខជនមានសិទ្ធប្រឡងប្រមាណជាង៧៨០០នាក់ ក្នុងនោះបេក្ខជនបានអវត្តមានមានប្រមាណជា៤០នាក់ ៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
