មន្រ្តីជាន់ខ្ពស់ក្រសួងទេសចរណ៍បង្ហាញថា ប្រទេសកម្ពុជារំពឹងថានឹងទទួលបានភ្ញៀវទេសចរជនជាតិចិន ចំនួន២លាននាក់នៅឆ្នំា២០២០ ក្នុងនោះមគ្គុទ្ទេសក៍ទេសចរណ៍កម្ពុជានិយាយភាសាចិន គឺជាចំណែកមួយដ៍សំខាន់ និងមិនអាចខ្វះបាន។នៅព្រឹកថ្ងៃទី២៤ ខែសីហាឆ្នាំ២០១៨ នៅក្នុងពិធីបិទវគ្គបណ្តុះបណ្តាល គ្រូបង្គោលមគ្គុទ្ទេសក៍ទេសចរណ៍កម្ពុជាសម្រាប់ទេសចរចិន ឆ្នាំ២០១៨ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានមានប្រសាសន៍ថា បច្ចុប្បន្ននេះទីផ្សារទេសចរចិនមានកំណើនយ៉ាងខ្លាំងនៅលើពិភពលោក ហើយនៅឆ្នំា២០២០អ្នកទេសចរចិន នឹងចេញដើរកម្សាន្តនៅលើពិភពលោក ប្រមាណ២០០លាននាក់ឬច្រើនជាងនេះ។ ចំពោះការចំណាយរបស់អ្នកទេសចរចិនទាំងនោះមានប្រមាណ ៤២០ប៊ីលានដុល្លាអាមេរិក និងនៅឆ្នំា២០៣០អ្នកទេសចរចិន នឹងចេញដើរកម្សាន្តនៅលើពិភពលោកប្រមាណ ៣០០លាននាក់ទៅ៥០០លាននាក់ ហើយការចំណាយនឹងកើនដល់ប្រមាណ៨៥០ប៊ីលានដុល្លាអាមេរិក។ ដូច្នេះកម្ពុជា ត្រូវតែទាញយកអ្នកទេសចរចិន និងចំណូលពីអ្នកទេសចរចិនឱ្យបានច្រើន ព្រោះថា កម្ពុជាមានសក្តានុពលទេសចរណ៍ស្រាប់ ទាំងបែបប្រវត្តិសាស្រ្ត ធម្មជាតិ និងបេតិកភណ្ឌ។
ឯកឧត្តមបន្តថា ដើម្បីបង្កើនចំនួនមគ្គុទ្ទេសក៍ទេសចរណ៍កម្ពុជា និយាយភាសាចិន បន្ថែមប្រកបដោយគុណភាពក្រសួងទេសចរណ៍ បានសហការជាមួយវិទ្យាស្ថានភាសាចិនប៉េកាំងអន្តរជាតិ(Beijing International Chinese College) និងមានការគាំទ្រពីស្ថានទូតចិនប្រចាំកម្ពុជា រួមនិងក្រសួងពាណិជ្ជកម្មចិន ដោយធ្វើការវគ្គបណ្តុះបណ្តាលគ្រូបង្គោលមគ្គុទ្ទេសក៍ទេសចរណ៍កម្ពុជា និយាយភាសាចិនសម្រាប់ឆ្នាំ២០១៨ ដែលបានបិទបញ្ជាប់នៅថ្ងៃនេះ។
ហើយគ្រូបង្គោលទាំងអស់នេះ នឹងធ្វើទៅការបណ្តុះបណ្តាលមគ្គុទ្ទេសក៍ទេសចរណ៍កម្ពុជា និយាយភាសាចិន នៅតាមបណ្តាខេត្តនានា
លោក លូ យូណាន (Liu Yunan) ជំនួយការនាយកវិទ្យាស្ថានភាសាចិនប៉េកាំងអន្តរជាតិ មានប្រសាសន៍ថា វគ្គបណ្តុះបណ្តាល គ្រូបង្គោលមគ្គុទ្ទេសក៍ទេសចរណ៍កម្ពុជា សម្រាប់ទេសចរណ៍ចិនឆ្នាំ២០១៨ បានប្រព្រឹត្តទៅចាប់ពី ថ្ងៃទី ៨ ខែសីហាឆ្នាំ២០១៨ រហូតដល់ថ្ងៃទី ២៤ ខែសីហា ឆ្នាំ២០១៨ ដែលមានគ្រូបង្គោលចំនួន ៧៨នាក់ ហើយវគ្គបណ្តុះបណ្តានេះ នឹងផ្តល់ជាចំណេះដឹង បទពិសោធន៍បន្ថែមពីអន្តរជាតិ និងការចែករំលែកបទពិសោធន៍ការងារជាក់ស្តែងស្តីពីមគ្គុទ្ទេសក៍ទេសចរណ៍ រវាងកម្ពុជា និងចិន ពិសេសការពង្រឹងសមត្ថភាពពាក់ព័ន្ធនឹងមគ្គុទ្ទេសក៍ទេសចរណ៍របស់មន្ត្រី និងបុគ្គលិកកម្ពុជាសម្រាប់ទេសចរចិន ដើម្បីឆ្លើយតបទៅនឹងយុទ្ធសាស្ត្រទាក់ទាញទេសចរចិន សៀវភៅ ស China Ready សម្រាប់ ទេសចរណ៍កម្ពុជា។ ការបណ្តុះបណ្តាលនេះ បានសិក្សាពីភាសា និងវប្បធម៌ចិន គោលការណ៍សេវាកម្មមគ្គុទ្ទេសក៍ទេសចរណ៍ ទំនួលខុសត្រូវរបស់មគ្គុទ្ទេសក៏ទេសចរណ៍ ក្រមសីលធម៌ និងវិន័យមគ្គុទ្ទេសក៏ ការចែករំលែកបទពិសោធន៍ និង បានធ្វើតេស្តសមត្ថភាពនៅចុងវគ្គសិក្សា ដើម្បីជ្រើសរើសបេក្ខជនទៅសិក្សា និងផ្លាស់ប្តូរបទពិសោធន៍បន្តនៅទីក្រុងបេកាំង។
លោក Liu Yunan បានបញ្ជាក់ថា ដោយសារទំនាក់ទំនងល្អរវាងកម្ពុជា និងចិន ខាងភាគីចិន និងជួយជម្រុញអ្នកទេសចររបស់ខ្លួនឱ្យមកទស្សនាកម្ពុជាឱ្យបានច្រើន។
សូមបញ្ជាក់ថានៅឆ្នាំ២០១៧ កន្លងមក ក្នុងចំណោមទេសចរអន្តរជាតិមកកម្ពុជាចំនួន ៥,៦លាននាក់ មានភ្ញៀវទេសចរចិនចំនួនជាង ១,២លាន នាក់ បានកើនឡើង ៤៦% ឈរនៅលំដាប់ទី១ ហើយក្នុងរយៈពេល ៦ខែដំបូងនៃឆ្នាំ២០១៨នេះ កម្ពុជាទទួលទេសចរចិនចំនួនជាង ៩៣ម៉ឺននាក់ កើន ៧៦% និងជាចំណែកទីផ្សារប្រមាណ ៣១% នៃទេសចរអន្តរជាតិរបស់កម្ពុជា។ ហើយបច្ចុប្បន្ននេះមគ្គុទ្ទេសក៍ទេសចរណ៍ភាសាចិនមានចំនួន១០៤៦នាក់ ក្នុងនោះនៅខេត្តសៀមរាបមាន៨៥១នាក់ ហើយចំនួនមគ្គុទ្ទេសក៍ទេសចរណ៍ភាសាចិននេះ នៅតែមិនទាន់អាចឆ្លើតបបានទៅនឹងអ្នកទេសចរចិននៅឡើយទេ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
