អ្នកវិនិយោគិនមកពីជាង១០ប្រទេស នៃតំបន់អឺរ៉ុប អាមេរិក និងអាស៊ី ធ្វើទស្សនកិច្ចសិក្សាស្វែងយល់ពី សក្តានុពលសេដ្ឋកិច្ច និងពាណិជ្ជកម្មរបស់កម្ពុជា ដើម្បីសំលឹងរកដៃគូ និងគោលដៅមុខជំនួញ របស់ពួកគេ។នៅរសៀលថ្ងៃទី២៣ខែសីហាឆ្នាំ២០១៨ ក្នុងឱកាស ទស្សនកិច្ចដំណើរកំសាន្ត សិក្សាស្វែងយល់ពីប្រាង្គប្រាសាទ តំបន់ទេសចរណ៍ វប្បធម៌ សាសនា ប្រពៃណីទំនៀមទំលាប់ និងជីវភាពរស់នៅរបស់ប្រជាពលរដ្ឋ ក្នុងខេត្តសៀមរាប ក៏ដូចជាប្រទេសកម្ពុជា អ្នកវិនិយោគិនបរទេសទាំងជាង១០ប្រទេសនេះ មានការចាប់អារម្មណ៍លើ វិស័យសំណង់ វិស័យពាណិជ្ជកម្ម ជាពិសេសវិស័យទេសចរណ៍នៅខេត្តសៀមរាបផ្ទាល់តែម្ដង។
លោកជំទាវឧកញ៉ា លឹម ឈីវហូ អគ្គនាយិកាក្រុមហ៊ុនអេដ វូដ អ៊ិមផត អ៊ិចផត និងជាអគ្គនាយិកាតំបន់សេដ្ឋកិច្ចពិសេសភ្នំពេញ បានមានប្រសាសន៍ថា ការអភិវឌ្ឍរីកចម្រើនលើគ្រប់វិស័យ នៅកម្ពុជារហូតមកដល់បច្ចុប្បន្ននេះ ជាការខិតខំប្រឹងប្រែង របស់រាជរដ្ឋាភិបាល ដឹកនាំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេសកត្តានៃសន្តិភាព និងស្ថេរភាពនយោបាយ ដែលញ៉ាំងឲ្យអ្នកជំនួញធំៗ ចាប់អារម្មណ៍ និងមកបណ្តាក់ទុនវិនិយោគរកស៊ីនៅម្ពុជា។
លោកជំទាវបន្តថា វិនិយោគិនបរទេស ដែលមានវត្តមាននៅខេត្តសៀមរាបនាពេលនេះ សុទ្ធសឹងតែមានមុខជំនួញធំៗ ហើយបន្ទាប់ពីពួកគាត់បានសិក្សាពីប្រទេសកម្ពុជាតាមប្រព័ន្ធអ៊ិនធើណិត ពួកគាត់មានការចាប់អារម្មណ៍ ចង់មកឃើញផ្ទាល់ភ្នែក ដើម្បីស្វែងឱកាសក្នុងវិនិយោគ ក៏ដូចជាដៃគូក្នុងប្រទេសកម្ពុជាផងដែរ។
ព័ត៌មានជាតិ ថ្មីៗ
កម្ពុជាក៏ត្រូវការវិនិយោគិនជាតិ និងអន្តរជាតិ មកវិនិយោគលើផលិតផលថ្មីៗ នៅតំបន់គោលដៅទាក់ទាញទេសចរណ៍នានា តំបន់គោលដៅសេដ្ឋកិច្ចសំខាន់ៗ ដើម្បីឱ្យចរន្តពាណិជ្ជកម្មរបស់ពួគគេទទួលបាននូវផ្លែផ្កាជាវិជ្ជមាន។
សូមរំលឹកថា នៅក្នុងសន្និបាត បូកសរុបលទ្ធផលការងារឆ្នាំ២០១៧ និងលើកទិសដៅការងារឆ្នាំ២០១៨ របស់សភា ពាណិជ្ជកម្មកម្ពុជា កាលពីថ្ងៃទី៣០ ខែមេសា ឆ្នាំ២០១៨ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបង្ហាញគោលនយោបាយអភិវឌ្ឍន៍ ឧស្សាហកម្ម ឆ្នាំ២០១៥-២០២៥ និងគម្រោងវិនិយោគ ដែលមានលក្ខណៈសម្បត្តិគ្រប់គ្រាន់ (QIPs) ដែលជារបបលើកទឹកចិត្ត ផ្តល់តាមរយៈក្រុមប្រឹក្សាអភិវឌ្ឍន៍កម្ពុជា ដើម្បីជួយវិនិយោគិន ឲ្យទទួលបាន អត្ថប្រយោជន៍ផ្សេងៗ ដូចជាការលើកលែងពន្ធ លើប្រាក់ចំណេញ នៃប្រតិបត្តិការអាជីវកម្ម រហូតដល់ ៩ឆ្នាំ និងពន្ធលើការនាំចូលវត្ថុធាតុដើម ប្រភេទគ្រឿងម៉ាស៊ីន ២០% ជាដើម។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
