ថ្ងៃទី២៨ ខែសីហា ឆ្នាំ២០១៨ លោក ស៊ិក ប៊ុនស៊ិន ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកស្វាយលើ បានចុះជួបសំណេះសំណាលសួរសុខទុក្ខ និងបាននាំយកអំណោយមនុស្សធម៌របស់អនុសាខាជួយដល់គ្រួសារចាស់ជរាចំនួន ០២គ្រួសារ រស់នៅភូមិអភិវឌ្ឍន៍ ឃុំកន្ទួត ស្រុកស្វាយលើ ខេត្តសៀមរាប។
ក្នុងឱកាសនោះដែរ លោកក៏បានពាំនាំមតិផ្តាំផ្ញើសាកសួរសួរសុខទុក្ខ ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តមបណ្ឌិត ឃឹម ប៊ុនសុង ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈពណ៌សំសម្បុរ ជំនឿសាសនា ឬនិន្នាការនយោបាយណាមួយឡើយ។ ដែលនេះជាការបង្ហាញនូវការយកចិត្តចំពោះប្រជាពលរដ្ឋគ្រប់រូបពីថ្នាក់ដឹកនាំពិសេសកាកបាទក្រហមកម្ពុជា ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នា-មិនទុកនរណាម្នាក់ចោលឡើយ” ។
ការចែកអំណោយមនុស្សធម៌របស់អនុសាខាកាកបាទក្រហមកម្ពុជា ស្រុកស្វាយលើនាពេលនេះ មិនមែនចែកជូនតែម្ដងនោះទេ ប្រសិនបើគ្រួសាររបស់ពួកគាត់ នៅតែមានការខ្វះខាតខ្លាំង គណៈកម្មាធិការអនុសាខាកាកបាទក្រហមកម្ពុជា ស្រុកស្វាយលើ នឹងឧបត្ថម្ភដល់ពួកគាត់ ក៏ដូចជាគ្រួសារដទៃទៀត ដែលខ្វះខាតខ្លាំង និងងាយរងគ្រោះ ដូចជា ស្ត្រីមេម៉ាយ ស្ត្រីផ្ទុកមេរោគអេដស៍ ចាស់ជរា ជនរងគ្រោះដោយធម្មជាតិ និងប្រជាពលរដ្ឋទីទ័លក្រ កំពុងជួបការលំបាក ដោយមិនសំដៅទៅលើប្រជាពលរដ្ឋទូទៅឡើយ។
ដោយមានការយកចិត្តទុកដាក់ដល់ប្រជាពលរដ្ឋកម្ពុជា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តែងតែបានជួយរំលែកទុក្ខលំបាក របស់បងប្អូន ដោយមិនទុកឲ្យប្រជាពលរដ្ឋណាម្នាក់ ត្រូវស្លាប់ដោយសារគ្មានស្បៀងអាហារនោះទេ។
អំណោយមនុស្សធម៌ដែលបានផ្តល់ជូនចំពោះគ្រួសារចាស់ជរាក្នុង១គ្រួសារទទួលបាន៖ -អង្ករ២០គីឡូក្រាម -ត្រីខ៥កំប៉ុង -មី២០កញ្ចប់ -សាប៊ូ១ថង់ -ស្ករស១គីឡូក្រាម -អំបិល១ថង់ -ប៊ីចេង១ថង់- និងថវិកា១សែនរៀលផងដែរ។
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
