លោកអាគីរ៉ា ប្រធានអង្គការសារមន្ទីរមីនកម្ពុជា រួមនិងបុគ្គលិក ២នាក់ទៀត ត្រូវបាននគរបាលព្រហ្មទណ្ឌកម្រិតធ្ងន់ ខេត្តសៀមរាប បញ្ជូនខ្លួនទៅសាលាដំបូងខេត្តសៀមរាប នារសៀលថ្ងៃទី៣០ខែសីហា ឆ្នាំ២០១៨ម្សិលមិញនេះ។
សារមន្ទីរមីនកម្ពុជា គឺជាអង្គការ ក្រៅរដ្ឋាភិបាល ហើយមានទីតាំងស្ថិតនៅភូមិខ្នារ ឃុំខ្នារសណ្តាយ ស្រុកបន្ទាយស្រី ខេត្តសៀមរាប តាមរយៈមន្ត្រីជំនាញ នៃអង្គការស៊ីម៉ាក់ បានឲ្យដឹងថា នៅក្នុងទីតាំងសារមន្ទីរមីននេះ កម្លាំងស៊ីម៉ាក់បាន ដកហូតបាន៖
– គ្រាប់បែកដៃចំនួន៩គ្រាប់
– មីន៧២A ចំនួន១៥គ្រាប់
– គ្រាប់កាំភ្លើងខ្លីចំនួន៣២៥គ្រាប់
– ដងគ្រាប់បេចំនួន ១ដើម
– ម្ជុលភ្លើងមីន៦៩ ចំនួន៥ដើម
– គ្រាប់កាំភ្លើងដៃចំនួន១០គីឡូក្រាម
– កាំភ្លើងស្វ័យប្រវត្តិឆេះខូចចំនួន៦ដើម
– សំបកគ្រាប់មីនចំនួន ២កេះឈើ
– ខ្សែឆេះផ្ទុះចំនួន១ខ្សែ
– កេះឈើដាក់គ្រាប់បែកចំនួន១ កេះ
– ដែកដាក់ខ្សែយឺតចំនួន១
– ស្មាច់ដាក់គីបចរន្តចំនួន១គ្រាប់
– កាំភ្លើងខ្លីK59 ចំនួន៤២ដើម
– គ្រាប់គីបចរន្តចំនួន២៩០ដើម
– និងគីបធម្មតា៣០០ដើម។
លោកវរសេនីយ៍ទោ ណុល រ៉ុង នាយរងការិយាល័យព្រហ្មទណ្ឌកម្រិតធ្ងន់បានថ្លែងឲ្យដឹង នៅរសៀលថ្ងៃទី៣០ខែសីហានេះថា កំលាំងសមត្ថកិច្ច បានធ្វើការឃាត់ខ្លួនមនុស្សបីនាក់ កាលពីថ្ងៃទី២៩ខែសីហា ឆ្នាំ២០១៨ រួមមានឈ្មោះ៖
– ទីមួយ ឈ្មោះ អាគីរ៉ា ភេទប្រុសអាយុ៤៧ឆ្នាំ តួនាទីជាប្រធានអង្គការសារមន្ទីរមីនកម្ពុជា មានទីលំនៅភូមិខ្នារ ឃុំខ្នារសណ្តាយស្រុកបន្ទាយស្រី ខេត្តសៀមរាប
– ទី២ ឈ្មោះ អឿនយ៉ុន ភេទប្រុស អាយុ៥៤ឆ្នាំតួនាទីជាអនុប្រធានអង្គការ មានទីលំនៅភូមិខ្នារ ឃុំខ្នារសណ្តាយស្រុកបន្ទាយស្រី ខេត្តសៀមរាប
– ទី៣ ឈ្មោះ ហ៊ាញ សុគន្ធា ភេទប្រុស អាយុ៣៩ឆ្នាំ តួនាទីជាប្រធានប្រតិបត្តិ រស់នៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប ។
លោកបន្តថា ការឃាត់ខ្លួននេះធ្វើឡើងបន្ទាប់ពីមានហេតុការណ៍ឆាបឆេះនៅក្នុងសារមន្ទីរមីនរបស់លោកអាគីរ៉ា នៅក្នុងស្រុកបន្ទាយស្រី កាលពីថ្ងៃទី២៧ ខែសីហាឆ្នាំ២០១៨ កន្លងទៅ។ ក្រោយពេលប្រមូលគ្រឿងផ្ទុះទាំងអស់ មន្ត្រីជំនាញស៊ីម៉ាក់ បានយកអាវុធជាតិផ្ទុះទាំងនោះ ទៅទុកកន្លែងមានសុវត្ថិភាព និងរងចាំធ្វើការកម្ទេចចោល។
លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានឲ្យដឹងថា ក្មេងៗនៅក្នុងអង្គការ មានចំនួន១៧នាក់ ស្រី៧នាក់ ត្រូវបានមន្ទីសង្គមកិច្ចខេត្តសៀមរាប យកទៅចិញ្ចឹមបីបាច់ថែរក្សាបន្ត នៅកន្លែងមានសុវត្ថិភាព។
សូមបញ្ជាក់ថា លោក អាគីរ៉ា គឺជាអតីតបុគ្គលឆ្នើមមួយរូបក្នុងចំណោមបុគ្គលឆ្នើមនៅលើពិភពលោកនៅក្នុងកម្មវិធីទូរទស្សន៍អន្តរជាតិមួយ ដែលគេហៅថា CNN Hero កាលពីឆ្នាំ២០១០។
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
