ក្នុងដំណើរទស្សនកិច្ចផ្លូវការនៅខេត្តសៀមរាប រដ្ឋមន្ត្រីការបរទេសឥណ្ឌា បានធ្វើជាសាក្សីក្នុងពិធីចុះហត្ថលេខា ជួយជួសជុលប្រាសាទបុរាណខ្មែរ និងអនុស្សារណៈយោគយល់គ្នារវាងក្រសួងការបរទេសកម្ពុជា និងឥណ្ឌា។
នៅរសៀលថ្ងៃទី៣០ខែសីហាឆ្នាំ២០១៨ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានជួប ទទួលសម្តែងការគួរសម ស្វាគមន៍ លោកជំទាវ ស៊ុសម៉ា ស្វារ៉ាច រដ្ឋមន្ត្រីការបរទេស នៃសាធារណរដ្ឋឥណ្ឌា និងលោកជំទាវម៉ានី កាជេន ឯកអគ្គរដ្ឋទូតឥណ្ឌាប្រចាំកម្ពុជា និងលាងសាយភោជន៍ រួមគ្នានៅសណ្ឋាគារសូហ្វីតែល ខេត្តសៀមរាប។
បើតាមសេចក្តីប្រកាសព័ត៌មានរបស់នាយកដ្ឋានព័ត៌មាន នៃក្រសួងការបរទេស និងសហប្រតិបត្តិការអន្តរជាតិ បានបង្ហាញថា៖ ដំណើរទស្សនកិច្ចនៅកម្ពុជា របស់លោកជំទាវស៊ុសម៉ា ស្វារ៉ាច ពីថ្ងៃទី២៨ដល់ថ្ងៃទី៣០ខែសីហាឆ្នាំ២០១៨ ជាដំណើទស្សនកិច្ចផ្លូវការ តបតាមការអញ្ជើញរបស់ ឯកឧត្តម ប្រាក់ សុខុន ទេសរដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ក្នុងគោលបំណងលើកកម្ពស់ទំនាក់ទំនងជាមិត្តភាព និងពង្រឹងពង្រីកកិច្ចសហប្រតិបត្តិការរវាងប្រទេសទាំងពីរបន្ថែមទៀត។
ក្នុងសេចក្តីប្រកាសព័ត៌មានដដែលបង្ហាញទៀតថា៖រដ្ឋមន្ត្រីការបរទេសទាំងពីបានធ្វើជាសាក្សីក្នុងពិធីចុះហត្ថលេខាលើឯកសារចំនួនពីរ៖
– ទី១៖កិច្ចព្រមព្រៀងស្តីពីការអភិរក្សនិងជួសជុលប្រាសាទព្រះវិហារ
– ទី២៖ការចុះអនុស្សារណៈយោគយល់គ្នា រវាងវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិកម្ពុជា និងវិទ្យាស្ថានកិច្ចការបរទេស នៃក្រសួងការបរទេសឥណ្ឌានៅក្នុងទឹកដីអង្គរខេត្តសៀមរាប។
ក្នុងជំនួបនោះ ឯកឧត្តម ឃឹម ប៊ុនសុង បានមានប្រសាសន៍ ថ្លែងអំណរគុណចំពោះរដ្ឋាភិបាល និង ប្រជាជននៃសាធារណរដ្ឋឥណ្ឌា ដែលតែងតែចូលរួមផ្តល់ជំនួយ ក្នុងការស្តារ និង អភិវឌ្ឍន៍មាតុភូមិកម្ពុជា ឱ្យមានការ រីកចម្រើនល់គ្រប់វិស័យ និង បានគាំទ្រនយោបាយ ការទូត ចំពោះឯករាជ្យ សន្តិភាព អធិបតេយ្យភាពជាតិ និង ការ បង្រួបបង្រួមជាតិនៅកម្ពុជា លើគ្រប់កាលៈទេសៈ។ បន្ថែមពីនេះ រដ្ឋាភិបាលឥណ្ឌា ក៏បានជួយឧបត្ថម្ភលើដំណើរការ នៃសាលាក្តីខ្មែរក្រហម និងជួយគាំទ្រ ជ្រោមជ្រែង ក្នុងការងារជួសជុលប្រាង្គប្រាសាទនៅខេត្តសៀមរាបផងដែរ។
(តាមរយៈអ្នកបកប្រែ) លោកជំទាវ ស៊ុសម៉ា ស្វារ៉ាច មានប្រសាសន៍ថា ការបោះឆ្នោតនៅកម្ពុជា កាលពីពេលថ្មីៗនេះ ពិតជាបានដំណើរការទៅដោយរលូន ព្រោះយើងបានតាមដានការបោះឆ្នោតនេះ ដោយយកចិត្តទុកដាក់ តាមរយៈអ្នកសង្កេតការណ៍ ដែលបានចាត់បញ្ជូនមកកម្ពុជា ជាលទ្ឋផលប្រជាពលរដ្ឋកម្ពុជា ទៅចូលរួមបោះឆ្នោតមានចំនួនជាង៨៣%។
លោកជំទាវ រដ្ឋមន្ត្រី បានសម្ដែង ការអបអរសាទរ ដល់សម្តេចតេជោនាយករដ្ឋមន្ត្រី ដែលបានបង្កើតឧត្តមក្រុមប្រឹក្សាជាតិ ដោយមានការចូលរួម ពីគ្រប់គណបក្សនយោបាយទាំងអស់ បង្ហាញឱ្យឃើញថា កម្ពុជាពិតជាមានលទ្ឋិប្រជាធិបតេយ្យពិតប្រាកដ និង បង្ហាញពីលទ្ឋផលផ្លែផ្កា នៃគោលដៅអភិវឌ្ឍន៍សហសវត្ស ដែលប្រជាជនកម្ពុជាបានបោះឆ្នោតគាំទ្រ និងជ្រើសរើសយកសន្តិភាព និងការអភិវឌ្ឍន៍។
អត្ថបទ និង រូបថត ៖ លោក យូ វង្ស និង លោក គឿន វេត
កែសម្រួលអត្ថបទ ៖ លោក សេង ផល្លី
