ពិព័រណ៌ទំនិញចម្រុះរបស់ប្រទេសថៃ មានការគាំទ្រដោយ ក្រសួងពាណិជ្ជកម្មថៃ តាមរយៈអគ្គនាយកដ្ឋានជំរុញពាណិជ្ជកម្មអន្ដរជាតិ បានសម្ពោធ និងមានក្រុមហ៊ុនថៃចូលរួមសរុបទាំងអស់មាន ៦៨ក្រុមហ៊ុន។
ពិព័រណ៏ពាណិជ្ជកម្មថៃ២០១៨ នេះមានរយៈពេល ៤ថ្ងៃ ចាប់ពីថ្ងៃទី៣០ ខែសីហា ដល់ថ្ងៃទី២ ខែកញ្ញា ឆ្នាំ២០១៨ នៅបរិវេណផ្សារ ផាមខន់ធឺន័រ ផ្លូវ៦០ម៉ែត្រ ខេត្តសៀមរាប។
មានប្រសាសន៍ ក្នុងពិធីសម្ពោធ នៅល្ងាចពីថ្ងៃទី៣០ ខែសីហានេះ លោក ពិន ប្រាកដ អភិបាលរងខេត្ត បានលើកឡើងថា៖ ការបើកសម្ភោធពិព័រណ៏ថៃនេះ គឺ ជាព្រឹត្តិការណ៏មួយដែលបង្ហាញពីការចូលរួមសាមគ្គី ចំណងមេត្រីភាព និងកិច្ចសហប្រតិបត្តិការល្អ ក្នុងនាមជាបងប្អូនរួមក្នុងតំបន់អាស៊ានតែមួយ និងរួមភពផែនដីជាមួយគ្នាផងដែរ។
លោក បានបន្តទៀតថា៖ ជាក់ស្តែងនៅឆ្នាំ២០១៧កន្លងមកនេះ ចំពោះភ្ញៀវទេសចរណ៏ជាតិ និងអន្តរជាតិដែលបានចូលមកទស្សនាក្នុងខេត្តសៀមរាប មានចំនួន ៥.៥៤៣.៤៣៤ (ប្រាំលានហាសិបបួនម៉ឺនបីពាន់បួនរយសាមសិបបួន) នាក់ មានការកើនឡើង ៩.៩៣% បើប្រៀបធៀបទៅនឹងរយ:ពេលដូចគ្នាក្នុងឆ្នាំ២០១៧។ តាមរយ:កំណើននៃភ្ញៀវទេសចរណ៏ទាំងនេះ យើងបានបង្កើតការងារជូនប្រជាពលរដ្ឋក្នុងខេត្ត បានជាង ២០ម៉ឺននាក់ ដោយក្នងនោះបានផ្តល់ការងារផ្ទាល់ចំនួន ៥ម៉ឺននាក់ នឹងដោយប្រយោលប្រមាណជាង ១០ម៉ឺននាក់ នាពេលបច្ចុប្បន្ន។
លោក បានបញ្ជាក់ថា៖ ដោយមើលឃើញពីកំណើនជីវភាព និងតម្រូវការជាក់ស្ដែង ប្រទេសថៃ ក្នុងនាមជាប្រទេសជិតខាង និងជាប្រជាជាតិក្នុងតំបន់អាស៊ានតែមួយ តែងតែធ្វើការផ្លាស់ប្តូរទំនិញប្រកបដោយគុណភាព ហើយវាបាននឹងកំពុងជម្រុញជញ្ជីងពាណិជ្ជកម្មរវាងគ្នា និងគ្នា ឲ្យកាន់តែមានភាពរីកចំរើនថែមទៀតពីមួយឆ្នាំទៅមួយឆ្នាំ។
លោក ជីរ៉ាវុឍសុវណ្ណអាត អគ្គទីប្រឹក្សាពាណិជ្ជកម្មប្រចាំស្ថានអគ្គរាជទូតថៃប្រចាំកម្ពុជា បានឱ្យដឹងថា ពិព័រណ៌នេះមានបំណងដើម្បីឲ្យប្រជាជនកម្ពុជា ទទួលបានទំនិញដែលមានគុណភាពល្អនៅក្នុងតម្លៃសមរម្យ ដែលនាំចូលពីប្រទេសថៃ ពិព័រណ៌នេះដែរ ក៏ជាឱកាសសម្រាប់អាជីវករថៃ និងខ្មែរ បានជួបជជែក និងចាប់ដៃពាណិជ្ជកម្មជាមួយគ្នាផងដែរ។
អត្ថបទ និង រូបថត ៖ លោក ស៊ាន សុផាត និង លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
