កាលពីថ្ងៃព្រហស្បតិ៍ម្សិលមិញនេះ ប្រទេសចិនបានរិះគន់កិច្ចប្រជុំរបស់ប្រធានាធិបតីអាមេរិក លោក ដូណាល់ ត្រាំ ជាមួយការលើកឡើងថា « ជនជាតិចិនរងគ្រោះ ពីការធ្វើទុក្ខបុកម្នេញខាងសាសនា » ដោយទទូចដល់ភាគីអាមេរិកឱ្យបញ្ឈប់កុំប្រើបញ្ហាសាសនា ដើម្បីជ្រៀតជ្រែកក្នុងកិច្ចការផ្ទៃក្នុងរបស់ខ្លួន ។
អ្នកនាំពាក្យក្រសួងការបរទេស លោក លូ កាង បាននិយាយនៅក្នុងសន្និសីទកាសែតមួយ នៅពេល គេស្នើឱ្យធ្វើអត្ថាធិប្បាយស្តីពីកិច្ចប្រជុំ នៅឯសេតវិមានកាលពីថ្ងៃពុធនោះថា អាមេរិចបានជ្រៀតជ្រែកចូលក្នុងកិច្ចការផ្ទៃក្នុងរបស់ប្រទេសចិន។
លោក លូ បាននិយាយថា ចិនមានការមិនសប្បាយចិត្តទេ ព្រមទាំងប្រឆាំងជំទាស់យ៉ាងខ្លាំងក្លាចំពោះទង្វើទាំងនេះ ។ លោកបាននិយាយថា ពាក្យសម្ដីដែលលើកឡើងថា ការធ្វើទុក្ខបុកម្នេញខាងសាសនា មិនមាននៅក្នុងប្រទេសចិនទេ ហើយពេលរដ្ឋចិនទទួលបានសេរីភាព នៃជំនឿសាសនាស្របទៅតាមច្បាប់ ។
លោក លូ បានសង្កត់ធ្ងន់ថា ចិនទាមទារដល់ សហរដ្ឋអាមេរិច បញ្ចេញនទស្សនៈឲ្យបានត្រឹមត្រូវ ចំពោះនយោបាយ សាសនារបស់ចិន ព្រមទាំងសិទ្ធសេរីភាពខាងជំនឿសាសនានៅក្នុងប្រទេសចិន ហើយឈប់ប្រើប្រាស់បញ្ហា សាសនា ដើម្បីចូលជ្រៀតជ្រែកកិច្ចការផ្ទៃក្នុង របស់បណ្តាប្រទេសដទៃទៀតផងដែរ ៕
( ប្រភព ស៊ីនហួ បកប្រែដោយលោក ប៉ិន មឿន )
