អ្នកនាំពាក្យមន្ទីរបញ្ចកោណលោក Jonathan Hoffman បាននិយាយកាលពីថ្ងៃព្រហស្បតិ៍ម្សិលមិញនេះថា យន្តហោះគ្មានមនុស្សបើករបស់អ៊ីរ៉ង់បានស្ថិតនៅក្នុង «សញ្ញានៃការគំរាមកំហែង» ដល់នាវាចម្បាំងអាមេរិកនៅច្រក សមុទ្រ Hormuz មុនពេលត្រូវបានបំផ្លាញដោយកងកម្លាំងអាមេរិកក្នុងសកម្មភាពការពារខ្លួន។
កាលពីខែមិថុនាកន្លងទៅ កងកម្លាំងឆ្មាំបដិវត្តអ៊ីស្លាម (IRGC) បានប្រកាសថា ពួកគេបានបាញ់ទម្លាក់យន្តហោះស៊ើបការអាមេរិកមួយគ្រឿងទៅលើដែនទឹកនៃខេត្ត Hormozgan របស់អ៊ីរ៉ង់។ ក្រុងតេអេរ៉ង់បានអះអាងថា យានអវកាសស៊ើបការណ៍អាមេរិក RQ-4 Global Hawk បានរំលោភលើដែនអាកាសរបស់ខ្លួនខណៈទីក្រុងវ៉ាស៊ីនតោនអះអាងថា ឧបករណ៍នេះកំពុងប្រតិបត្តិការលើដែនទឹកអន្តរជាតិ។
លោក Hoffman បាននិយាយនៅក្នុងសេចក្តីថ្លែងការណ៍តាមអ៊ីម៉ែលមួយថា នៅម៉ោងប្រហែល ១០ព្រឹកម៉ោងក្នុងស្រុក នាវា USS Boxer កំពុងស្ថិតនៅក្នុងដែនទឹកអន្តរជាតិ ដែលរៀបចំចរាចដឹកជញ្ជូនតាមផ្លូវទឹកនៅច្រកសមុទ្រ Hormuz។ ប្រព័ន្ធអាកាសយានិកគ្មានមនុស្សបើក(UAS) បានហោះទៅដល់ជិត នាវាBoxer ហើយបានស្ថិតក្នុងសញ្ញានៃការគំរាមកំហែងមួយ។ នាវានេះបានចាត់វិធានការការពារប្រឆាំងនឹងយន្តហោះគ្មានមនុស្សបើកនេះ ដើម្បីធានាសុវត្ថិភាពនៃកប៉ាល់ និងនាវិករបស់ខ្លួន។
នៅពេលមុននេះ ប្រធានាធិបតីអាមេរិកលោក ដូណាល់ ត្រាំបាននិយាយថា នាវា USS Boxer បានបំផ្លាញយន្តហោះគ្មានមនុស្សបើករបស់អ៊ីរ៉ង់ ដែលបានចូលមកក្បែរនាវាប្រហែលជិតមួយគីឡូម៉ែត ខណៈវាកំពុងឆ្លងកាត់ច្រកសមុទ្រ Hormuz។
នៅក្នុងពិធីធ្វើបទបង្ហាញមួយ លោក ត្រាំ បាននិយាយថា នេះជាឧបទ្ទវហេតុមួយនៅក្នុងច្រកសមុទ្រ Hormuz ដែលវាបានពាក់ព័ន្ធនឹងនាវាពិឃាតអាមេរិក USS Boxer ។ សហរដ្ឋអាមេរិក សូមរក្សាសិទ្ធិក្នុងការការពារបុគ្គលិក និងផលប្រយោជន៍របស់អាមេរិច ហើយអំពាវនាវដល់ប្រទេសទាំងអស់ថ្កោលទោស ចំពោះការប៉ុនប៉ងរបស់អ៊ីរ៉ង់ក្នុងការរំខានដល់សេរីភាពនៃការធ្វើនាវាចរណ៍ និងពាណិជ្ជកម្មសកល៕
