ក្នុងរយៈពេលប្រមាណជាង២ទសវត្សចុងក្រោយនេះ ធនធានជលផលមានការថយចុះយ៉ាងខ្លាំង ដោយសារតែការ ធ្វើនេសាទហួសប្រមាណ។ ក្នុងនោះប្រជាពលរដ្ឋប្រមាណជាង២លាននាក់រស់នៅជុំវិញបឹងទន្លេសាប ភាគច្រើនពឹងផ្អែកទាំងស្រុងលើការធ្វើនេសាទ។
នេះបើតាមរបាយការណ៍របស់ អង្គការសម្ព័ន្ធភាព ដើម្បីអភិរក្សធនធានជលផល(FACT) បានបង្ហាញ ថ្ងៃទី២២ ខែកក្កដានេះ នៅក្នុងកិច្ចប្រជុំប្រចាំឆមាសទី១ ឆ្នាំ២០១៩ របស់បណ្តាញកម្ពុជា ស្តីពី ការពង្រឹងនូវកិច្ចសហប្រតិបត្តិការ នៅក្នុងការគ្រប់គ្រងរួមគ្នានូវធនធានជលផលប្រកបដោយនិរន្តរភាព ក្នុងខេត្តសៀមរាប។
ក្រោមអធិបតីភាព ឯកឧត្តម អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល និង អ្នកចូលរួមចំនួន១០៩ នាក់ លោក ឱម សាវ៉ាត នាយកប្រតិបត្តិនៃអង្គការ FACTបានលើកឡើងក្នុងអង្គប្រជុំថា កិច្ចប្រជុំផ្តោតសំខាន់ទៅលើ កិច្ចសហការរវាងសម្ព័ន្ធអង្គការ ស្តីពីជលផលជាមួយរដ្ឋបាលជលផលត្រូវបានពង្រឹង ការទទួលបានលទ្ធផលការងាររួមគ្នា ដោយមានកិច្ចសហការល្អ និងភាពជោគជ័យនៃការគ្រប់គ្រងធនធានជលផល និង ការលើកឡើងនូវបញ្ហាបទល្មើសនេសាទ ដែលកំពុងកើតមាន ដើម្បីធ្វើការពិភាក្សា និងរកដំណោះស្រាយរួមគ្នា។
លោក ឱម សាវ៉ាត បានបញ្ជាក់ថា បច្ចុប្បន្ន ឥទ្ធិពលនៃការប្រែប្រួលអាកាសធាតុ បានគំរាមគំហែង ដល់ធនធានជលផលក្នុងប្រទេសកម្ពុជា ជាពិសេសរដូវប្រាំង បានធ្វើឲ្យទឹកបឹងទន្លេសាបរីងរាក់ខុសប្រក្រតី ដែលទឹកបឹងទន្លេសាបក្ដៅ និងធ្វើឱ្យបាត់ពូជត្រីសំខាន់ៗជាបន្តបន្ទាប់។ បន្ថែមពីនោះ គ្រោះទឹកជំនន់ធ្ងន់ធ្ងរ ក៏បានធ្វើឲ្យបឹងទន្លេសាបកាន់តែឆាប់គោករាក់ផងដែរ ដោយការបាក់ដីហូរច្រោះខ្លាំង ដែលបង្កឲ្យប៉ះពាល់ដល់ការរីកលូតលាស់របស់មច្ឆជាតិ និងជីវៈចម្រុះច្រើនប្រភេទទៀត ជាពិសេសប្រព័ន្ធអេកូឡូស៊ីនៅក្នុងបឹងទន្លេសាប។ រីឯ ការអនុញ្ញាតរបស់រាជរដ្ឋាភិបាលកម្ពុជា ឲ្យទៅក្រុមហ៊ុនអាជីវកម្មធ្វើជាម្ចាស់ និងគ្រប់គ្រងតំបន់មួយចំនួននៃបឹងទន្លេសាប បានបង្កធនធានជលផលទាំងនោះ កាន់តែគ្មាន និរន្តរភាព ដោយសារអាជីវកម្មទាំងនោះផ្តោតខ្លាំង លើការកេងប្រវ័ញ្ចធនធានជលផល ជាជាងការការពារ។
មានប្រសាសន៍ក្នុងឱកាសនោះ ឯកឧត្តម អេង ជាសាន បានលើកឡើងថា ការងារអភិរក្សធនធានជលផលសំខាន់គឺយុទ្ឋសាស្ត្រផែនការ ការងារ កម្មវិធីអភិវឌ្ឍ គោលការណ៍អនុវត្តការងារជាដើម នោះការងារនឹងកាន់តែមានប្រសិទ្ឋភាពនិងលើកកំពស់បានកាន់តែល្អប្រសើរជាងមុន។
នាពេលកន្លងមក ការបង្ក្រាបករណីបទល្មើសនេសាទខុសច្បាប់ បានបង្ហាញពីការចូលរួមរបស់ អាជ្ញាធរ អង្គការសង្គមស៊ីវិល និងប្រជាពលរដ្ឋ ប៉ុន្តែវានៅមិនទាន់អាចលុបបំបាត់បានទាំងស្រុងទេ វាទាមទារឲ្យមានកិច្ចសហការគ្នាទៅវិញទៅមកជាប្រចាំ។ ជាមួយនោះ ការងារអភិរក្សធនធានជលផលសំខាន់ ត្រូវមានយុទ្ឋសាស្ត្រផែនការ ការងារ កម្មវិធីអភិវឌ្ឍ គោលការណ៍អនុវត្តការងារជាដើម នោះការងារនឹងកាន់តែមានប្រសិទ្ឋភាព និងមានការលើកកម្ពស់បានកាន់តែល្អប្រសើរជាងមុន។
ឯកឧត្តមបានបញ្ជាក់ផងដែរថា៖ រដ្ឋបាលជលផលនៃក្រសួងកសិកម្ម រុក្ខាប្រមាញ់និងនេសាទ បាននឹងកំពុងធ្វើវិសោធកម្ម ច្បាប់ស្តីពីជលផល ដែលមកដល់ពេលនេះ កំពុងពិភាក្សាកែសម្រួលនិងបន្ថែមលើមាត្រា ពាក់ព័ន្ឋទៅនឹងការគ្រប់គ្រងធនធានធម្មជាតិទាំងតំបន់ទឹកសាបនិងទឹកប្រៃ ការគ្រប់គ្រងសហគមន៍ ការគ្រប់គ្រងវិស័យជលផង និងផ្នែកពាក់ព័ន្ឋមួយចំនួនទៀត ដែលគ្រោងនឹងលើកយកទៅពិភាក្សាផ្ទៃក្នុង រួចនឹងដាក់ឆ្លងទៅរាជរដ្ឋាភិបាលកម្ពុចា ដើម្បីពិនិត្យសម្រេច និងអនុម័តដាក់ឱ្យប្រើប្រាស់ជាផ្លូវការនាឆ្នាំ២០២០ខាងមុខនេះ ដើម្បីគ្រប់គ្រងធនធានជលផលនិងធនធានធម្មជាតិឱ្យកាន់តែមានប្រសិទ្ឋភាពខ្លាំងឡើងថែមទៀត ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
