នៅថ្ងៃទី២១ ខែកក្កដា ម្សិលមិញនេះ សាកលវិទ្យាល័យអង្គរបានរៀបចំកម្មវិធីសំណេះសំណាល ជាមួយប្អូនសិស្សានុសិស្សដែល កំពុងសិក្សាថ្នាក់ទី១២ នៃវិទ្យាល័យ១០មករា ១៩៧៩ ស្ថិតក្រោមអធិបតីភាព ឯកឧត្តម អ្នកឧកញ៉ា សៀង ណាំ ប្រធានក្រុមប្រឹក្សាភិបាល នៃសាកលវិទ្យាល័យអង្គរ និងជាអ្នកតំណាងរាស្ត្រមណ្ឌលសៀមរាប ព្រមទាំងមានមានការអញ្ជើញ ចូលរួមពី សំណាក់អស់លោកគណៈគ្រប់គ្រង លោក សាស្ត្រចារ្យសាកលវិទ្យាល័យអង្គរ រួមទាំងលោកនាយក លោកគ្រូអ្នកគ្រូ វិទ្យាល័យ១០មករា១៩៧៩អញ្ជើញចូលរួមផងដែរ ។
ឯកឧត្តម អ្នកឧកញ៉ា សៀង ណាំ បានមានប្រសាសន៍ថាវិស័យអប់រំ ដែលជាវិស័យអាទិភាពមួយដ៏មានសារៈសំខាន់ ដោយហេតុថា វិស័យនេះ គឺជាឆ្អឹងខ្នង សម្រាប់ទ្រទ្រង់ ការអភិវឌ្ឍសេដ្ឋកិច្ចជាតិ ព្រមទាំងការអភិវឌ្ឍ វិស័យផ្សេងៗទៀត និង ក្នុងន័យផ្តល់ចំណេះដឹង សុជីវធម៌ សីលធម៌ គំនិតច្នៃប្រឌិត និងបំនិនជីវិត យ៉ាងពិតប្រាកដ ជូនដល់សិស្សានុសិស្ស ដែលជាទំពាំងស្នងឫស្សី និងជាសសរទ្រូង សម្រាប់ប្រទេសជាតិ ទាំងក្នុងពេលបច្ចុប្បន្ន និងទៅអនាគត។
ខណៈនេះដែរឯកឧត្តម អ្នកឧកញ៉ា សៀង ណាំ ក៏បានផ្តល់ដំបូន្មាននិងផ្តាំផ្ញើរដល់ប្អូនៗដែលកំពុងតែសិក្សាថ្នាក់ទី១២ទាំងអស់ អោយខិតខំប្រឹងប្រែង ព្យាយាម រៀនសូត្រ សិក្សាស្រាវជ្រាវ ដើម្បីបំពេញ បន្ថែម និង បង្កើននូវចំណេះដឹង របស់ខ្លួនដើម្បីអានាគតរបស់ខ្លួនក្រុមគ្រួសារនិងសង្គមជាតិទាំងមូល ជាពិសេស គឺត្រូវអោយយល់ដឹងអំពីគុណតម្លៃនៃការសិក្សាក្រោយពីការប្រឡងមធ្យមសិក្សាទុតិយភូមិជាប់គឺត្រូវចេះជ្រើសរើសជំនាញដែលត្រូវនឹងបរិបទសេដ្ឋកិច្ចនិងទីផ្សារការងារនិងត្រូវចេះបណ្តុះឆន្ទៈដើម្បីដើរឲ្យដល់គោលដៅជីវិតប្រែក្លាយខ្លួនជាបុគ្គល ដែលមាន កិត្តិយសក្នុងសង្គម ។
ក្នុងឱកាសនោះផងដែរ ឯកឧត្តម អ្នកឧកញ៉ា សៀង ណាំក៍បានមានប្រសាសន៍បញ្ជាក់បន្ថែមទៀតថា នៅឆ្នាំសិក្សាថ្មីនេះឯកឧត្តមនឹងធ្វើការផ្តល់អាហាររូបករណ៏ដល់និស្សិតក្រីក្រចំនួន៥០នាក់រួមទាំងការស្នាក់នៅនិងប្រាក់១០០ដុល្លារក្នុង១ខែ អោយចូលរៀននៅសាកលវិទ្យាល័យអង្គរ ហេតុដូច្នេះ បើសិនជាប្អូនៗសិស្សានុសិស្សណាមានបំណងចងដាក់ពាក្យចូលរៀនអាហារូបករណ៏នេះ សូមទំនាក់ទំនងជាមួយសកលវិទ្យាល័យអង្គរ៕
អត្ថបទ និង រូបថត ៖ លោក ទ្រា ពន្លឺ
