នៅព្រឹកថ្ងៃទី២២ ខែកក្កដា ឆ្នាំ២០១៩នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប លោក ពៅ ពិសិដ្ឋ អភិបាលរងខេត្ត ប្រធានមន្ទីរជុំវិញខេត្ត ពុទ្ធបរិស័ទ និងប្រជាពលរដ្ឋ បានមូលមតិគ្នាជាឯកច្ឆន្ទបាននាំយក ទៀនចំណាំព្រះវស្សា បរិក្ខារ ទេយ្យទាន និងបច្ច័យ យកទៅប្រគេនដល់ព្រះសង្ឃ ដែលគង់ចាំព្រះវស្សាអស់កាល១ត្រីមាស នៅក្នុងវត្តរាជបូព៌ និងវត្តព្រះព្រហ្មរ័ត្ន ក្រុងសៀមរាប។
ក្នុងពិធីនោះ ឯកឧត្តម អ៊ឹង ហឿន បានមានប្រសាសន៍ថា ព្រះពុទ្ធសាសនា គឺជាសាសនារបស់រដ្ឋ ដែលយើងទាំងអស់គ្នាមានជំនឿ និងគោរពប្រតិបត្តិតាម ព្រោះថាព្រះពុទ្ធសាសនាបានផ្តល់ការអប់រំផ្លូវចិត្ត ឲ្យប្រព្រឹត្តនូវអំពើល្អ ចេះស្រឡាញ់រាប់អាន ជួយយកអាសាគ្នា សាមគ្គីភាពគ្នា រស់នៅក្នុងសង្គមមួយ ដោយសុខដុមរមនា។
ឯកឧត្តម ប្រធានក្រុមប្រឹក្សាខេត្តសៀមរាប បានបន្តថា ជារៀងរាល់ឆ្នាំ មិនថាពុទ្ធបរិស័ទ ឬសប្បុរសជននេះ សូម្បីតែអាជ្ញាធរខេត្ត តែងតែបាននាំយកទៀនព្រះវស្សាមកប្រគេន ដល់ព្រះសង្ឃដែលគង់ចាំព្រះវស្សា នៅតាមវត្តអារាមនានាទូទាំងខេត្ត ដែលជាការបង្ហាញនូវការយកចិត្តទុកដាក់គាំទ្រ ផ្នែកវិស័យពុទ្ធសាសនា ដែលជាសាសនារបស់រដ្ឋផងដែរ។
ឯកឧត្តម បានបញ្ជាក់ឲ្យដឹងទៀតថា តាមទំនៀម ទម្លាប់ប្រពៃណីព្រះពុទ្ធសាសនាពិធីបុណ្យចូលព្រះវស្សានេះ មានរយៈពេល៣ខែ ដោយចាប់ផ្ដើមពីថ្ងៃ១រោច ខែអាសាឍ ហើយបញ្ចប់ទៅវិញ នៅថ្ងៃទី១៥រោច ខែកត្តិក តាមព្រះវិន័យព្រះពុទ្ធសាសនា បានកំណត់ថា ព្រះសង្ឃមិនអាចនិមន្ត ចេញទៅបិណ្ឌបាត នៅខាងក្រៅឆ្ងាយៗបានឡើយ ដោយគង់នៅចាំព្រះវស្សា ក្នុងទីវត្តអារាម រហូតរយៈពេល៣ខែពេញតែម្ដង ដូច្នេះហើយ ទើបជារៀងរាល់ឆ្នាំ ប្រជាពលរដ្ឋ ពុទ្ធបរិស័ទតែងតែនាំគ្នាយកទៀនវស្សា និងទេយ្យវត្ថុ ទៅប្រគេនព្រះសង្ឃមុនថ្ងៃចូលព្រះវស្សា។ ហើយការប្រគេនទៀនព្រះវស្សានេះ បានប្រព្រឹត្តទៅតាមទំនៀមទម្លាប់ព្រះពុទ្ធសាសនា ដោយបានធ្វើកិច្ចនមស្សការ ថ្វាយបង្គំព្រះរតនត្រ័យ សមាទានសីល រួចវេរប្រគេនទៀនវស្សា និងគ្រឿងបរិក្ខារ ដល់ព្រះសង្ឃ សម្រាប់ប្រើប្រាស់នៅរដូវចាំព្រះវស្សានេះតាមតម្រូវការ៕
អត្ថបទ និង រូបថត ៖ លោក អ៊ិន សីហរិទ្ធ និងលោក ស៊ាន សុផាត
