កាលពីថ្ងៃអាទិត្យម្សិលមិញនេះ ឯកអគ្គរដ្ឋទូតអាល្លឺម៉ង់ប្រចាំប្រទេសលីប៊ីលោក អូលីវើ អូហ្សា (Oliver Owcza) បាន និយាយថា ប្រទេសអាល្លឺម៉ង់បានផ្តល់ជំនួយចំនួន ២លានអឺរ៉ូ ស្មើនឹង ២.២៤ លានដុល្លារអាមេរិក ដល់អង្គការសហប្រជាជាតិទទួលបន្ទុកជនភៀសខ្លួន ហៅកាត់ថា UNHCR ដើម្បីជួយជនភៀសខ្លួន និងអ្នកដែលផ្លាស់ទីលំនៅនៅក្នុងប្រទេសលីប៊ី។
លោកឯកអគ្គរដ្ឋទូតរូបនេះបាននិយាយថា បន្ទាប់ពីការសង្គ្រោះបន្ទាន់នាពេលថ្មីៗនេះ ក្រសួងការបរទេសអាល្លឺម៉ង់បានផ្តល់ប្រាក់បន្ថែមនេះដល់ UNHCR ប្រចាំនៅ ប្រទេសលីប៊ី ដើម្បីពង្រឹងការការពារជនភៀសខ្លួន និងជនអន្តោប្រវេសន៍ និងការគាំទ្រដល់ជនភៀសខ្លួន ដែលរងផលប៉ះពាល់ដោយជម្លោះដែលកំពុងបន្ត។
UNHCR បានសរសេរនៅក្នុងបណ្តាញ Twitter របស់ខ្លួនថា សូមអរគុណដល់ការគាំទ្រ ដ៏មានសារសំខាន់របស់ប្រទេសអាល្លឺម៉ង់ ដោយ UNHCR អាចបន្តផ្តល់ជំនួយសង្គ្រោះជីវិតដល់ជនភៀសខ្លួន និងអ្នកស្វែងរកសិទ្ធជ្រកកោន ដល់ប្រជាជនលីប៊ីបន្ថែមទៀត។
ថ្មីៗនេះ គណៈកម្មការនេះ បានទាមទារឱ្យបិទមជ្ឈមណ្ឌលទទួលមនុស្ស សម្រាប់ជនអន្តោប្រវេសន៍ខុសច្បាប់នៅក្នុងប្រទេសលីប៊ី ដោយសារតែស្ថានភាពអសន្តិសុខនៅក្នុងប្រទេស។
រដ្ឋធានីទ្រីប៉ូលី បានធ្វើជាសាក្សីចំពោះជម្លោះប្រដាប់អាវុធ រវាងកងទ័ពដែលមាន មូលដ្ឋាននៅភាគខាងកើត និងរដ្ឋាភិបាលដែលគាំទ្រដោយអង្គការសហប្រជាជាតិ លើការត្រួតត្រាទីក្រុង។
ជម្រកជនអន្តោប្រវេសន៍នៅក្នុងប្រទេសលីប៊ី ត្រូវបានប្រមូលផ្តុំដោយជនចំណាកស្រុក រាប់ពាន់នាក់ ដែលត្រូវបានជួយសង្គ្រោះនៅសមុទ្រ ឬចាប់ខ្លួនដោយសេវាកម្មសន្តិសុខលីប៊ី។
ដោយសារស្ថានភាពអសន្តិសុខ និងភាពវឹកវរ បន្ទាប់ពីការបះបោរឆ្នាំ២០១១មក ដែលបានផ្តួលរំលំរបបមេដឹកនាំលីប៊ីលោក មូម៉ា ម៉ាកាដាហ្វី ប្រទេសលីប៊ីបានក្លាយជាគោលដៅ នៃការចាកចេញរបស់ជនអន្តោប្រវេសន៍ខុសច្បាប់រាប់ពាន់នាក់ ដែលចង់ឆ្លងកាត់សមុទ្រ មេឌីទែរ៉ានេឆ្ពោះទៅកាន់ច្រាំងនៅអឺរ៉ុប៕
(ប្រភព ស៊ីនហួ: បកប្រែដោយលោក មាស សំអុល)
