ថ្ងៃទី២២ ខែកក្កដា ឆ្នាំ២០១៩ មានកិច្ចប្រជុំស្តីពី ការពង្រឹង កិច្ចសហប្រតិបត្តិការបង្ក្រាបបទ ល្មើស គ្រឿងញៀន នៅតាមក្លឹបកម្សាន្ត កន្លែងសប្បាយដ្ឋាន និងទីតាំង Internet Online ក្នុង ខេត្ត សៀមរាប ដែលងាយកើតមានបទល្មើសគ្រឿងញៀន ដឹកនាំកិច្ចប្រជុំដោយ លោក ពិន ប្រាកដ អភិបាលរងខេត្ត និងជាតំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្ត សៀមរាប មានការអញ្ជើញចូលរួមពី លោកស្នងការនគរបាលខេត្ត តំណាងគណ:កម្មាធិការត្រួតគ្រឿងញៀនខេត្ត ក្រុង ស្រុក ម្ចាស់ក្រុមហ៊ុន ម្ចាស់ក្លឹប កម្សាន្ត សប្បាយដ្ឋាន ម្ចាស់ទីតាំង Internet Online និងអ្នកពាក់ព័ន្ធ សរុបចំនួន ១០០នាក់ ។
ក្នុងឱកាសនោះ លោកអភិបាលរងខេត្ត និងជាប្រធានលេខាធិការដ្ឋានត្រួតពិនិត្យគ្រឿងញៀនខេត្ត បានថ្លែងស្វាគមន៍ និងរបាយការណ៍ថា បច្ចុប្បន្នខេត្តសៀមរាប មានសណ្ឋាគារ ផ្ទះសំណាក់ ខារ៉ាអូខេ-ក្លឹបកំសាន្ត ហាងម៉ាស្សាកោសជប់ អាហារដ្ឋាន -ភោជនីយដ្ឋាន រមណីយដ្ឋាន រោងចក្រ សហគ្រាស សិប្បកម្ម ដែលមានកម្មករប្រេីកម្លាំងធ្ងន់ៗ អាចងាយនឹងប្រើសារធាតុញៀនលើកកម្លាំង។
ក្នុងនោះដែរ លោកពិន ប្រាកដ ក្នុងនាមសម្តេចក្រឡាហោម ស ខេង ប្រធានគណៈបញ្ជាការដឹកនាំយុទ្ធនាការប្រយុទ្ធប្រឆាំងគ្រឿងញៀនលើកទី៤ ឯកឧត្តមនាយឧត្តមសេនីយ៍ កែ គឹមយ៉ាន អនុប្រធានគណៈបញ្ជាការដឹកនាំយុទ្ធនាការ និងឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ប្រធានលេខាធិការដ្ឋាន ប្រយុទ្ធប្រឆាំង គ្រឿងញៀន បានណែនាំ ដល់ម្ចាស់ក្លឹបកំសាន្ត សប្បាយដ្ឋាន សណ្ឋាគារ ផ្ទះសំណាក់ ខារ៉ាអូខេ -ក្លឹបរាត្រី ទាំងអស់ ត្រូវតែបង្កីនការយកចិត្តទុកដាក់ បង្ការទប់ស្កាត់ការប្រើប្រាស់ ដែលអាចក្លាយទៅជាទីផ្សារជួញដូរ គ្រឿងញៀន និងបង្កើតឲ្យមានបទល្មើសគ្រឿងញៀនក្នុងមូលដ្ឋានអាជីវកម្មរបស់ខ្លួន និងសូមឲ្យចូលរួមសហការជាមួយសមត្ថកិច្ចក្នុងការបង្ក្រាបបទល្មើសគ្រឿងញៀន គ្រប់ប្រភេទតាមនីតិវិធីច្បាប់ ។
ក្នុងកិច្ចប្រជុំនេះដែរ លោក ឈឹម វឍ្ឍនៈ ម្ចាស់កន្លែងសប្បាយដ្ឋាន សែន សប្បាយ ទាំង ១០ សាខា ក្នុងខេត្តសៀមរាប និងជាតំណាងម្ចាស់អាជីវកម្មទាំង បានសាទរ និងរីករាយក្នុងការសហការជាមួយអាជ្ញាធរមានសមត្ថកិច្ចគ្រប់កាលៈទេសៈ និងគ្រប់ពេលវេលា។
ជាមួយគ្នានោះ លោកអភិបាលរងខេត្ត ក៏បានបន្ថែមដោយសង្កត់ធ្ងន់ថា លើសពីនោះ ស្នងការនគរបាលខេត្ត បញ្ជាការដ្ឋានកងរាជអាវុធហត្ថខេត្ត ត្រូវចាត់វិធានការបង្ក្រាបល្បែងស៉ីសងគ្រប់ភេទ និងតាមប្រព័ន្ធអ៊ិនធើណិត អនឡាញ ឲ្យបានម៉ឺងម៉ាត់បំផុត ក្នុងករណីមានការសង្ស័យកើតមាន នូវបទល្មើសគ្រឿងញៀនក្នុងទីតាំងអាជីវកម្មណាមួយ ហើយម្ចាស់ទីតាំងអាជីវកម្ម បានស្នើសុំនូវកិច្ចសហការពីសមត្ថកិច្ច សមត្ថកិច្ចត្រូវតែឆ្លើយតប និងធ្វើអន្តរាគមន៍ភ្លាមៗ ហើយចៀសឲ្យបានដាច់ខាតនូវកុំ៤ គឺ កុំពាក់ព័ន្ធ កុំនៅពីក្រោយធ្វើជាបង្អែក កុំបន្ធូរបន្ថយ និងកុំអន្តរាគមន៍ក្នុងករណីបទល្មើសគ្រឿងញៀន ៕
អត្ថបទ និង រូបថត ៖ លោក ថាច់ ពិសុទ្ធ និងមន្ត្រីមន្ទីរព័ត៌មាន
កែសម្រួលអត្ថបទ ៖ លោក សេង ផល្លី
