នៅថ្ងៃទី២២ ខែកក្កដា ឆ្នាំ២០១៩ លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ និងជាប្រធានអាជ្ញាធរជាតិអប្សរា បានអញ្ជើញចុះពិនិត្យតាមដានការងារទូទៅ ស្តីពីការជួសជុល និងផ្គុំរូបព្រះសីវៈរាំឡើងវិញនៅអភិរក្សដ្ឋានអង្គរ ព្រមទាំងបានសម្ដែងនូវកោតសរសើរ ចំពោះការខិតខំប្រឹងប្រែងរបស់ក្រុមអ្នកជំនាញ ក្នុងន័យរក្សាតម្លៃសិល្បៈបុរាណខ្មែរ ទុកជាកេរតំណែលសម្រាប់អ្នកជំនាន់ក្រោយ។
យោងតាមការចុះផ្សាយរបស់អាជ្ញាធរជាតិអប្សរា រូបព្រះសិវៈរាំដែលកំពុងជួសជុលនេះ គឺមានប្រភពមកពីប្រាសាទក្រហមនៅតំបន់ប្រាសាទកោះកែរ ដែលបច្ចុប្បន្នគឺបែកខ្ទេចខ្ទាំជា១ម៉ឺនបំណែក ត្រូវបានអ្នកជំនាញនៃអភិរក្សដ្ឋានអង្គរ កំពុងធ្វើការជួសជុលដោយយកចិត្តទុកដាក់និងអត់ធ្មត់បំផុតដើម្បីផ្គុំបំណែកតូចៗឱ្យមានរូបរាងឡើងវិញ។
គួររម្លឹកថា តាមប្រវតិ្តព្រះសិវៈរាំអង្គនេះ សង់នៅសតវត្សរ៍ទី១០ ដែលគេរៀបចំតាំងនៅប្រាសាទក្រហម ដែលជាប្រាសាទឥដ្ឋ នៃក្រុមប្រាសាទកោះកែរ និងជាប្រាសាទដ៏ធំមួយ ហើយក្នុងជំនឿព្រហ្មញ្ញសាសនា ព្រះសិវៈនេះគឺរាំបំផ្លាញសភាវៈអាក្រក់ ខណៈនៅតាមប្រាសាទបុរាណ គេកម្រសង់បដិមាធំបែបនេះណាស់ គឺគេឃើញមានជារូបចម្លាក់តូចៗតាមជញ្ជាំង ហោជាង ឬនៅតាមដុំថ្មលម្អនៅកំពូលប្រាសាទជាដើម។
ក្រោយមានការបំផ្លាញក្នុងសម័យសង្គ្រាម សាលាបារាំងចុងបូព៌ា សហការជាមួយក្រសួងវប្បធម៌តាមរយៈអាជ្ញាធរជាតិព្រះវិហារ និងអាជ្ញាធរជាតិអប្សរា ធ្វើកំណាយបំណងដើម្បីជីកយកបំណែកមកជួសជុលឡើងវិញ ដែលជាលទ្ធផល គេបានរកឃើញបំណែកប្រមាណ១ម៉ឺន ដែលមានទាំងតូចទាំងធំ យកមកដាក់ក្នុងសារមន្ទីរព្រះនរោត្តម សីហនុ-អង្គរ។
ការងារផ្គុំបំណែកបដិមាមានបញ្ហានៅសារមន្ទីរក្រហម ឬសារមន្ទីរព្រះនរោត្តម សីហនុ-អង្គរ ដ្បិតថាកម្ពស់បដិមានេះខ្ពស់ជាងពិដានក្នុងសារមន្ទីរ ទើបគណៈកម្មការជួសជុលសម្រេចយកការងារនេះមកអនុវត្តន៍ក្នុងអភិរក្សដ្ឋានអង្គរ ហើយអ្នកជំនាញនិយាយថា ក្រោយផ្គុំហើយ ព្រះសិវៈនេះអាចមានកម្ពស់រហូតដល់៥ម៉ែត្រ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
