នៅព្រឹកថ្ងៃទី២៣ ខែកក្កដា ឆ្នាំ២០១៩នេះ ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប និង លោកស្រី យូ សុភា អភិបាលរងខេត្ត រួមជាមួយឯកឧត្ដម លោកជំទាវ លោក លោកស្រី ជាសមាជិក សមាជិកាក្រុមប្រឹក្សាខេត្ត ប្រធាន អនុប្រធានមន្ទីរ អង្គភាពនានាជុំវិញខេត្ត ពុទ្ធបរិស័ទ និងប្រជាពលរដ្ឋ បានមូលមតិគ្នាជាឯកច្ឆន្ទបាននាំយក បរិក្ខារ ទេយ្យទាន និងបច្ច័យ ទៀនចំណាំព្រះវស្សា យកទៅប្រគេនដល់ព្រះសង្ឃដែលកំពុងគង់ចាំព្រះវស្សា នៅក្នុងវត្តព្រះឥន្ទកោសីយ៍ និងវត្តកេសរ៉ារាម ក្នុងក្រុងសៀមរាប។
មានប្រសាសន៍សំណេះសំណាលក្នុងឱកាសនោះ ឯកឧត្តម អ៊ឹង ហឿន បានរំលឹកថា កាលពីអតីតកាលដ៏ជូរចត់របស់កម្ពុជាយើង ក្នុងចន្លោះពី១៩៧៥ ដល់ឆ្នាំ១៩៧៩ ប្រទេសកម្ពុជាយើង បានធ្លាក់ចុះទៅក្នុងសម័យដ៏ខ្មៅងងឹតនៃរបបកម្ពុជាប្រជាធិបតេយ្យ ដែលដឹកនាំដោយពួកប៉ុល ពត បានរងនូវសោកនាដកម្ម ការបំផ្លិចបំផ្លាញខ្ទេចខ្ចីដល់ឫសគល់ ទាំងហេដ្ឋារចនាសម្ព័ន្ធរូបវន្ត មានផ្លូវ សាលារៀន មន្ទីរពេទ្យ វត្តអារាម ។ល។ និងធនធានមនុស្សជាដើម ដោយពួកវាបានបំបិទសិទ្ធិសេរីភាពរបស់ប្រជាជនគ្រប់បែបយ៉ាង ទាំងខាងជំនឿសាសនា ការដើរហើរ និងការនិយាយស្ដី ចំណែកព្រះសង្ឃវិញក៍ត្រូវបានចាប់ផ្សឹកកជម្លៀសចេញពីវត្ត រីឯអារាមក៍ក្លាយជាទីឃុំឃាំង កាប់សម្លាប់ ឬជាកន្លែងចិញ្ចឹមសត្វ ប្រជាជនត្រូវបានបង្អត់ អាហារ ធ្វើការពលកម្មស្ទើរគ្មានសម្រាក ភ័យព្រួយនឹងការកាប់សម្លាប់គ្រប់ពេលវេលា ហើយនៅពេលនោះប្រជាជនយើង តែងតែលួចបន់ស្រន់រកទេវតា ឬអ្នកខ្លាំងពូកែឯណាឱ្យមកជួយ ហើយសុទ្ធតែបានសន្យាថា៖ ឱ្យតែបានរួចរស់មានជីវិត និងបានហូបឆ្អែត ទោះជាឱ្យធ្វើអ្វីក៏ធ្វើដែរ »។
ឯកឧត្តម អ៊ឹង ហឿន មានប្រសាសន៍ទៀតថា ដោយសារគុណថ្ងៃរំដោះ៧មករា១៩៧៩ រណសិរ្សសាមគ្គីសង្គ្រោះជាតិកម្ពុជាក្រោមការដឹកនាំរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសង្គ្រោះប្រទេស និងប្រជាជនកម្ពុជាឱ្យរួចផុតពីការបំផ្លិចបំផ្លាញ និងកាប់សម្លាប់ ហើយក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហេដ្ឋារចនាសម្ព័ន្ធរូបវន្ត ទាំងផ្នែកអាណាចក្រ និងពុទ្ធចក្រ ដូចជា ផ្លូវថ្នល់ ស្ពាន ទំនប់ទឹក ប្រឡាយ សាលារៀន មន្ទីរពេទ្យ ស្រះទឹក អណ្តូងទឹកព្រះវិហារ ឧបដ្ឋានសាលា សេនាសនៈ និងពិធីសាសនា នានា ។ល។ ត្រូវបានស្តារ និងអភិវឌ្ឍន៍ឡើងវិញយ៉ាងឆាប់រហ័សនឹកស្មានពុំដល់ ពិសេសព្រះពុទ្ធសាសនាត្រូវបានកំណត់ក្នុងរដ្ឋធម្មនុញ្ញថាជា«សាសនារបស់រដ្ឋ»។
ឯកឧត្តម ប្រធានក្រុមប្រឹក្សាខេត្ត មានប្រសាសន៍បញ្ជាក់ទៀតថា បច្ចុប្បន្នវិស័យពុទ្ធិកសិក្សា ក៏មានការរីកចម្រើនជាបន្ត បន្ទាប់ ដោយយើងមានសាលាធម្មវិន័យ ចាប់ពីថ្នាក់ត្រី ថ្នាក់ទោ ថ្នាក់ឯក និងសាលាពុទ្ធិកបឋមសិក្សា រហូតដល់ពុទ្ធិកវិទ្យាល័យ និងមានពុទ្ធិកសាកលវិទ្យាល័យទៀតផង ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
