នៅព្រឹកថ្ងៃទី២៣ ខែកក្កដា ឆ្នាំ២០១៩ លោក សុខ ថុល នាយករដ្ឋបាល និងជាប្រធានគ្រប់គ្រងគម្រោងថ្នាក់ខេត្ត និងមានការចូលរួមពីក្រុមការងារថ្នាក់ខេត្ត ទីប្រឹក្សាហេដ្ឋារចនាសម្ព័ន្ធ លោកមេឃុំដូនកែវ និងអ្នកសម្របសម្រួលស្រុក/ឃុំ បានចុះពិនិត្យការដ្ឋាន សាងសង់ផ្លូវដីស ក្រាលគ្រួសក្រហមមួយខ្សែ ក្រោមកម្មវិធីរបស់គម្រោងលើកកម្ពស់ជីវភាពប្រជាជនក្រីក្រ (លាភ) ស្ថិតក្នុងឃុំដូនកែវ ស្រុកពួក ខេត្តសៀមរាប ។
សម្រាប់ផ្លូវមួយខ្សែនេះ ពីមុនមានភាពលំបាកខ្លាំង ដែលធ្វើឲ្យប្រជាពលរដ្ឋនៅក្នុងមូលដ្ឋាននេះមានការលំបាកក្នុងការធ្វើដំណើរ ប៉ុន្តែអាជ្ញាធរខេត្តសង្ឃឹមថា ក្រោយពីការដ្ឋាននៅពេលនេះបានបញ្ចប់វា ពិតជាបានជាប្រយោជន៍យ៉ាងសំខាន់ ក្នុងការបម្រើដល់ការដឹកជញ្ជូនកសិផលរបស់ប្រជាកសិករ ទៅកាន់ទីផ្សារ ព្រមទាំងកាត់បន្ថយការលំបាករបស់ប្រជាពលរដ្ឋ ។
សូមបញ្ជាក់ផងដែរថា ផ្លូវដីស ក្រាលគ្រួសក្រហមមួយខ្សែ និងលូជ្រុងមានទ្វារទឹកមួយកន្លែងនេះ មានប្រវែង ១៥០០ម៉ែត្រ ទទឹង ៤ម៉ែត្រ កម្រាស់ ០,១៥ម៉ែត្រ ហើយបានតភ្ជាប់ពីភូមិរហាល ទៅភូមិតាស្នេហ៍ ដែលមានអ្នកទទួលផលសរុបចំនួន ១៨០គ្រួសារ ស្មើនឹង ៨៧៧នាក់ ដែលមានប្រជាពលរដ្ឋក្រ១ និងក្រ២ ចំនួន ៥៩គ្រួសារ ។
អត្តបទនិងរូបភាព៖រដ្ឋបាលខេត្តសៀមរាប
