នៅព្រឹកថ្ងៃទី២៤ ខែកក្កដានេះ សិស្សជំនាន់ទី១៧ របស់សាលាសណ្ឋាគារនិងភោជនីយដ្ឋាន សាលាបាយ (Sala Baï Hotel & Restaurant School) បានរៀបចំពិធីចែកវិញ្ញាបនបត្រដល់សិស្សចំនួន ១៤៩នាក់ ស្ថិតនៅភូមិវត្តស្វាយ សង្កាត់សាលាកំរើក ក្រុងសៀមរាប ក្រោមអធិបតីមន្ត្រីជាន់ខ្ពស់ក្រសួងទេសចរណ៍ អភិបាលខេត្តសៀមរាប មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ រួមនឹងថ្នាក់ដឹកនាំ មន្ត្រីមន្ទីរ-អង្គភាពពាក់ព័ន្ធជាច្រើនរូប។
ថ្លែងក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា សាលាបាយ បានជួយបណ្ដុះបណ្ដាលពលរដ្ឋខ្មែរ ឲ្យមានឯកទេសច្បាស់ ពាក់ព័ន្ធនឹងវិស័យទេសចរណ៍ អស់រយៈពេល១៧ឆ្នាំមកហើយ។
ស្របតាមតម្រូវការរីកចម្រើនដ៏ខ្លាំងក្លា នៃទីផ្សារការងារទេសចរណ៍របស់ខេត្តសៀមរាប សាលាបាយ នៅតែជាយន្តការដ៏មានសក្តានុពលនៅខេត្តសៀមរាប ក៏ដូចជាសាលាបណ្ដុះបណ្ដាលផ្នែកបដិសណ្ឋារកិច្ចដទៃទៀត ក្នុងការរួមចំណែកជាមួយរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ពិសេសក្រសួងការងារ និងបណ្តុះបណ្តាលវិជ្ជាជីវៈ និងក្រសួងទេសចរណ៍ ក្នុងក្របខណ្ឌ នៃការបណ្តុះបណ្តាលធនធានមនុស្ស ដើម្បីជំរុញកិច្ចអភិវឌ្ឍប្រទេសជាតិលើគ្រប់វិស័យ និងដើម្បីកំណើនការងារ សមធម៌ ក្នុងការចូលរួមកាត់បន្ថយភាពក្រីក្ររបស់ប្រជាពលរដ្ឋនៅកម្ពុជាជាបណ្តើរៗ។
មានវត្តមានជាអធិបតីក្នុងឱកាសនោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ តំណាង ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា វិស័យទេសចរណ៍ ត្រូវបានថ្នាក់ដឹកនាំពិភពលោកបានចាត់ទុកជាវិស័យស្នូល ក្នុងការសម្រេចគោលដៅអភិវឌ្ឍន៍ប្រកបដោយនិរន្តរភាពឆ្នាំ ២០៣០ ទាំង ១៧ របស់ពិភពលោក។ ជាមួយនោះ រាជរដ្ឋាភិបាលកម្ពុជា ក៏បានចាត់ទុកវិស័យនេះ ជាមាសបៃតង និងជាការនាំចេញនៅនឹងកន្លែង ដើម្បីចូលរួមអភិវឌ្ឍន៍សេដ្ឋកិច្ច និងសង្គមតាមរយៈការបង្កើតប្រាក់ចំណូលជូនជាតិ បង្កើតឱកាសការងារ បង្កើនការវិនិយោគក្នុងប្រទេស និងចូលរួមកាត់បន្ថយភាពក្រីក្ររបស់ប្រជាពលរដ្ឋបានយ៉ាងមានប្រសិទ្ធភាព។
ឯកឧត្តម ប៉ាក់ សុខុម បានបញ្ជាក់បន្ថែមថា ផែនការយុទ្ធសាស្ត្រអភិវឌ្ឍន៍ធនធានមនុស្ស ក្នុងវិស័យទេសចរណ៍ ២០១៧-២០២៥ ដែលរៀបចំឡើងដោយ ក្រសួងទេសចរណ៍ បង្កើតឡើងជាផែនទីចង្អុលទិស ក្នុងការអភិវឌ្ឍមូលធនមនុស្សក្នុងវិស័យទេសចរណ៍កម្ពុជា ដោយក្នុងនោះនៅ៖
– ឆ្នាំ ២០២០ ក្រសួងទេសចរណ៍ និងភាគទីពាក់ព័ន្ធ ត្រូវសហការចូលរួមបង្កើតការងារផ្ទាល់ឲ្យបានប្រមាណ ១ លាននាក់ហើយត្រូវជំរុញឲ្យអ្នកជំនាញយ៉ាងតិច ៥០ភាគរយ ត្រូវមានរិញ្ញាបនបត្រ ឬសញ្ញាបត្របញ្ជាក់សមត្ថភាពស្របតាមស្តង់ដាជាតិ និងអាស៊ានតាមរយៈការបណ្ដុះបណ្ដាលការវាយតម្លៃសមត្ថភាព។
– ឆ្នាំ ២០២៥ ក្រសួងទេសចរណ៍ និងភាគីពាក់ព័ន្ធ ត្រូវសហការចូលរួមបង្កើតការងារផ្ទាល់ឲ្យបានប្រមាណ ១.២ លាននាក់ នឹងត្រូវសម្រេចឲ្យបាននូវយុទ្ធនាការ “បុគ្គលិកម្នាក់ ជំនាញមួយ” ពោលគឺជំរុញឲ្យអ្នកជំនាញទេសចរណ៍ទាំងអស់ (១០០ភាគរយ)មានវិញ្ញាបនបត្រ ឬសញ្ញាបត្របញ្ចាក់សមត្ថភាពតាមស្តង់ដារជាតិនិងអាស៊ាន។ លើសពីនោះ ក្រសួងទេសចរណ៍ក៏នឹងរៀបចំកម្មវិធីសិក្សា និងបណ្ដុះបណ្ដាលអ្នកជំនាញទេសចរណ៍ ដើម្បីឆ្លើយតបទៅនឹងសេចក្ដីត្រូវការរបស់ឧស្សាហកម្ម និងបម្រែបម្រួលក្នុងបរិបទ បដិវត្តន៍ឧស្សាហកម្ម៤.០(Industry Revolution 4.0) ជាពិសេសជំរុញការបណ្ដុះបណ្ដាលអ្នកជំនាញទេសចរណ៍ លើជំនាញបច្ចេកវិទ្យាក្នុងទស្សនទាន ទេសចរណ៍បែបឆ្លាតវៃ (Smart Tourism)។
សូមជម្រាបថា សាលាសណ្ឋាគារ និងភោជនីយដ្ឋាន សាលាបាយ បានចាប់បើកពីឆ្នាំ២០០២ បណ្ដុះបណ្ដាលើជំនាញជាច្រើនពាក់ព័ន្ធវិស័យទេសចរណ៍ រហូតមកដល់ពេលនេះ មានសិស្សបញ្ចប់វគ្គបណ្ដុះបណ្ដាលចំនួន ១៧ជំនាន់ហើយ។ សិស្សនៅទីនេះ នឹងទទួលបានអាហារូបករណ៍១០០ភាគរយ បន្ទាប់ពីបុគ្គលិកនៃសាលាមួយនេះ បានចុះទៅសិក្សាពីជីវភាពដល់ផ្ទះរបស់ពួកគេ។ ក្រៅពីការសិក្សាមិនគិតថ្លៃ សិស្សនៅទីនេះក៏នឹងទទួលបាន សម្ភារសិក្សា ការស្នាក់នៅ កង់ ឯកសណ្ឋាន និងការថែទាំសុខភាពមិនគិតថ្លៃទៀតផង។
អត្ថបទ និង រូបថត : លោក សេង ផល្លី និង លោក ស៊ាន សុផាត
