នៅព្រឹកថ្ងៃទី២៤ ខែកក្កដា ឆ្នាំ២០១៩ ព្រះវិជ័យរង្សី សាសនធរោ ឡាច លាង អនុគណក្រុងសៀមរាប និងជាចៅអធិការវត្តទេពពោធិ៍វង្សហៅវត្តថ្មីរួមជាមួយព្រះថេរានុថេរៈមកពី វត្តមួយចំនួនក្នុងក្រុងសៀមរាប និង លោកជំទាវ ឧកញ៉ា សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍ និងភរិយាឥស្សរជនជាន់ខ្ពស់ក្នុងជួររាជរដ្ឋាភិបាល មួយចំនួនទៀត ដោយបានការសម្របសម្រួលនិងសហការពីអាជ្ញាធរជាតិអប្សរា បាននាំគ្នា ដាំកូនឈើ ប្រភេទធ្នុង ក្រញូង ច្រេស គគីរ ពពេល និងប្រភេទឈើទាល ចំនួន៥០០០ដើម នៅខាងកើតប្រាសាទប្រិយ៍ ស្ថិតនៅ ឃុំលាងដៃស្រុកអង្គរធំ ខេត្តសៀមរាបតបតាមការអំពាវនាវរបស់អាជ្ញាធរជាតិអប្សរា ឱ្យប្រជាពលរដ្ឋចូលរួមដាំកូនឈើនៅតំបន់រមណីយដ្ឋានអង្គរ សរុបអ្នកចូលរួមដាំទាំងព្រះសង្ឃនិងគ្រហស្ថប្រមាណជា១០០០អង្គ នាក់។
មានថេរដិកាក្នុងឱកាសនេះដែរ ព្រះសទ្ឋម្មប្បកាសនី តាត មហាទី ព្រះធម្មធរអនុគណក្រុងសៀមរាប និងជាចៅអធិការវត្តព្រះឥន្ទកោសា បានសុំបិណ្ឌបាតដល់លោកជំទាវឧកញ៉ា សៀងចាន់ហេង អគ្គនាយិកាក្រុមហ៊ុនហេងអភិវឌ្ឍ ជួយជួសជុលរហាត់ទឹក ដើម្បីជាប្រយោជន៍ដល់ការស្រោចស្រពថ្នាលបណ្តុះកូនឈើ នៅក្បែរស្ពានប្រាសាទតាកែវរបស់អាជ្ញាធរជាតិអប្សរា។
ព្រះអង្គមានថេរៈដិកាថា ទៀត រហាត់ទឹកនេះមានប្រវត្តិយូរណាស់មកហើយ ពោលវត្តមានរហាត់ទឹកនេះមានឡើងតាំងពីអំឡុងទសវត្សទី៦០មកម្ល៉េះ រហាត់នេះមានសារៈសំខាន់ណាស់ក្នុងការទាញយកទឹកពីស្ទឹងសៀមរាប មកស្រោចស្រពកូនឈើនៅស្ពានប្រាសាទតាកែវ និងជាតំណាងឱ្យអត្តសញ្ញាណជាតិខ្មែរ វប្បធម៌ខ្មែរដែលបុព្វបុរសយើងស្ថាបនាឡើងដើម្បីទាញយកទឹកសម្រាប់ធ្វើកសិកម្ម និងតម្រូវការប្រើប្រាស់ផ្សេងៗ។
លោក ឡុងកុសល ប្រធាននាយកដ្ឋានផ្សព្វផ្សាយនិងជាអ្នកនាំពាក្យអាជ្ញាធរជាតិអប្សរា មានឲ្យដឹងថា រហាត់ទឹកនេះជាកេរតំណែលមរតករបស់ដូនតាខ្មែរយើង ជាពិសេសជាស្នាដៃអ្នកជំនាន់ដើមនៃអ្នកខេត្តសៀមរាប និងក៍ជាអត្តសញ្ញាណមួយសម្រាប់ខេត្តនេះផងដែរ។
លោក ឡុងកុសល បន្តថា ការចូលរួមជួសជុលរហាត់ទឹកឱ្យមានដំណើរការឡើងវិញ មិនត្រឹមតែរក្សាបាននូវអត្តសញ្ញាណរបស់ខេត្តសៀមរាបនោះទេ ប៉ុន្តែវាមានតួនាទីសំខាន់ក្នុងការងារដាំនិងបណ្តុះកូនឈើនៅស្ថានីយតាកែវរបស់អាជ្ញាធរជាតិអប្សរា។ជាក់ស្តែងការបណ្តុះកូនឈើនៅទីនេះសព្វថ្ងៃគឺប្រើម៉ាស៊ីនភ្លើងដើម្បីទាញយកទឹកពីស្ទឹងដែលវាបង្កឱ្យមានផលប៉ះពាល់ដល់បរិស្ថានតំបន់ប្រាសាទ ដោយសារសម្លេងរំខាន និងភាពញ័ររង្គើរបស់។
ជាការឆ្លើយតប លោកជំទាវឧកញ៉ា សៀងចាន់ហេង អគ្គនាយិកាក្រុមហ៊ុនហេងអភិវឌ្ឍ បានសម្តែងក្តីរីករាយ និងទទួលយកសំណើរខាងអំពីការជួសជូលរហាត់ទឹកមួយនេះដើម្បីឱ្យដំណើរការឡើងវិញ។
លោកជំទាវ មានប្រសាសន៍ បន្តថា សុំឱ្យអាជ្ញាធរជាតិអប្សរាសិក្សា និងពិភាក្សាជាមួយថ្នាក់ដឹកនាំក្រសួងវប្បធម៌និងវិចិត្រសីល្បៈ ដើម្បីថែរក្សានិងអភិរក្សរហាត់នេះឱ្យត្រឹមត្រូវតាមរចនាបទរបស់បុរាណយើង និងសិក្សាពីតម្លៃជួសជុល អស់ប៉ុន្មាន នឹងប្រគល់ថវិកាជូនតាមពេលក្រោយ។លោកជំទាវបន្តថា៖ ជារឿយៗ ឱ្យតែមានសំណើរបិណ្ឌបាតពីព្រះសង្ឃ គឺតែងតែប្រគេនទៅតាមសំណើរ និងទៅតាមលទ្ឋភាពជាក់ស្តែង ដូចជាពេលនេះ ប្រគេនថវិកាចំនួន១ម៉ឺនដុល្លារ ដល់ចៅអធិការវត្តអារញ្ញាសាគរ ដែលបានសន្យាពីពេលថ្មីៗនេះសម្រាប់ការជីកស្រះក្នុងវត្ត និងប្រគេនវត្តកំបោរអនៅស្រុកជីក្រែងសម្រាប់ជាវដីពង្រីកវត្តនិងកសាងជួសជុលផ្លូវចំនួន១ម៉ឺនដុល្លារផងដែរ ហើយក្នុងរដូវប្រាំងឆ្នាំក្រោយនឹងជួយជួសជុលដំបូលព្រះវិហារទាំងមូលរបស់វត្តព្រះឥន្ទ្រកោសីយ៍ ផងដែរ។
អត្ថបទ និង រូបភាព ៖ យូ វង្ស
