នៅព្រឹកថ្ងៃទី២៤ ខែកក្កដា ឆ្នាំ២០១៩នេះ អាជ្ញាធរជាតិអប្សរា បានរៀបចំពិធីបើកការដ្ឋានសង់ស្ពានបេតុង និងទ្វារទឹកមួយកន្លែង ស្ថិតក្នុងភូមិនគរក្រៅ សង្កាត់គោកចក ក្រុងសៀមរាប ហើយស្ពាននេះមានប្រវែង ៣១ម៉ែត្រ ទទឹង៣,៥ម៉ែត្រ និងកម្ពស់៤ម៉ែត្រ ដែលសង់លើអូរខ្លូត ចំណែកទ្វារទឹកវិញ មានប្រវែង១០ម៉ែត្រ ទទឹង៣,៥ម៉ែត្រ ស្ថិតនៅច្រកបញ្ចេញទឹកទន្លេស្ងួត។
លោក ភឿន សុឃីម អនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរា មានប្រសាសន៍ថា កាលពីឆ្នាំ២០១៣ អ្នកភូមិនគរក្រៅ ធ្លាប់ជន់លិចដោយសារជំនន់ទឹកភ្លៀង ព្រោះពុំទាន់មានសំណង់ទ្វារទឹកត្រឹមត្រូវនៅពេលនោះ។
លោកបន្តថា ដោយសារមើលឃើញពីទុក្ខលំបាកបែបនេះ នៅឆ្នាំ២០១៤ អាជ្ញាធរជាតិអប្សរា បានស្ដារនិងសាងសង់ប្រព័ន្ធធារាសាស្ដ្រមួយចំនួនក្នុងភូមិសាស្ដ្រនេះ ហើយចាប់ពីពេលនោះមកពុំមានទឹកជំនន់ជន់លិចទៀតឡើយ ហើយការចាប់ផ្ដើមការដ្ឋាននៅពេលនេះ អាជ្ញាធរជាតិអប្សារារំពឹងថា នឹងជួយសម្រួលដល់ការរស់នៅ និងបង្កបង្កើនផលដំណាំដល់អ្នកភូមិនគរក្រៅប្រមាណជាង៣០០គ្រួសារ។
ឯកឧត្តម យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានមានប្រសាសន៍ថា អាជ្ញាធរជាតិអប្សរាគឺមានការងារជាច្រើនដែលត្រូវបំពេញ ដើម្បីជួយដល់វិស័យទេសចរណ៍ក្នុងខេត្តសៀមរាប ជាពិសេសគឺការងារអភិរក្ស និងអភិវឌ្ឍន៍រមណីយដ្ឋានអង្គរ ព្រោះនេះជាការងារស្នូលដ៏សំខាន់ៗដើម្បីលើកកម្ពស់ដល់ការរស់នៅរបស់អ្នកស្រុកអង្គរ ដូចជាការងារសង់ទ្វារទឹក ស្ពាន ផ្លូវ និងស្ដារប្រព័ន្ធធារាសាស្ដ្រផ្សេងៗ។ល។
ឯកឧត្តម យិត ចាន់ដារដ្ឋ ក៏បានសម្ដែងនូវអារម្មណ៍សប្បាយរីករាយ និងចូលរួមអបអរសាទរ ចំពោះសមិទ្ធផលដែលសម្រេចបានកន្លងមក ក្នុងភូមិនគរក្រៅ ដែលទទួលបានពីអាជ្ញាធរជាតិអប្សរា ជាពិសេសការបើកការដ្ឋាននៅពេលនេះ វានឹងចូលរួមបម្រើផលប្រយោជន៍យ៉ាងទូលំទូលាយដល់ប្រជាពលរដ្ឋក្នុងមូលដ្ឋាន ពិសេសបញ្ជៀសពីហានិភ័យផ្សេងៗដែលកើតឡើងពីការជន់លិចនារដូវវស្សា ក៏ដូចជាជួយស្ទាក់ទឹកសម្រាប់បង្កបង្កើនផលដំណាំរបស់បងប្អូននៅទីនេះផងដែរ៕
អត្ថបទ និង រូបភាព ៖ ម៉ាត់ អារ៉ាហ្វីន
