នៅព្រឹកថ្ងៃទី២៤ កក្កដា ឆ្នាំ២០១៩នេះ ព្រះសង្ឃរួមនឹងពុទ្ធបរិស័ទប្រមាណ៣៥០អង្គ/នាក់ បានចូលរួមដាំកូនឈើចំនួន៥ពាន់ដើមក្នុងរមណីយដ្ឋានអង្គរ ដែលស្ថិតនៅភូមិលាងដៃ ឃុំលាងដៃ ស្រុកអង្គរធំ ឬនៅខាងកើតប្រាសាទប្រី ដើម្បីឆ្លើយតបទៅនឹងការអំពាវនាវរបស់អាជ្ញាធរជាតិអប្សរា ដោយឱ្យសាធារណជនចូលរួមដាំកូនឈើក្នុងរមណីយដ្ឋានអង្គរក្នុងបុព្វហេតុរួមគ្នាអភិរក្សនិងអភិវឌ្ឍន៍រមណីយដ្ឋានអង្គរប្រកបដោយចីរភាព។
លោក ឡុង កុសល ប្រធាននាយកដ្ឋានផ្សព្វផ្សាយ តំណាងអគ្គនាយកអាជ្ញាធរជាតិអប្សរា បានឲ្យដឹងថា ការចូលរួមនៅពេលនេះ គឺបង្ហាញឱ្យច្បាស់ពីការឈឺឆ្កាលរបស់សាធារណជន ក្នុងន័យថែរក្សាកេរមរតកដ៏ផូរផង់របស់ដូនតាខ្មែរ។
លោកបន្ថែមថា ព្រៃឈើមានសារសំខាន់ណាស់ក្នុងការងារអភិរក្សនិងជួសជុលប្រាសាទ ដ្បិតវាមានទំនាក់ទំនងទៅនឹងទឹកក្រោមដី ដែលទឹកក្រោមដីនេះជាផ្នែកមួយដ៏សំខាន់ក្នុងការទ្រទ្រង់គ្រឹះប្រាសាទ។
លោកស្រី សៀង ចាន់ហេង អគ្គនាយកក្រុមហ៊ុន ហេងអភិវឌ្ឍន៍ ដែលផ្តួចផ្តើមរៀបចំកម្មវិធីដាំកូនឈើជាមួយអាជ្ញាធរជាតិអប្សរា និងវត្តអង្គរខាងត្បូង ចាត់ទុកការដាំកូនឈើនៅនេះថាមានសារសំខាន់ណាស់ក្នុងនាមជាប្រជាពលរដ្ឋមួយរូបដែលរួមចំណែកជាមួយរាជរដ្ឋាភិបាលក្នុងការធ្វើយ៉ាងណាឱ្យបរិស្ថានមានភាពស្រស់បំព្រង និងជាកេរមរតកដល់កូនចៅជំនាន់ក្រោយ។
ជាមួយគ្នានេះ លោកស្រី សៀង ចាន់ហេង ក៏អំពាវនាវដ៏ប្រជាពលរដ្ឋដទៃទៀត ត្រូវចូលរួមដាំកូនឈើទាំងអស់គ្នា ដោយម្នាក់ត្រូវដាំកូនឈើមួយដើម ហើយនៅពេលពលរដ្ឋ១៤លាននាក់ដាំកូនឈើ១៤លានដើម នោះនឹងជួយឱ្យបរិស្ថានក្នុងប្រទេសកម្ពុជាកាន់តែមានភាពស្រស់បំព្រងបន្ថែមទៀត ។
សូមបញ្ជាក់ថា កូនឈើដែលត្រូវដាំនៅថ្ងៃនេះសរុបមានចំនួន៥ពាន់ដើម ដែលក្នុងនោះរួមមាន គ្រញូង ១,៧០០ដើម ឈើទាល ១,៥០០ដើម ធ្នង់ ១០០ដើម គគីរ ១,៥០០ដើម ច្រេស ១០០ដើម និងពពេល ១០០ដើម ចំណែកការចែកចាយទៅដល់សាធារណជនយកទៅដាំនៅតំបន់ផ្សេងៗ សរុបមានចំនួន ៤៣,៥៣៧ដើម ក្នុងនោះរួមមាន ឈើគ្រញូង ១១,៦៨០ដើម ធ្នង់ ៥,៣៧៥ដើម បេង ២,៧២៥ដើម នាងនួន ៦៣០ដើម ឈើទាល ៥,៧៧៤ដើម គគីរ ៨,៦៨១ដើម និងរំដួល ៨២៥ដើម។
បើតាមរបាយការណ៍របស់នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា ចាប់ពីថ្ងៃទី១ មករា រហូតដល់ថ្ងៃទី២៣ កក្កដា ឆ្នាំ២០១៩នេះ អាជ្ញាធរជាតិអប្សរាសហការដាំកូនឈើជាមួយសាធារណជនបានចំនួន ១៥,៣០៧ដើមហើយ ដោយក្នុងនោះមានគ្រញូង ២,៩៩០ដើម ធ្នង់៧៥០ដើម បេង ៥៥០ដើម ឈើទាល ៣,៧៥២ដើម គគីរ១,០០០ដើម និងកកោះ៥១០ដើម ៕
អត្ថបទ និងរូបភាព ៖ ម៉ាត់ អារីហ្វីន
