លោកវរសេនីយ៍ទោ ធាវ ច័ន្ទដារ៉ា ប្រធានការិយាល័យគ្រឿងញៀន នៃកងរាជអាវុធហត្ថខេត្តសៀមរាប បានឲ្យដឹងថា ជនសង្ស័យចំនួន១៣នាក់ និងវត្ថុតាងមានគ្រឿងញៀនជាង ១គីឡូក្រាម ត្រូវបានកម្លាំងកងរាជអាវុធហត្ថខេត្ត បញ្ជូនមកកាន់តុលាការខេត្ត នៅរសៀលថ្ងៃទី២៣ ខែកក្កដា ឆ្នាំ២០១៩ម្សិលមិញនេះ ។
លោកធាវ ច័ន្ទដារ៉ា បានឲ្យដឹងទៀតថា ជនសង្ស័យទី១. ឈ្មោះ ប៉ែន ធា ភេទប្រុស អាយុ៣៤ឆ្នាំ ឃាត់ខ្លួនបាននៅយប់ថ្ងៃទី១៩ ខែកក្កដា នឹងបានវត្ថុតាងថ្នាំញៀនម៉ាទឹកកក ចំនួន ១៣៥.២០០ក្រាម ជញ្ជីងថ្លឹងគ្រឿងញៀន ចំនួន១គ្រឿងនិងដាវសាម៉ូរ៉ៃ ចំនួន២ដើម ។
បន្ទាប់ពីចាប់ខ្លួនឈ្មោះប៉ែន ធា បានកកម្លាំងសមត្ថកិច្ចបានបន្តទៅឃាត់ខ្លួន បក្ខពួកចំនួន១១នាក់ផ្សេងទៀត ហើយកម្លាំងសមត្ថកិច្ចក៏បានបើកប្រតិបត្តិការដល់រាជធានីភ្នំពេញចាប់ឃាត់ខ្លួនជនសង្ស័យម្នាក់ទៀតឈ្មោះ ឡេះ សាលី ភេទប្រុសអាយុ៣៥ឆ្នាំ ស្ថិតនៅភូមិ២ សង្កាត់ជ្រោយចង្វា រាជធានីភ្នំពេញ ដោយចាប់យកបានថ្នាំញៀនម៉ាទឹកក ចំនួន៣០០ក្រាម ថែមទៀត និងទូរស័ព្ទដៃចំនួន២គ្រឿង និងឧបករណ៍ប្រើប្រាស់មួយចំនួន។
បន្ទាប់ពីចាប់ឃាត់ខ្លួន និងប្រមូលវត្ថុតាំងរួចមក បច្ចុប្បន្នជនសង្ស័យ ទាំង១៣ នាក់ និងវត្ថុតាង ត្រូវបានកម្លាំងកងរាជអាវុធហត្ថខេត្ត បញ្ជូនមកកាន់តុលាការខេត្តហើយ នៅរសៀលថ្ងៃទី២៣ ខែកក្កដា ឆ្នាំ២០១៩ ដើម្បីចាត់ការតាមនិតិវិធីច្បាប់៕
អត្ថបទ និង រូបភាព ៖ ជា ស្រស់, ខេង ឧត្តម
កែសម្រួល៖ អ៊ុន ណារាជ្យ
