នៅថ្ងៃទី២២ ខែកក្កដានេះ នៅវេលាម៉ោងប្រមាណ២រសៀល កម្លាំងសមត្ថកិច្ចចម្រុះ រួមមានការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប បានសហការជាមួយកម្លាំងជំនាញមន្ទីរកសិកម្មខេត្តសៀមរាប ក្រោមការដឹកនាំសម្របសម្រួលពីលោក ស្រេង វុទ្ធា ព្រះរាជអាជ្ញារងអមសាលាដំបូងខេត្តសៀមរាប បានចុះត្រួតពិនិត្យឃ្លាំងលាយផ្សំ និងវេចខ្ចប់ជីកសិកម្មគ្មានច្បាប់អនុញ្ញាត នៅទីតាំងដីឡូត៍មួយកន្លែងស្ថិតក្នុងភូមិក្រសាំង សង្កាត់ជ្រាវ ក្រុងសៀមរាប ។
ក្នុងរបាយការណ៍ សមត្ថកិច្ចចម្រុះបានបង្ហាញថា ឃ្លាំងមួយនេះ បានធ្វើសកម្មភាពខុស រយ:ពេលប្រហែល០៦ខែកន្លងមកហើយ ក្នុងនោះរកឃើញវត្ថុតាងមានដូចខាងក្រោម៖
១. ជីទឹក
– ជីទឹកលាយរួច (root grow) ចំនួន១០៤កេស ស្មើនឹងទំងន់២.០៨ តោន
– ជីទឹកលាយរួច (aminovango) ចំនួន ២០កេស ស្មើនឹងទំងន់០.៦ តោន
– មេជីទឹកមិនទាន់ច្រក ចំនួន61ធុង ស្មើនឹងទំងន់១២.២ តោន
– សំបកដបមិនទាន់ច្រក ១លីត្រ ស្មើនឹង៨៤០០ដប
– សំបកដបមិនទាន់ច្រក ៥លីត្រ ស្មើនឹង១២០០ដប
– សំបកកេស ចំនួន ១៥២០កេស
២. ជីគោក
– ជីគោក ជាជីកំបុសមិនទាន់សម្រេច = ២២៧ការ៉ុង ស្មើនឹងទំងន់៥.៦៩៥តោន
– ជីច្រកការ៉ុងរួចម៉ាក(Famous Organic) ចំនួន ១០ការ៉ុង ស្មើនឹងទំងន់ ០៥ តោន
– សំបកការ៉ុងបោះពុម្ពរួច សំរាប់ច្រកជីមានចំនួន៥២០០សំបក។
៣. ម៉ាស៉ីនសម្រាប់លាយផ្សំវេចខ្ចប់និងផលិតជីកសិកម្មចំនួន០៨គ្រឿង។
វត្ថុតាងទាំងអស់ខាងលេីត្រូវបានសមត្ថកិច្ចចម្រុះ ធ្វេីកំណត់ហេតុ ឃាត់រក្សាទុកក្នុងឃ្លាំង និងបិទទីតាំងបណ្តោះអាសន្ន ហេីយធ្វេីកិច្ចសន្យាឲ្យម្ចាស់ឈ្មោះ ឌិន កែវ ភេទប្រុស អាយុ៥១ឆ្នាំ មានទីលំនៅបច្ចុប្បន្ននៅភូមិគ្រួស សង្កាត់ស្វាយដង្គុំ ក្រុងសៀមរាប ដើម្បីចូលខ្លួនទៅកាន់មន្ទីរកសិម្មខេត្តសៀមរាប ក្នុងការអនុវត្តទៅតាមនីតិវិធីច្បាប់ ស្តីពីការគ្រប់គ្រងថ្នាំកសិកម្ម និងជីកសិកម្ម របស់ព្រះរាជាណាចក្រកម្ពុជា ។
សូមជម្រាបជូនថា គិតត្រឹមពាក់កណ្តាលឆ្នាំ២០១៩នេះ សមត្ថកិច្ចជំនាញ ក្នុងខេត្តសៀមរាប បានចុះបង្ក្រាបបទល្មើសជាច្រើនករណី មានដូចជា÷ ករណីនាំប្រាក់ដុល្លារអាមេរិចច្រើនរាប់លានដុល្លារ ចូលព្រះរាជាណាចក្រកម្ពុជា តាមច្រកព្រលានយន្តហោះអន្តរជាតិខេត្តសៀមរាប ករណីជនជាតិចិនជម្រិតទារប្រាក់តាមអ៊ីនធើណិត ការបង្ក្រាបករណីដឹកឈើខុសច្បាប់ ឃ្លាំងស្តុកឈើខុសច្បាប់ជាច្រើនកន្លែង រួមនិងបទល្មើសនេសាទជាច្រើនករណី ។ល។
ព័ត៌មានជាតិ ថ្មីៗ
អត្តបទនិងរូបភាព៖ថាច់ ពិសុទ្ធ
