អនុវតតាមបទបញ្ជារបស់ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខត្តសៀមរាប កាលពីពេលថ្មីៗកន្លងទៅនេះ កម្លាំងសមត្ថកិច្ចចម្រុះខេត្តសៀមរាប រួមមាន រដ្ឋបាលស្រុកពួក , នគរបាលសេដ្ឋកិច្ចនៃស្នងការដ្ឋាននគរបាលខេត្ត , មន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច , មន្ទីរបរិស្ថានខេត្ត , មន្ទីរកសិកម្ម រុក្ខាប្រមាញ់ និងនេសាទ ខេត្ត និងសមត្ថកិច្ចពាក់ព័ន្ធ បានចុះប្រតិបត្តិការបង្ក្រាបបទល្មើសនេសាទ នៅតំបន់បឹងទន្លេសាបក្នុងភូមិសាស្ត្រភូមិពាមតាអួរ ឃុំកែវពណ៌ ស្រុកពួក ក្នុងរដូវបិទនេសាទ ជាលទ្ធផល ដកហូតវត្ថុតាងបានរួមមាន : ឧបករណ៍បរចំនួន២៤គ្រឿង , របាំងសាច់អួនប្រវែង ៣.៣០០ម៉ែត្រ , ចំរឹងចំនួន១.១៥០ចំរឹង និង បានព្រលែងត្រីចំនួន ៦៧គីឡូក្រាម ។
ក្នុងឱកាសនោះ អាជ្ញាធរខេត្ត បានអំពាវនាវដល់បងប្អូនប្រជាពលរដ្ឋដែលជាប្រជានេសាទទាំងអស់ សូមកុំប្រើប្រាស់ឧបករណ៍នេសាទផ្ទុយពីច្បាប់កំណត់ ជៀសវាងអាជ្ញាធរមានសមត្ថកិច្ចចុះបង្ក្រាបមានការខាតបង់ ពិសេសធ្វើឲ្យខូចប្រយោជន៍សេដ្ឋកិច្ចគ្រួសារ ជាពិសេសយេីងត្រូវរក្សាត្រីក្នុងរដូវត្រីពងនេះ ដេីម្បីឲ្យធនធានជលផលកាន់តែសម្បូរឡើងវិញ ៕
អត្ថបទ និង រូបថត : លោក គឿន វេត
កែសម្រួលអត្ថបទ : លោក លីវ សាន្ត
