ចាប់ផ្តើមពីថ្ងៃទី០១ ខែសីហា នេះតទៅ អាជ្ញាធរជាតិអប្សរា នឹងបញ្ឈប់ប្រត្តិការចំណតរថយន្តជាបណ្ដោះអាសន្ននៅខាងមុខប្រាសាទអង្គរវត្ត នេះបើតាមសេចក្ដីជូនដំណឹងរបស់អាជ្ញាធរជាតិអប្សរា ចុះថ្ងៃទី១៨ កក្កដា ឆ្នាំ២០១៩។
ក្នុងសេចក្ដីជូនដំណឹងនេះដដែល បានបញ្ជាក់ថា ចំពោះចំណតរថយន្តថ្មី គឺមានទីតាំងនៅផ្នែកខាងលិច ដែលនៅជិតចំណតរថយន្តដែលបានផ្អាកដំណើរការនេះ។
ចំពោះទីតាំងចំណតរថយន្តខាងមុខប្រាសាទអង្គរវត្ត ដែលរងការខូចខាតនេះ នឹងត្រូវរៀបចំជាកន្លែងដាំកូនឈើឡើងវិញ ដោយរក្សាមួយផ្នែកនៃទីតាំងនេះសម្រាប់ប្រើប្រាស់ជាចំណតរបស់រ៉ឺម៉កកង់បី។
ហេតុដូច្នេះ អាជ្ញាធរជាតិអប្សរា ស្នើឱ្យស្ថាប័នពាក់ព័ន្ធ មគ្គុទ្ទេសទេសចរណ៍ និងសាធារណជនជាដើម ជ្រាបពីព័ត៌មាននេះ និងចូលរួមអនុវត្តទាំងអស់គ្នា។
គួរបញ្ជាក់ថា ចំណតរថយន្តនៅមុខប្រាសាទអង្គរវត្តនេះ កន្លងមកមានការរិះគន់ពីសាធារណជនជាញឹកញាប់ ដោយសារក្នុងចំណតនេះរងការខូចខាត និងធ្វើឱ្យមានជង្ហុកបែកភក់ជារឿយៗ ពិសេសនារដូវវស្សា។ អាជ្ញាធរជាតិអប្សរាបានទទួលស្គាល់ចំណុចនេះ តែថាគ្រោងនឹងអភិវឌ្ឍន៍នាពេលឆាប់ៗខាងមុខនេះ អាស្រ័យលើកញ្ចប់ថវិកា និងពេលវេលានៃការអភិវឌ្ឍ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក សេង ផល្លី
