កាលពីរសៀលថ្ងៃ ថ្ងៃទី១៨ ខែកក្កដា ឆ្នាំ២០១៩ម្សិលមិញនេះ សិស្សានុសិស្ស នៃសាលាវេសស្ទើនអន្តរជាតិ សាខាសៀមរាប ចំនួន ០៨នាក់ ដែលបានប្រឡងជាប់អាហារូបករណ៍កម្រិតខ្លី ពីសាកល វិទ្យាល័យជីជីសស្ទើរប្រទេសអង់គ្លេស បានចេញដំណើរឆ្ពោះទៅកាន់ទីក្រុងជីជិសស្ទើប្រទេសអង់គ្លេស ក្នុងរយៈពេល១០ថ្ងៃ ចាប់ពីថ្ងៃទី ១៨ដល់ថ្ងៃទី២៨ខែកក្កដាឆ្នាំ២០១៩ ដើម្បីបំពេញទស្សនៈកិច្ចសិក្សា ដោយមានការសហការ និងសម្របសម្រួលគាំទ្រធនធានថវិកាទាំងការស្នាក់នៅនិងការធ្វើដំណើរ ពីសាកលវិទ្យាល័យ ជីជិស ស្ទើ និងសាលាវេសស្ទើនអន្តរជាតិសាខាសៀមរាប និងបានការចូលរួមថវិកាបដិភាគរបស់មាតាបិតាអាណាព្យាបាលសិស្សផងដែរ សម្រាប់ការទស្សនៈកិច្ចសិក្សានេះ ។
លោកសាស្ត្រាចារ្យ រ័ត្ន រស្មី នាយកសាលាស្ទើនអន្តរជាតិ សាខាសៀមរាប ដែលជាអ្នកដឹកនាំផ្ទាល់ បានមានប្រសាសន៍ឲ្យដឹងនៅព្រលានយន្តហោះអន្តរជាតិសៀមរាបថា នេះជាលើកទី២ហើយ ដែល គណៈគ្រប់គ្រងសាលាបានរៀបចំដំណើរទស្សនៈកិច្ចសិក្សាទៅកាន់ប្រទេសអង់គ្លេស ដើម្បីផ្តល់ឱកាសដល់សិស្ស បានសិក្សាស្វែងយល់ និងផ្លាស់ប្ដូរបទពិសោធន៍គ្នាទៅវិញទៅមករវាងក្រុមសិស្សានុសិស្សនៃសាលាវេសស្ទើន ជាមួយសាកលវិទ្យាល័យជីជិសស្ទើ ហើយ សិស្សដែលមានវត្តមានទៅនេះសុទ្ឋតែជាសិស្សរៀនសូត្រពូកែៗទាំងចំណេះដឹងភាសាខ្មែរ និងភាសាអង់គ្លេស មានសីលធម៌ និងអាកប្បកិយាមារយាទល្អ ហើយពួកគាត់ត្រូវបានជ្រើសរើសចេញពីចំណោមសិស្សទូទៅដោយគណៈគ្រប់គ្រងសាលាយ៉ាងសុក្រិតទៀតផង ។
លោក រ័ត្ន រស្មី បញ្ជាក់ទៀថា កម្មវិធីទស្សនៈកិច្ចសិក្សានេះធ្វើឡើងទៅតាមផែនការដែលបានគ្រោងទុក ដើម្បីលើកទឹកចិត្តដល់សិស្សដែលរៀនពូកែ មានឆន្ទៈពុះពារតស៊ូ ខិតខំប្រឹងប្រែងសិក្សារៀនសូត្រ រហូតទទួលបានលទ្ឋផលល្អទើបគាត់ទទួលបានឱកាសបានទៅ សម្រាប់ពួកគាត់ស្វែងយល់ពីបទពិសោធន៍ របៀបរបបរស់នៅរបស់ប្រទេសជឿនលឿន ជាទុនសម្រាប់រៀបចំ និងកសាងអនាគតរបស់ពួកគាត់ឱ្យកាន់តែមានប្រសិទ្ឋភាព ជាពិសេសទស្សនកិច្ចសិក្សានេះ ក៏ជាប្រភពគន្លឹះមួយ ជួយឱ្យគុណភាពនៃការគ្រប់គ្រង និងការអប់រំនៅក្នុងសាលាកាន់តែមានភាពល្អប្រសើរឡើងថែមទៀតផងដែរ ។
សូមជំរាបថា កាលពីឆ្នាំ២០១៨ សិស្សានុសិស្សនៃសាលាវេសហ្គេតអន្តរជាតិ ចំនួន ១៤នាក់ ដែលបានប្រឡងជាប់អាហារូបករណ៍កម្រិតខ្លីពីសាកលវិទ្យាល័យជីជីសស្ទើរប្រទេសអង់គ្លេស បានចេញដំណើរឆ្ពោះទៅកាន់ទីក្រុងជីជិសស្ទើប្រទេសអង់គ្លេសជាលើកដំបូង រយៈពេល១០ថ្ងៃចាប់ពីថ្ងៃទី១៩ដល់ថ្ងៃទី២៩ខែកក្កដាឆ្នាំ២០១៨ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
