កាលពីព្រឹកថ្ងៃទី១៨ ខែកក្កដា ឆ្នាំ២០១៩ម្សិលមិញនេះ ក្រុមការងារថ្នាក់ជាតិចុះជួយស្រុកអង្គរជុំ បើកវេទិកាសាធារណៈលើកដំបូងសម្រាប់រាជរដ្ឋាភិបាលកម្ពុជាអាណត្តិទី៦ ស្តីពីការអនុវត្តន៍កម្មវិធីនយោបាយ និងយុទ្ឋសាស្ត្រចតុកោណរបស់រាជរដ្ឋាភិបាលកម្ពុជាដំណាក់កាលទី៤ នៅក្នុងបរិវេណវត្តស្វាយជ្រុំ ឃុំតាសោម ក្នុងគោល បំណងផ្សព្វផ្សាយឱ្យបានទូលំទូលាយនូវកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល ផែនការយុទ្ធសាស្ត្រអភិវឌ្ឍន៍ជាតិ និងគោលនយោបាយភូមិឃុំមានសុវត្ថិភាព លើកកម្ពស់ការទទួលខុសត្រូវរបស់រដ្ឋបាលស្រុក – ឃុំ តាមរយៈការប្រតពិនិត្យតាមដាន និងគាំទ្រការអនុវត្តកម្មវិធីគម្រោង និងផែនការសកម្មភាពនានានៅមូលដ្ឋាន ស្តាប់នូវក្ដីកង្វល់ទទួលយកនូវសំណូមពរ និងសំណើនានារបស់ប្រជាពលរដ្ឋ ដើម្បីពិនិត្យពិភាក្សា និងដោះស្រាយ ។
វេទិកាសាធារណៈនេះ បានប្រព្រឹត្តទៅ ក្រោមអធិបតីភាពឯកឧត្តម តែ គុយស៊ាង រដ្ឋលេខាធិការក្រសួងសុខាភិបាលនិងជាប្រធានក្រុមការងារថ្នាក់ជាតិចុះជួយស្រុកអង្គរជុំ ដោយមានការចូលរួមពីសំណាក់ឯកឧត្ដម លោក លោកស្រី ជាសមាជិក សមាជិកាក្រុមការងារ អាជ្ញាធរមូលដ្ឋានស្រុក ឃុំ និងប្រជាពលរដ្ឋក្នុងមូលដ្ឋាន សរុបជាង៣០០នាក់។
លោក លុក ផុស អភិបាលស្រុកអង្គរជុំ មានប្រសាសន៍ថា វេទិកានេះ គឺមានសារៈសំខាន់ណាស់ សម្រាប់លើកកម្ពស់គណនេយ្យភាព តម្លាភាព ការឆ្លើយតបនឹងការចូលរួមរបស់ប្រជាពលរដ្ឋ ក្នុងកិច្ចដំណើរការអភិបាលកិច្ចរបស់រដ្ឋបាលស្រុក-ឃុំ ជាការផ្សាភ្ជាប់ទំនាក់ទំនងរវាងរដ្ឋបាលស្រុក ឃុំ ជាមួយប្រជាពលរដ្ឋ និងជំរុញឱ្យមានការចូលរួម និងបង្កើនភាពស្និទស្នាលរវាងអ្នកផ្តល់សេវាសាធារណៈ និងបងប្អូនប្រជាពលរដ្ឋឱ្យកាន់តែមានភាពល្អប្រសើរឡើង។
ឯកឧត្តមតែ គុយ ស៊ាង មានប្រសាសន៍ថា វេទិកានេះ ជាយន្តការថ្មីមួយរបស់រាជរដ្ឋាភិបាលអាណត្តិទី៦ ដែលទាមទារឱ្យយើងធ្វើការរួមគ្នាដោយមិនប្រកាន់និន្នាការនយោបាយ ពណ៌សម្បុរអ្វីឡើយ ដូច្នេះ សុំឲ្យប្រជាពលរដ្ឋនៅទីនេះ ឱ្យចូលរួមសហការអនុវត្តឱ្យបានសកម្ម នូវគោលនយោបាយភូមិឃុំមានសុវត្ថិភាព រួមគ្នាគោរពច្បាប់ចរាចរណ៍ រួមគ្នាទប់ស្កាត់និងបង្ក្រាបឱ្យបាន ការជួញដូរនិងប្រើប្រាស់ គ្រឿងញៀន ជាពិសេស មាតាបិតា អាណាព្យាបាលត្រូវតាម ដាន ឃ្លាំមើលឱ្យបានជាប្រចាំពីអាកប្បកិរិយា កូនចៅរបស់ខ្លួន ដើម្បីឱ្យពួកគាត់ចេញចេញពីគ្រឿងញៀន និងបើសង្ស័យ ឬឃើញថាពួកគាត់ប្រើប្រាស់គ្រឿងញៀន ត្រូវសហការផ្តល់ដំណឹងដល់សមត្ថកិច្ចមូលដ្ឋាន ដើម្បីមានវិធានការនាំទៅមជ្ឈមណ្ឌលអប់រំ និងបន្សាបគ្រឿងញៀនឱ្យបានទាន់ពេលវេលា ពួកគាត់គឺពុំមានទោសពៃរ៍អីទេ ព្រោះថាអ្នកប្រើប្រាស់គ្រឿងញៀន គឺជាជនរងគ្រោះ ភាគច្រើនអ្នកប្រើប្រាស់គ្រឿងញៀន ក៏រួមចំណែកបង្កគ្រោះថ្នាក់ចរាចរណ៍ផងដែរ មិនតែប៉ុណ្ណោះវាបានបំផ្លាញសុខភាព និងបំផ្លាញអនាគតអ្នកដែលប្រើប្រាស់ នាំឱ្យខាតបង់ថវិកាគ្រួសារ និងថវិកាជាតិច្រើនឥតគណនា ជាពិសេសនាំឱ្យសង្គមយើងបាត់បង់ធនធានមនុស្សទៀតផង ។
ឯកឧត្តម តែ គុយស៊ាង មានប្រសាសន៍ទៀតថា ក្នុងនាមថ្នាក់ដឹកនាំក្រសួងសុខភិបាល សូមឲ្យបងប្អូនប្រជាពលរដ្ឋត្រូវប្រុងប្រយ័ត្នចំពោះជំងឺគ្រុនឈាមដែលបង្កឡើងដោយមូសខ្លាញី និងជំងឺគ្រុនចាញ់ដែលបង្កឡើងដោយមូសខាំ ដោយត្រូវរស់នៅស្អាត ហូបស្អាត ផឹកស្អាត និងនាំគ្នាលុបបំបាត់ជំរកមូស តាមរយៈការបោសសំអាតបរិស្ថានជុំវិញលំនៅដ្ឋាន លុបបំបាត់កន្លែងដក់ទឹក មានសំបកកំប៉ុង និងសំបកកង់ឡានម៉ូតូចាស់ៗដែលនៅក្បែរលំនៅដ្ឋាន ត្រូវតែបំផ្លាញចោល ព្រោះវាជាជំរកផ្តល់កន្លែងឱ្យមូសបង្កកំណើត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
