រដ្ឋមន្ត្រីក្រសួងព័ត៌មាន ឧបត្ថម្ភថវិកាផ្ទាល់ខ្លួន ចំនួន ៧ ៥០០ ដុល្លារ សម្រាប់ទិញកង្ហាបំពាក់ក្នុងបន្ទប់សិក្សា ក្នុងវិទ្យាល័យ ជីហែ ភូមិផ្សារថ្មី ឃុំ ពាមប្រធ្នោះ ស្រុកកោះសូទិន ខេត្តកំពង់ចាម ដើម្បីជាការលើកកម្ពស់ការសិក្សាសិស្សានុសិស្ស ឲ្យកាន់តែមានគុណភាពបន្ថែមទៀត។
មានវត្តមាន នៅមន្ទីរព័ត៌មាន ខេត្តកំពង់ចាម ថ្ងៃទី ១៨ ខែកក្កដា ឆ្នាំ ២០១៩ ឯកឧត្តម រដ្ឋមន្ត្រី ខៀវ កាញារីទ្ធ និងលោកជំទាវ ឯកឧត្តមរដ្ឋមន្ត្រីបានសន្យាថា ក៏នឹងផ្ដល់ជូននូវម៉ាស៊ីនត្រជាក់ ដើម្បីបំពាក់នៅក្នុងបណ្ណាល័យ និងបន្ទប់ប្រជុំ ក្នុងវិទ្យាល័យជីហែ នៅពេលដំណើរការជួសជុលអាគារចប់រួចរាល់នាពេលខាងមុខនេះផងដែរ ។
នៅក្នុងឱកាសនោះ លោក ស៊ុយ ច័ន្ទរិទ្ធិ នាយកវិទ្យាល័យជីហែ បាន សម្ដែងនូវការអរគុណយ៉ាងជ្រាលជ្រៅ ចំពោះ ឯកឧត្តម ខៀវ កាញារីទ្ធ និងលោក ជំទាវ ដែលបានផ្តល់នូវថវិកា សម្រាប់ទិញកង្ហា ដាក់តាមបន្ទប់រៀន នៅក្នុងវិទ្យា ល័យជីហែ ស្រុកកោះសូទិន ខេត្តកំពង់ចាម ដើម្បីឲ្យសិស្សានុសិស្ស កំពុងរៀន មានខ្យល់អាកាសត្រជាក់ និងមានសុខភាពល្អ ដែលជាការចូលរួម ចំណែកពង្រឹង និងលើកកម្ពស់គុណភាពវិស័យអប់រំ ក្នុងស្រុកកោះសូទិន ខេត្តកំពង់ចាម កាន់តែរីកចម្រើនទ្វេរឡើងថែម។
គួរបញ្ជាក់ដែរថា សាលប្រជុំ រួមជាមួយ បណ្ណាល័យ ក្នុងវិទ្យាល័យជីហែ ត្រូវបាន មូលនិធិ គីណាល់ បានប្រមូលជាថវិកា ពីអតីតសិស្ស វិទ្យាល័យជីហែ និងបណ្តាសប្បុរសជន នានា ទាំងក្នុង និងក្រៅប្រទេស ដើម្បីយកជួយជួសជុល ឡើងវិញ ចំពោះអគារសិក្សា ដែលមានសភាពចាស់ទ្រុធទ្រោម ត្រូវបាន សម្តេចវិបុលភក្តី សាយ ឈុំ ប្រធានព្រឹទ្ធសភា ផ្តល់ថវិកា ក្នុងការជួសជុលឡើងវិញផងដែរ ដើម្បីឲ្យសិស្សានុសិស្ស មានអគារចូលរៀនសូត្រ បានសមរម្យ ៕
អត្ថបទ និង រូបភាព ៖ ក្រសួងព័ត៌មាន
