នៅថ្ងៃទី១៩ខែកក្កដានេះ ផ្សារម៉ាក្រូខេត្តសៀមរាបបានរៀបចំធ្វើបទបង្ហាញស្តីអំពីអត្ថប្រយោជន៍នៃត្រីសាម៉ុន ដោយមានការអញ្ជើញចូលរួមពីចុងភៅ ដែលមានស្នាដៃ និងកំពុងបម្រើការនៅតាមបណ្តា សណ្ឋាគារ និងភោជនីយដ្ឋាននានាក្នុងខេត្តសៀមរាប ប្រមាណជាង២០០នាក់ រួមនិងការធ្វើបទបង្ហាញដោយចុងភៅល្បីមកពីប្រទេសថៃ និងអ្នកជំនាញផ្នែកត្រីសាម៉ុន មកពីបរទេសផងដែរ។
នៅកម្ពុជាគេស្គាល់ត្រីសាម៉ុនតាមរយៈការបរិភោគឆៅជាមួយទឹកជ្រលក់ ឬទឹកស៊ីអ៊ីវ ហើយក្នុងសាច់របស់វាមានផ្ទុកសារធាតុចិញ្ចឹមសំបូរបែប ដូចជាប្រូតេអ៊ីន អូមេហ្គា៣ វិតាមីនA វីតាមីនD និងវីតាមីនB12 ។ ចំពោះការនាំចូលត្រីសាម៉ុន មកកម្ពុជា មានរយៈពេលបីថ្ងៃគិតពីថ្ងៃចាប់ និងការដឹកជញ្ជូនតាមយន្តហោះ ហើយជាធម្មតាទីផ្សារកម្ពុជាត្រូវត្រីសាម៉ុនក្នុងបរិមាណ ពីរតោនកន្លះក្នុងមួយសប្តាហ៍។
ក្នុងបទបង្ហាញរបស់ កញ្ញា ភ្លយប្រាផាក ចាវីវាតសាក់គុល (Phloipraphak Janvivatsakul) អ្នកគ្រប់គ្រងទីផ្សារមកពីប្រទេសថៃបានពន្យល់ថា សាច់ត្រីសាម៉ុនដែលដាក់លក់នៅក្នុងផ្សារម៉ាក្រូខេត្តសៀមរាបនេះ ត្រូវបាននាំចូលពីប្រទេសន័រវេស។ ត្រីនេះត្រូវបានគេចិញ្ចឹមតាមបែបធម្មជាតិ ដោយគេយកកូនទៅចិញ្ចឹមក្នុងទឹកសាបរយៈពេលមួយឆ្នាំកន្លះ ទើបផ្ទេរទៅទឹកប្រៃមួយឆ្នាំកន្លះទៀត រីឯចំណីគេបានកែច្នៃ ពីបន្លែធម្មជាតិ លាយជាមួយបង្គាសមុទ្រ រហូតដល់អាយុបាន៣ឆ្នាំ ទើបអាចចាប់យកមកលក់បាន។
អ្នកគ្រប់គ្រងទីផ្សារ រូបនេះ បានបញ្ជាក់បន្ថែមថា កម្រិតសីតុណ្ហភាពដែលត្រូវរក្សាទុកសាច់ត្រីសាលម៉ុនគឺចាប់ពី ២ទៅ៤អង្សារសេ ដែលអាចរក្សាទុកបានរហូតដល់១៤ថ្ងៃ តែលក្ខខណ្ឌល្អបំផុតសម្រាប់គុណភាព និងរសជាតរបស់វាមានត្រឹមតែរយៈពេល ៧ថ្ងៃប៉ុណ្ណោះ។ ចំពោះសាច់ត្រីដែលស្រស់ គឺគេត្រូវពិនិត្យលើស្រកីមានពណ៌ក្រហមព្រឿង សាច់មិនទន់ជ្រាយ ពេលយកដៃសង្កត់លើសាច់វា វានឹងលោតឡើងមកវិញ និងការដកឆ្អឹងមានភាពងាយស្រួលមិនតឹងពិបាក។
ស្ថាបនិកសមាគមចុងភៅកម្ពុជា លោក វិញ សាន បានចាប់អារម្មណ៍យ៉ាងខ្លាំងពីអត្ថប្រយោជន៍របស់ត្រីសាម៉ុន នៅក្នុងព្រឹត្តិការណ៍ពិព័រណ៌ម្ហូបអាហារសណ្ឋាគារ និងបដិសណ្ឋារកិច្ចអង្គរលើកទី២ខាងមុខនេះ សមាគមចុងភៅកម្ពុជា នឹងកែច្នៃយកសាច់ត្រីសាម៉ុនទៅធ្វើជាម្ហូបអាម៉ុកដែលជាមុខម្ហូបលក្ខណៈប្រពៃណីដ៍ពេញនិយមរបស់កម្ពុជា ក្នុងចំណោមមុខម្ហូបជាច្រើនទៀត។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
