សមាគមអ្នកនិពន្ធខ្មែរ ស្នើសុំអនុសាសន៍ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដើម្បីអនុវត្តន៍បន្តការងារសមាគមអ្នកនិពន្ធខ្មែរ បានជោគជ័យថ្មីៗ បន្តទៀត ក្នុងជំនួប នៅថ្ងៃទី ១៨ ខែកក្កដា ឆ្នាំ ២០១៩។
លោក ព្រឿង ប្រណីត សមាគមអ្នកនិពន្ធខ្មែរ បានជម្រាបជូនថា សមាគម នេះ មានអាសយដ្ឋាននៅក្នុង វត្តបទុមវតី សង្កាត់ចតុមុខ ខណ្ឌដូនពេញ រាជធានី ភ្នំពេញ។ សមាគមមានទស្សនវិស័យចង់ឃើញបញ្ញវន្តអ្នកនិពន្ធខ្មែរ បង្កើតឃ្លាំង ចំណេះដឹង និងគំនិតតាមរយៈស្នាដៃនិពន្ធរបស់ខ្លួន មានគោលដៅក្នុងការលើកកម្ពស់វប្បធម៌នៃការតែងនិពន្ធ ការស្រាវជ្រាវ និងចែករំលែកស្នាដៃនិពន្ធ ដើម្បីជា ប្រយោជន៍ដល់ការសិក្សា និងជាគតិសម្រាប់ប្រជាជនខ្មែរទូទៅ ជាពិសេសជា ប្រទីបសម្រាប់អ្នកនិពន្ធខ្មែរជំនាន់ក្រោយ។
បើតាមការបញ្ជាក់របស់ ថ្នាក់ដឹកនាំ សមាគមអ្នកនិពន្ធខ្មែរ សមាគមនេះ បាន បង្កើតឡើងតាំងពីឆ្នាំ ១៩៥៦ មកម្ល៉េះ ដោយមានថ្នាក់ដឹកនាំ ជាចាស់ទុំជាច្រើន ជំនាន់ ហើយមកដល់ជំនាន់ថ្មីនេះ ក៏ថ្នាក់ដឹកនាំនៅតែបន្តការងារផ្តោតជាសំខាន់ លើការសិក្សាស្រាវជ្រាវ ការតែងនិពន្ធ និង ការបង្កើតជាស្នាដៃថ្មីៗបន្ថែមទៀត។ ទន្ទឹមជាមួយនេះ ក្រុមការងាររបស់សមាគមអ្នកនិពន្ធខ្មែរ ក៏បានរៀបចំកិច្ចការងារកែសម្រូលអក្ខរាវិរុទ្ធខ្មែរ នៅតាមរយៈកម្មវិធី ដែលបានដាក់ឲ្យប្រើប្រាស់ក្នុងប្រពន្ធ័ INTERNET ដើម្បីជាភាពងាយស្រួល អ្នកចូលប្រើប្រាស់ទាញយកកម្មវិធី និងចូលរួមធ្វើឲ្យប្រជាពលរដ្ឋខ្មែរ ប្រើប្រាស់ពាក្យខ្មែរឲ្យបានត្រឹមត្រូវ តាមវចនានុក្រមសម្ដេចព្រះសង្ឃរាជ ជួន ណាត ។ នៅក្នុងឱកាសនោះដែរ ថ្នាក់ដឹកនាំ តាមជំនាញនីមួយៗ បានជម្រាបជូនពី សកម្មភាព ការងារសំនាន់ៗមួយចំនួន ដែលបានធ្វើកន្លងមក និងបន្តទៅខាងមុខទៀត ហើយក៏បានលើកពីគម្រោងធ្វើការបណ្តុះបណ្តាលអ្នកនិពន្ធ ការងារបោះពុម្ពសៀវភៅ ដែលជាស្នាដៃអ្នកនិពន្ធពីជំនាន់មុន ឡើងវិញឲ្យមានភាពងាយស្រួល អាន និងការកសាងស្នាដៃថ្មីៗ របស់អ្នកនិពន្ធជំនាន់ថ្មីនេះ ស្របតាមទីផ្សារក្នុងប្រទេស និងអន្តរជាតិ។
ឯកឧត្តម ខៀវ កាញារីទ្ធ បានសម្ដែងការកោតសរសើរចំពោះកិច្ចខិតខំ ប្រឹងប្រែង របស់ថ្នាក់ដឹកនាំ និង សមាជិកទាំងអស់ នៃសមាគមអ្នកនិពន្ធខ្មែរ ដែលបានរួមគ្នាថែរក្សានូវស្នាដៃរបស់អ្នកនិពន្ធជំនាន់មុនៗ មួយចំនួនបានស្ថិតស្ថេរ រហូតមកដល់បច្ចុប្បន្ននេះ ទុកសម្រាប់ឲ្យអ្នកជំនាន់ក្រោយបាន សិក្សា ស្រាវជ្រាវ រៀនសូត្រតាម រហូតបានបង្កើតជាស្នាដៃ តែងនិពន្ធ បានថ្មីៗជាច្រើន គួរជាទីមោទក។ តាមរយៈនេះដែរ ឯកឧត្តម រដ្ឋមន្ត្រី បានផ្តល់នូវមតិយោបល់មួយ ចំនួន ដល់ថ្នាក់ដឹកនាំ សមាគមអ្នកនិពន្ធខ្មែរ ដើម្បីធ្វើយ៉ាងណាឲ្យរាល់ ដំណើរការងារ បានទៅដោយរលូន ពិសេសជំរុញលើកទឹកចិត្ត ដល់អ្នកតែងនិពន្ធទាំងអស់ បន្តប្រឹងប្រែង បង្កើនសមត្ថភាព សិក្សាស្រាវជ្រាវចងក្រង ការតែងនិពន្ធ ឲ្យបានកាន់តែល្អបន្ថែមទៀត ដើម្បីទុកជាផលប្រយោជន៍ ដល់អ្នកអាន អ្នកស្រាវជ្រាវ សិក្សារៀនសូត្រ បានយល់ដឹង កាន់តែស៊ីជម្រៅថែមទៀត ។ ក្នុងឱកាសនោះ ឯកឧត្តម ខៀវ កាញារីទ្ធ បានឧបត្ថម្ភនូវថវិកាចំនួន ១លានរៀល ដើម្បីជាការលើកទឹកចិត្តដល់ដំណើរការងាររបស់ សមាគមអ្នកនិពន្ធខ្មែរ។
អត្ថបទ និង រូបភាព ៖ ក្រសួងព័ត៌មាន
