ក្នុងឱកាសបិទវគ្គបណ្តុះបណ្តាល គ្រូបឋមសិក្សា«១២+២» ជំនាន់ទី៣៦-៣៧ នៃសាលាគរុកោសល្យ និងវិក្រឹតការខេត្តសៀមរាប នាព្រឹកថ្ងៃទី១៩ ខែកក្កដា ឆ្នាំ២០១៩នេះ ឯកឧត្តម ទៀ សីហា អភិបាលខេត្តសៀមរាប បានថ្លែងណែនាំឲ្យប្អូនៗគរុសិស្ស ក្រោយបញ្ចប់វគ្គបណ្តុះបណ្តាលគ្រូបឋម ត្រូវធ្វើជាគ្រួសារគំរូ ជាឪពុកម្តាយទី២ ជាពុម្ព និងជាថ្នាលបណ្តុះបណ្តាលនូវធនធានមនុស្ស ប្រកបដោយគុណភាព និងប្រសិទ្ធភាព សម្រាប់ការស្តារ និងអភិវឌ្ឍន៍ប្រទេសជាតិ ឲ្យមានការរីកចម្រើន ។
ក្នុងឱកាសនោះដែរ ឯកឧត្តមអភិបាលខេត្តសៀមរាប បានថ្លែងអំណរគុណចំពោះគរុសិស្ស ដែលបានទទួលការបណ្តុះបណ្តាល ឲ្យក្លាយខ្លួនជាគ្រូបង្រៀននាពេលខាងមុខ និងបានផ្តាំផ្ញើថា ពេលត្រឡប់ទៅតាមមូលដ្ឋានវិញ ត្រូវអប់រំកុមារឲ្យក្លាយជាទំពាំងស្នងប្ញស្សីដ៏ល្អ ចៀសវាងការប្រើប្រាស់គ្រឿងញៀន គ្រឿងស្រវឹង និងអំពើអបាយមុខផ្សេងៗ ជាពិសេសត្រូវខិតខំបន្តស្វ័យវាយតម្លៃខ្លួនឯងជាប្រចាំ ត្រូវបន្តការអភិវឌ្ឍន៍ខ្លួន ដោយកសាងសមត្ថភាពតាមជំហានៗ ត្រូវមានវិធីសាស្ត្រល្អ មានសម្ភារក្នុងការបង្ហាត់បង្រៀនសិស្ស និងត្រូវប្រកាន់ភ្ជាប់ក្រមសីលធម៌វិជ្ជាជីវៈជាគ្រូបង្រៀន ។
ឯកឧត្តម ទៀ សីហា មានប្រសាសន៍ទៀតថា ដោយសារតែប្រទេសមានសុខសន្តិភាព ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឲ្យប្រទេសជាតិមានការអភិវឌ្ឍយ៉ាងឆាប់រហ័ស ជាពិសេស នៅក្នុងខេត្តសៀមរាប មានសមិទ្ធផលធំៗ ជាច្រើន ដូចដែលប្រជាពលរដ្ឋយើងបានឃើញស្រាប់ ហើយ រាជរដ្ឋាភិបាលបានដាក់ចេញនូវគោលនយោបាយអនុគ្រោះ ដោយបញ្ឈប់ និងលើកលែងលើតម្លៃសេវាផ្សេងៗ ជាមួយនឹងការតម្លើងប្រាក់បៀវត្សន៍ជូនមន្ត្រីរាជការ និងតម្លើងប្រាក់ឈ្នួលដល់កម្មករ ដែលក្នុងនោះប្រាក់បៀវត្តន៍បុគ្គលិកអប់រំយើងមានកម្រិតខ្ពស់ជាងគេ ។
ព័ត៌មានជាតិ ថ្មីៗ
សូមបញ្ជាក់ថា នាព្រឹកថ្ងៃទី១៩ ខែកក្កដា ឆ្នាំ២០១៩នេះ នៅ សាលាគរុកោសល្យ និងវិក្រឹតការខេត្តសៀមរាប មានបិទវគ្គបណ្តុះបណ្តាល គ្រូបឋមសិក្សា«១២+២» ជំនាន់ទី៣៦-៣៧ ក្រោមអធិបតីភាពឯកឧត្តម ទៀ សីហា អភិបាលខេត្តសៀមរាប ដោយបានការនិមន្ត និង អញ្ជើញចូលរួមពីសំណាក់ព្រះវិជ័យរង្សី សាសនធរោ ឡាច លាង រាជាគណ:ថ្នាក់កិត្តិយស និងជាព្រះគ្រូប្រាសាទរង្សី អនុគណ ក្រុងសៀមរាប លោក លោកស្រី ជាថ្នាក់ដឹកនាំមន្ទីរ-អង្គភាពនានាជុំវិញខេត្ត លោកគ្រូ អ្នកគ្រូ និងគរុសិស្ស មកពីខេត្តសៀមរាបចំនួន១៥៤នាក់ និងខេត្តឧត្ដរមានជ័យចំនួន ៤៥នាក់ ៕
អត្ថបទ និង រូបថត : លោក អ៊ិន សីហរិទ្ធ និង លោក ខេង ឧត្តម
កែសម្រួលអត្ថបទ : លោក លីវ សាន្ត
