យុវជន-យុវតី ពិការកាយសម្បទា ( គ-ថ្លង់ ) សរុបចំនួន៥០នាក់ហើយ ដែលបានទទួលឱកាសមានការងារធ្វើជាមួយក្រុមហ៊ុនសណ្ឋាគារ G&Z Investment Group ខណៈក្រុមហ៊ុនមានគោល ការណ៍ផ្តល់ឱកាសការងារ សម្រាប់យុវជន គ-ថ្លង់ ពី២៥ ទៅ ៣០ ភាគរយ នៃចំនួនបុគ្គលិកសរុប នៅពេលដែលក្រុមហ៊ុនក្នុងស្រុក វិនិយោគលើវិស័យសណ្ឋាគារមួយនេះ បើកសម្ពោធ ជីអេនហ្ស៉ី អេដិន ព្រីវីលីជ រីហ្សត អេន ស្ប៉ា ( G&Z Eden Privilege Resort & SPA ) ដែលជាសាខាទី៥របស់ខ្លួន នៅក្នុងក្រុងសៀមរាប ។
លោក យីង សារ៉ាត់ នាយកក្រុមហ៊ុនសណ្ឋាគារ G&Z Investment Group បានឱ្យដឹងនាល្ងាចថ្ងៃទី១៨កក្កដានេះថា មានហេតុផលដ៏ត្រឹមត្រូវមួយចំនួន ដែលក្រុមហ៊ុនរបស់លោកទទួលបុគ្គលិក គ-ថ្លង់ ឱ្យមកធ្វើការ ដោយពួកគេត្រូវបានទទួលប្រាក់ខែពី ១៥០ដុល្លារ ដល់ ៣៥០ដុល្លារ តាមជំនាញនិងទំហំការងាររបស់ខ្លួន ហើយគ្រប់រូបនៃបុគ្គលិក គ-ថ្លង់ទាំងអស់ មានភាគហ៊ុន ៨ភាគរយដោយស្វ័យ ប្រវត្តិ ក្រោយពេលបានចូលបំរើការងារជាមួយក្រុមហ៊ុន ហើយក្រុមហ៊ុនក៏ត្រូវបានបរិច្ចាគទឹកប្រាក់ចំនួន២ភាគរយបន្ថែមទៀត សម្រាប់ ការងារសង្គមដែលទាក់ទងទៅនឹងការជួយដល់ជនពិការ គ-ថ្លង់ ផងដែរ ។
លោក យីង សារ៉ាត់ បញ្ជាក់ទៀតថា តាមពិតបុគ្គលិកគ-ថ្លង់ ក៏ដូចជាមនុស្សធម្មតាដែរ ដោយគ្រាន់តែពួកគេខ្វះកាយសម្បទា មិនអាចនិយាយបាន ឬស្ដាប់ឮតែប៉ុណ្ណោះ តែពួកគេអាចសរសេរបាន ហើយពួកគេក៏មានសមត្ថភាពពិសេស បំពេញការខ្វះចន្លោះនោះផងដែរ ដូចជាមានភាពស្មោះត្រង់ ឈ្លាសវៃ រហ័សរហួន និងអំណត់ព្យាយាម ហើយនៅឆ្នាំបន្ទាប់ទៀត លោកនឹងពង្រីកសាខាបន្ថែមទៀត ក្នុងគោលដៅទទួលយុវជនគ-ថ្លង់ ចូលបំរើការងារឲ្យបាន១៥០នាក់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
