បន្ទាប់ពីមានបទបញ្ជាយ៉ាងម៉ឺងម៉ាត់ ពីឯកឧត្តម ទៀ សីហា អភិបាលខេត្តសៀមរាប សមត្ថកិច្ចចម្រុះមកពីស្ថាប័នពាក់ព័ន្ធនានាក្នុងខេត្តសៀមរាប បានចុះពិនិត្យឃ្លាំងស្តុកឈើ ដ៏ធំមួយកន្លែងនៅក្នុងបរិវេណសណ្ឋាគារអង្គរអេរ៉ា ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប។ ចាប់ពីល្ងាចថ្ងៃទី០២ បន្តមកដល់ថ្ងៃទី០៣ ខែកក្កដានេះ ជាលទ្ទផល សមត្ថកិច្ចចម្រុះបានរកឃើញឈើខុសច្បាប់ ចំនួន ២៥២ ម៉ែត្រត្រីគុណ(ម៉ែត្រគូប) និងដកហូតយកទៅរក្សាទុក។
នេះបើតាមប្រសាសន៍ លោក ទៀ គឹមសុទ្ធ ប្រធានមន្ទីរកសិកម្ម រុក្ខាប្រមាញ់និងនេសាទខេត្តសៀមរាប ក្នុងសន្និសីទសារព័ត៌មានមួយ ថ្ងៃទី០៤ ខែកក្កដា ឆ្នាំ២០១៩។
នៅក្នុងសេចក្តីរាយការណ៍របស់ លោក ទៀ គឹមសុទ្ធ បានឲ្យដឹងថា ប្រតិបត្តិការណ៍នោះ បានពិនិត្យរកឃើញ ឯកសារអនុញ្ញាតិច្បាប់ដឹកជញ្ជូនឈើអារចំនួន១២ច្បាប់ និង ឯកសារដឹកជញ្ធូនឈើមូលចំនួន១៨ច្បាប់ ស្មើនឹងទំហំនៃការអនុញ្ញាតិដឹកជញ្ជូនឈើចំនួន ២៧៤ ម៉ែត្រត្រីគុណប៉ុណ្ណោះ ។ ប៉ុន្តែ ការវាស់វែងឈើជាវត្ថុតាងជាក់ស្ដែង សមត្ថកិច្ចចម្រុះបានរកឃើញថា ក្នុងឃ្លាំងស្តុកឈើនោះ មានឈើរក្សាទុករហូតទៅដល់ ៥២៦ ម៉ែត្រត្រីគុណ។ ជាលទ្ធផល នៃការត្រួតពិនិត្យឃ្លាំងស្តុកឈើដដែលនេះ បានរក្សាទុកឈើខុសច្បាប់ចំនួន ២៥២ ម៉ែត្រត្រីគុណ នៃចំនួនសរុប ៥២៦ ម៉ែត្រត្រីគុណ បន្ទាប់ពីរកឃើញ សមត្ថកិច្ចចម្រុះបានរឹបអូសឈើខុសច្បាប់ទាំងនោះ យកមករក្សាទុកនៅកន្លែងមានសុវត្ថិភាព ដើម្បីអនុវត្តន៍តាមនីតិវិធីច្បាប់។
វីដេអូឃ្លីបទី១ ៖ កិច្ចសម្ភាសន៍ លោក ទៀ គឹមសុទ្ធ ប្រធានមន្ទីរកសិកម្មខេត្តសៀមរាប
លោកប្រធានមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានទម្លាយឲ្យដឹងថា ឃ្លាំងស្តុកឈើមួយកន្លែងនេះ បានដំណើរការអស់រយៈពេលជាយូរឆ្នាំមកហើយ ។ ម្ចាស់ទីតាំងនោះធ្លាប់បានដឹកជញ្ជូនឈើ យកមកប្រើប្រាស់ក្នុងសំណង់សណ្ឋាគាររបស់ខ្លួន តាំងតែពីលោកមិនទាន់កាន់តំណែងជាប្រធានមន្ទីរកសិកម្ម ម្លេះ ប្រហែលក្នុងអំឡុងឆ្នាំ២០០៤ ។ ឆ្លងកាត់នៃសកម្មភាពរបស់ខ្លួន ម្ចាស់ទីតាំងនោះ ក៏ធ្លាប់បានសមត្ថកិច្ចអនុវត្តន៍ម្តងរួចមកហើយដែរ ក្នុងករណីដូចលើកនេះ ។ ទោះជាយ៉ាងណាក៏ដោយ តាមការអង្កេតស្រាវជ្រាវកន្លងមក ទីតាំងស្តុកឈើមួយនេះ គឺសម្រាប់ប្រើប្រាស់កសាងសណ្ឋាគារតែប៉ុណ្ណោះ មិនមែនជាឃ្លាំងឈើសម្រាប់ការធ្វើចរាចរ ចែកចាយ លក់ដូរឈើនោះឡើយ ៕
វីដេអូឃ្លីបទី២ ៖ កិច្ចសម្ភាសន៍ លោក ទៀ គឹមសុទ្ធ ប្រធានមន្ទីរកសិកម្មខេត្តសៀមរាប
អត្ថបទ និង រូបថត ៖ លោក ងិន គឹមឡេង លោក ថាច់ ពិសុទ្ធ និងលោក យូ វង្ស
កែសម្រួលអត្ថបទ ៖ លោក សេង ផល្លី
