នៅថ្ងៃទី០៥ ខែមិថុនា ឆ្នាំ២០១៩ នៅមន្ទីរកិច្ចការនារីខេត្ត មានរៀបចំ កិច្ចប្រជុំបូកសរុបលទ្ធផលការបញ្ជ្រាបយេនឌ័រ ប្រចាំឆមាសទី១ ឆ្នាំ២០១៩ ដើម្បីជួបពិភាក្សាជាមួយស្ត្រីថ្នាក់ដឹកនាំរដ្ឋបាលថ្នាក់ក្រោមជាតិ អំពីកាលើកកម្ពស់សមភាពយេឌ័រ សមធម៌សង្គម និងបរិយាប័ន្ន ដែលជាយុទ្ធសាស្ត្រដ៏សំខាន់ក្នុងការលើកកម្ពស់ការចូលរួមឱ្យបានពេញលេញពីគ្រប់មជ្ឈដ្ឋាន ក្នុងដំណើរការអភិវឌ្ឍសេដ្ឋកិច្ច-សង្គម ។
មានវត្តមានក្នុងឱកាសនោះ អ្នកស្រី យូ សុភា អភិបាលរងខេត្តសៀមរាប បានមានប្រសាសន៍ថា ក្រោមការដឹកនាំដ៏ឈ្លាសវៃ របស់រាជរដ្ឋាភិបាលកម្ពុជា ដែលមានសម្ដេចតេជោ ជានាយករដ្ឋមន្ត្រី សម្ដេចបានជំរុញការលើកកម្ពស់សមភាពយេឌ័រ និងលើកស្ទួយស្ថានភាពស្ត្រី ដែលជាឆ្អឹងខ្នងនៃសេដ្ឋកិច្ច និងសង្គមជាតិ ដោយបានអនុវត្តនូវផែនការយុទ្ធសាស្ត្រនារីរតនៈទី៤ (២០១៤-២០១៨) ដោយផ្តោតទៅលើការពង្រីកកាលានុវត្តភាពសេដ្ឋកិច្ច សង្គម និងអភិបាលកិច្ចនៅគ្រប់កម្រិត ។ តាមរយៈ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ហៅកាត់ថា គ.ជ.អ.ប រាជរដ្ឋាភិបាល ក៏បាននិងកំពុងធ្វើវិមជ្ឈការមកឱ្យរដ្ឋបាលថ្នាក់ក្រោមជាតិដូចជា ការជ្រើសរើស តែងតាំង លើកសរសើរ និងការដាក់វិន័យតាមការសម្រេចរបស់ក្រុមប្រឹក្សា រីឯការអភិវឌ្ឍធនធានមនុស្ស លេខាធិការដ្ឋាន នៃ គ.ជ.អ.ប បានណែនាំឱ្យ រដ្ឋបាលរាជធានី ខេត្តនីមួយៗ ត្រូវរៀបចំ និងដាក់ឱ្យដំណើរការនូវប្រព័ន្ធគាំទ្រការអភិវឌ្ឍស្ថាប័ន និងការអភិវឌ្ឍសមត្ថភាព ដោយផែ្អកតាមតម្រូវការ សម្រាប់គណៈអភិបាល និងមន្ត្រី បុគ្គលិក នៃរដ្ឋបាលថ្នាក់ក្រោមជាតិ។
ក្នុងនោះដែ អ្នកស្រី យូ សុភា បានបញ្ជាក់ថា ក្នុងការលើកកម្ពស់សមធម៌សង្គម និងបរិយាប័ន្ន រដ្ឋបាលខេត្តដែលមាន ក្រុមប្រឹក្សាខេត្ត និង គណៈអភិបាលខេត្ត តែងតែបានយកចិត្តទុកដាក់ពង្រឹងសមត្ថភាពថ្នាក់ដឹកនាំជាស្ត្រីជាបន្តបន្ទាប់។ តែទោះជាយ៉ាងណាក៏ដោយ រដ្ឋបាលខេត្ត នៅមានបញ្ហាមួយចំនួនដែលកំពុងជួបប្រទះ ដែលទាមទារឱ្យមានការយកចិត្តកាន់តែច្រើនថែមទៀត គឺការអភិវឌ្ឍសមត្ថភាព និងការផ្ទេរតួនាទី ភារកិច្ច ប៉ុន្តែកិច្ចការនេះមិនអាចអនុវត្តដោយបង្ខំឬដោយកំហុកបានទេ ព្រោះយើងនៅត្រូវការមន្ត្រីចាស់ ប្រៀបដូច “ទំពាំងត្រូវការឫស្សីចាស់ការពារ” ដើម្បីគាំទ្រ និងការពារដល់និរន្តភាពនៃដំណើរការទាំងមូល។
អ្នកស្រីអភិបាលខេត្ត ក៏បាន ថ្លែងអំណរគុណ និងការកោតសរសើរ ចំពោះការខិតខំប្រឹងប្រែងរួមចំណែកយ៉ាងសកម្មរបស់មន្ទីរ អង្គភាព អង្គការនានា ជាពិសេសមន្ទីរកិច្ចការនារីខេត្តសៀមរាប ដែលបានបន្តរៀបចំកិច្ចប្រជុំនេះឲ្យប្រព្រឹត្តទៅយ៉ាងរលូន ទោះបីជាពុំមានថវិកាគាំទ្រពី ផអ៣ ក៏ដោយ។ ជាមួយគ្នានោះ អ្នកស្រីបានអំពាវនាវដល់ភាគីពាក់ព័ន្ធទាំងអស់ សូមបន្តគាំទ្រដល់ការលើកកម្ពស់សមធម៌សង្គម និងបរិយាប័ន្នទាំងនៅថ្នាក់ខេត្ត ក្រុង ស្រុក និងជួយពង្រឹងកិច្ចទំនាក់ទំនងឱ្យកាន់តែប្រសើរ ក្នុងការជំរុញឱ្យការបញ្ជ្រាបយេនឌ័រ បរិយាប័ន្ន និងសមធម៌សង្គម ជាពិសេសការបង្កើនភាពអង់អាចដល់ស្ត្រី ដើម្បីធានាថាទាំងការអភិវឌ្ឍសមត្ថភាព និងការពិចារណាបានឲ្យគ្រប់ជ្រុងជ្រោយនៅពេលធ្វើការជ្រើសរើស ការតែតាំង ការលើកសរសើរ និងការតម្លើងឋានន្តរស័ក្តិធ្វើយ៉ាងណាឲ្យមានសមធម៌សង្គម ។
រូបភាព ៖ លោក ខេង ឧត្តម
អត្ថបទ ៖ លោក សេង ផល្លី
