កងកម្លាំងប្រដាប់អាវុធអេហ្ស៊ីបបាននិយាយនៅក្នុងសេចក្តីថ្លែងការណ៍មួយថា អេហ្ស៊ីប សហរដ្ឋអាមេរិច និង សហភាពអារ៉ាប់រួម បានចាប់ផ្តើមធ្វើសមយុទ្ធយោធារួមមួយ កាលពីថ្ងៃចន្ទម្សិលមិញនេះ នៅក្នុងសមុទ្រក្រហម ។
សេចក្តីថ្លែងការណ៍បាននិយាយថា យន្តហោះប្រយុទ្ធ F-16 នាវាចម្បាំង ជើងទម្របាញ់រ៉ុក្កែត ព្រមទាំងនាវាបោសសំអាតគ្រាប់មីន ក៏ដូចជាកងកម្លាំងឡើងគោក កងនាវាចរពិសេសរបស់ប្រទេសទាំងបីបានចូលរួមនៅក្នុងសមយុទ្ធមួយដែលមានឈ្មោះថា « Eagle Response 19 » ។
កងកម្លាំងរួម បានធ្វើប្រតិបត្តិការពិសេស ដែលរួមមានការធ្វើឱ្យផ្ទុះគ្រាប់បែកនៅក្រោមទឹក , ការដកយកគ្រាប់បែកហើយ នឹងការវាយឆ្មក់ប្រឆាំងនឹងភេរវកម្ម ។
ប្រទេសអារ៉ាប៊ីសាអូឌីត ក៏ជាផ្នែកនៃសមយុទ្ធរួមនេះផងដែរ ក្នុងឋានៈជាអ្នកសង្កេតការណ៍មួយ ។
តាមសេចក្តីថ្លែងការណ៍នោះឱ្យដឹងថា សមយុទ្ធរួមនេះមានបំណងបង្កើនអន្តរសមត្ថភាពប្រតិបត្តិការ ព្រមទាំងការត្រៀមប្រយុទ្ធក្នុងសង្គ្រាម , ការធ្វើឱ្យខ្លាំងឡើងទំនាក់ទំនងយោធានិងយោធា ព្រមទាំងជំរុញ សមត្ថភាពប្រតិបត្តិការនៃក្រុមដែលចូលរួមទាំងអស់ ។
ប្រទេសអេហ្ស៊ីបបានធ្វើសមយុទ្ធយោធារួម ជាទៀងទាត់ ជាមួយបណ្តាប្រទេសដទៃទៀត ដើម្បីជំរុញការសហការយោធា ព្រមទាំងការផ្លាស់ប្តូរជំនាញ ការយោធា ៕
( ប្រភព ស៊ីនហួ បកប្រែដោយលោក ប៉ិនមឿន )
