នាយប៉ូលីសម្នាក់បាននិយាយថា ការវាយប្រហារភេរវកម្មជាបន្តបន្ទាប់មួយទៅលើប៉ូលីសនៅក្នុង ស្រុក ឌីរ៉ា អ៊ីស្មេល ខាន (Deera Ismail Khan) ភាគពាយ័ព្យ ប្រទេសប៉ាគីស្ថាន បានធ្វើឱ្យប៉ូលីស៦នាក់ស្លាប់ នឹងច្រើននាក់ទៀត របួសកាលពីព្រឹកថ្ងៃអាទិត្យ ម្សិលមិញនេះ។
នៅក្នុងការវាយប្រហារលើកទីមួយ បានសម្លាប់ប៉ូលីស២នាក់ និងច្រើននាក់ទៀតរបួស ដោយពួកសកម្មប្រយុទ្ធមិនស្គាល់អត្តសញ្ញាណ និងខ្លះទៀតបានបាញ់ទៅលើប៉ុស្តិត្រួតពិនិត្យមួយរបស់ប៉ូលីស ហើយបានរត់គេចខ្លួនចេញពីកន្លែងនោះទៅវិញ ។
ស្នងការរង លោក អ៊ីទីខា សា (Iftikhar Shah) បាននិយាយថា នៅក្នុងការវាយប្រហារលើកទី២ បានកើតឡើងនៅឯមន្ទីរពេទ្យមួយ ដែលនៅទីនោះ មានក្រុមប៉ូលីសកំពុងធ្វើការផ្ទេរសហសេវិករបស់ពួកគេដែលកំពុងរងរបួស ។
លោកបាននិយាយបន្ថែមថា អ្នកបំផ្ទុះគ្រាប់បែកអត្តឃាតជាស្រីម្នាក់ ហើយបានបំផ្ទុះខ្លួនឯងនៅក្បែរពួកប៉ូលីសទាំងនោះ នៅឯទ្វារចូលយ៉ាងសំខាន់ទៅកាន់មន្ទីរពេទ្យ ដែលធ្វើឱ្យប៉ូលីស៤នាក់ទៀតស្លាប់ និងមួយចំនួនទៀតរងរបួស ។
គ្មានក្រុមឬបុគ្គលណាមួយ បានប្រកាសទទួលស្គាល់ចំពោះការវាយប្រហារនេះឡើយ ។
ឌីរ៉ា អ៊ីស្មេល ខាន (Deera Ismail Khan) គឺជាស្រុកយ៉ាងសំខាន់មួយនៅក្នុងខេត្ត ឃីប៊ើ ប៉ាទុងខា (Khyber Pahhtunkhwa) ភាគខាងជើង នៃប្រទេសប៉ាគីស្ថាន ហើយក៏ធ្លាប់ជាសំបុកពួកសកម្មប្រយុទ្ធ ប៉ុន្តែអំពើភេរវកម្មបានថយចុះជាបណ្តើរៗ បន្ទាប់ពីប្រតិបត្តិការយោធាជាច្រើនឆ្នាំ នៅក្នុងតំបន់កុលសម្ព័ន្ធ ដើម្បីកម្ចាត់ជម្រកពួកភេរវកម្ម ។
ពួកអ្នកវិភាគក្នុងស្រុកជឿថា ឆ្អឹងខ្នងរបស់ពួកសកម្មប្រយុទ្ធត្រូវបានគេវាយបំបាក់ ប៉ុន្តែពួកគេនៅតែមានធនធានខ្លះនៅឡើយ ដែលបានបន្សល់ទុក ដើម្បីធ្វើការវាយប្រហារម្តងម្កាលទៅលើកងកម្លាំងសន្តិសុខនិងសាធារណជន ៕
( ប្រភព ស៊ីនហួ បកប្រែដោយលោក ប៉ិន មឿន )
