ក្នុងកិច្ចប្រជុំទ្វេភាគីកម្ពុជាថៃ លើកទី១២ ស្តីពីកិច្ចសហប្រតិបត្តិការត្រួតពិនិត្យគ្រឿងញៀន នៅក្នុងក្រុងសៀមរាប នាថ្ងៃទី០៤ ខែកញ្ញា ឆ្នាំ២០១៨នេះ ឯកឧត្តមនាយឧត្តមសេនីយ៍ មាស វិរិទ្ធអគ្គលេខាធិការដ្ឋាននៃអាជ្ញាធរជាតិប្រយុទ្ធប្រឆាំងគ្រឿងញៀន តំណាងឲ្យភាគីកម្ពុជា និង ឯកឧត្តម ស៊ីរិនយ៉ា សិទ្ធិឆៃ អគ្គលេខាធិការ នៃក្រុមប្រឹក្សាត្រួតពិនិត្យគ្រឿងញៀននៃប្រទេសថៃ តំណាងឲ្យភាគីថៃ បានប្តេជ្ញាបង្កើនកិច្ចសហប្រតិបត្តិការរួមគ្នា ត្រួតពិនិត្យ និងបង្ក្រាបគ្រឿងញៀនឆ្លងដែនឱ្យកាន់តែមានប្រសិទ្ធភាព ក្នុងការរួមចំណែកជាមួយបណ្តាប្រទេសនៅក្នុងតំបន់ក្នុងការថែរក្សា សន្តិសុខ សណ្តាប់ធ្នាប់សង្គម ជំរុញការអភិវឌ្ឍន៍ប្រកបដោយចិរភាព ពិសេសនៅតាមតំបន់ព្រំដែន ខណៈបច្ចុប្បន្ននេះសភាពការណ៍គ្រឿងញៀនបានវិវឌ្ឍន៍ទៅរកស្ថានភាពមួយគួរឱ្យព្រួយបារម្មណ៍។
ឯកឧត្តមនាយឧត្តមសេនីយ៍ មាស វិរិទ្ធ បានមានប្រសាសន៍ថា សន្ទុះនៃការផលិតការចរាចរគ្រឿងញៀន និងប្រើប្រាស់គ្រឿងញៀនខុសច្បាប់ នៅក្នុងតំបន់និងនៅលើពិភពលោកមិនមានការថយចុះទេ ដោយក្នុងរយៈពេលប៉ុន្មានឆ្នាំចុងក្រោយនេះ ស្ថានភាពគ្រឿងញៀនកាន់តែមានលក្ខណៈស្មុគ្រស្មាញ និងរាលដាល ដែលនេះជាបញ្ហាប្រឈមគួរឲ្យព្រួយបារម្ភ ហើយប្រទេសកម្ពុជានៅតែត្រូវចាត់ទុកថាជាទីតាំងដែលក្រុមឧក្រិដ្ឋជនចរាចរគ្រឿងញៀនឆ្លងកាត់ដដែល ដែលភាគច្រើនមកពីតំបន់អាមេរិកខាងត្បូង តំបន់អាហ្វ្រិក តំបន់ត្រីកោណមាស និងតំបន់អឌ្ឍច័ន្ទមាសជាដើម ខណៈ បញ្ហានេះ រាជរដ្ឋាភិបាលកម្ពុជា បានដាក់ចេញនូវផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ សំដៅបង្កើនប្រសិទ្ធភាពត្រួតពិនិត្យគ្រឿងញៀននៅក្នុងប្រទេស និងរួមចំណែកជាមួយបណ្តាប្រទេសនៅក្នុងតំបន់ ក្នុងការថែរក្សា សន្តិសុខ សណ្តាប់ធ្នាប់សង្គម ជំរុញការអភិវឌ្ឍន៍ប្រកបដោយចិរភាព នៅតាមតំបន់ព្រំដែន ជាពិសេសរវាងព្រំដែនកម្ពុជា-ថៃ ។
ឯកឧត្តម ស៊ីរិនយ៉ា សិទ្ធិឆៃ មានប្រសាសន៍ថា ជាការពិតណាស់បច្ចុប្បន្ននេះការចរាចរគ្រឿងញៀននៅក្នុងតំបន់ពិតជាមានការកើនឡើងគួឱ្យព្រួយបារម្ភ ហើយសម្រាប់ប្រទេសថៃ ក៏កំពុងតែជួបបញ្ហាគ្រឿងញៀននេះដែរ ដោយក្រុមឧក្រិដ្ឋជនចរាចរគ្រឿងញៀនមកពីតំបន់អាហ្វ្រិក តំបន់ត្រីកោណមាសចូលមកប្រទេសថៃ ដូច្នេះ កម្ពុជាថៃត្រូវបង្កើនកិច្ចសហប្រតិបត្តិការរួមគ្នាត្រួតពិនិត្យ និងបង្ក្រាបគ្រឿងញៀនឆ្លងដែនឱ្យកាន់តែមានប្រសិទ្ធភាពបន្ថែមទៀត ក្នុងការរួមចំណែកជាមួយបណ្តាប្រទេសនៅក្នុងតំបន់ក្នុងការថែរក្សា សន្តិសុខ សណ្តាប់ធ្នាប់សង្គម ជំរុញការអភិវឌ្ឍន៍ប្រកបដោយចិរភាព ពិសេសនៅតាមតំបន់ព្រំដែនកម្ពុជា-ថៃ ៕
អត្ថបទ និង រូបថត ៖ លោក ជា ស្រស់ និង លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
#មន្ទីរព័ត៌មានខេត្តសៀមរាប
#គ្រឿងញៀនឆ្លងដែន
