ថ្លែងក្នុងទិវាអក្ខរកម្មជាតិ – អន្តរជាតិ ៨ កញ្ញា លើកទី១៨ នៅមជ្ឈមណ្ឌលសិក្សាសហគមន៍រោងគោ ក្នុងឃុំរោងគោ ស្រុកក្រឡាញ់ កាលពីព្រឹកថ្ងៃទី០៥ ខែកញ្ញា ឆ្នាំ២០១៨នេះ លោក ពៅ ពិសិដ្ឋ អភិបាលរងខេត្តសៀមរាប បានធ្វើការអំពាវនាវដល់ប្រជាពលរដ្ឋគ្រប់ៗរូប ដែលមានកូន ចៅ កំពុងសិក្សា និង គ្រប់អាយុចូលសិក្សា ត្រូវជំរុញឲ្យពួកគាត់ឲ្យចូលសិក្សារៀនសូត្របានគ្រប់ៗគ្នា ព្រោះការទទួលបានចំណេះដឹងពីការសិក្សានេះ នឹងធ្វើឲ្យពួកគាត់មានឱកាសរកការងារធ្វើបានសមរម្យ ពិសេសធ្វើឲ្យជីវភាពរស់នៅប្រចាំថ្ងៃរបស់ពួកគាត់ មានការរីកចម្រើនទៅថ្ងៃអនាគត ដែលជាផ្នែកមួយ ជួយឱ្យសង្គមជាតិរបស់យើងមានការរីកចម្រើនផងដែរ ។
លោក ពៅ ពិសិដ្ឋ បានបញ្ជាក់ទៀតថា បងប្អូនប្រជាពលរដ្ឋយើងដែលមានវ័យចំណាស់ក្នុងពេលនេះ គឺមិនមានឱកាសរៀនសូត្រកាលនៅពីកុមារឡើយ ដោយសារប្រទេសជាតិយើងមានសង្គ្រាម ដូច្នេះក្នុងពេលដែលប្រទេសជាតិមានសន្តិភាព និងមានសន្តិសុខហើយនោះ ជាពិសេសក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្ដេចតេជោបានកសាងសាលារៀនរហូតដល់គ្រប់ភូមិ ហេតុនេះ សូមកុំឲ្យកូនចៅរបស់យើង ក្លាយជាអនក្ខរជនដូចយើង គួរតែជំរុញពួកគាត់ឲ្យរៀនសូត្រ មានចំណេះចេះដឹងបានខ្ពង់ខ្ពស់ យ៉ាងហោចណាស់ ក៏បញ្ចប់ត្រឹមសញ្ញាបត្រមធ្យមសិក្សាទុតិយភូមិដែរ ។
លោក ពៅ ពិសិដ្ឋ បានបញ្ជាក់បន្ថែមទៀតថា បញ្ហាអនក្ខរភាព ស្ថិតនៅជាក្ដីកង្វល់របស់រាជរដ្ឋាភិបាល និងក្រសួងអប់រំយុវជននិងកីឡានៅឡើយ ហេតុនេះហើយ បានជានៅក្នុងផែនការយុទ្ធសាស្ត្រវិស័យអប់រំរបស់ក្រសួងអប់រំយុវជន និង កីឡា នៅតែចាត់ទុកការងារអក្ខរកម្ម ជាសមាសភាគមួយមិនអាចខ្វះបានក្នុងវិស័យអប់រំ និង ជាសកម្មភាពជាអាទិភាពដ៏ចម្បងរបស់ការអប់រំក្រៅប្រព័ន្ធ ដែលជាជ្រុងមួយក្នុងការកសាងសមត្ថភាព និង ការអភិវឌ្ឍធនធានមនុស្ស ក្នុងចំណោមជ្រុងទាំងបួន នៃយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ។
ព័ត៌មានជាតិ ថ្មីៗ
បើតាមប្រសាសន៍របស់លោក សយ ទិត្យាវង្ស ប្រធានមន្ទីរអប់រំយុវជននិងកីឡាខេត្តសៀមរាប បានឲ្យដឹងថា បច្ចុប្បន្ននេះ នៅទូទាំងខេត្ត មានមត្តេយ្យសហគមន៍ចំនួន ១៩៦ សាលា , មានមត្តេយ្យដាច់ដោយឡែកចំនួន ១៨ កន្លែង , មានមត្តេយ្យឯកជនចំនួន ៥៦ សាលា , មានកម្មវិធីអប់រំកុមារតូចតាមផ្ទះចំនួន ២៨៧ ភូមិ , មានសាលាបឋមសិក្សាចំនួន ៥០២ សាលា , មានអនុវិទ្យាល័យចំនួន ៨៤ សាលា , មានវិទ្យាល័យចំនួន ៣៦ សាលា និង មានបុគ្គលិកសរុបចំនួន ៧.៥៣១ នាក់ ក្នុងនោះមានស្រីចំនួន ៤.៤៨៥ នាក់ ៕
អត្ថបទនិងរូបថត : លោក លីវ សាន្ត
#មន្ទីរព័ត៌មានខេត្តសៀមរាប
