នៅថ្ងៃទី០៦ខែកញ្ញាឆ្នាំ២០១៨គណៈកម្មការមូលបត្រកម្ពុជា(គ.ម.ក.)ក្នុងនាមជាសហប្រធាននៃក្រុមការងារអភិវឌ្ឍន៍ទីផ្សារមូលបត្រនៃវេទិកាទីផ្សារមូលធនអាស៊ាន (ASEAN Capital Markets Forum-Market Development Program (A-MDP)) រួមជាមួយគណៈកម្មការមូលបត្រម៉ាឡេស៊ី (Securities Commission Malaysia) សហការជាមួយធនាគារអភិវឌ្ឍន៍អាស៊ី (Asian Development Bank) បានរៀបចំសិក្ខាសាលាស្តីពី “សញ្ញាបណ្ណសាជីវកម្ម”លើកទី២ សម្រាប់ក្រុមហ៊ុនបោះផ្សាយសក្តានុពល វិនិយោគិនសក្តានុពល និងស្ថាប័នពាក់ព័ន្ធផ្សេងៗ នៅសណ្ឋាគារ សុខា សៀមរាប ក្រោមអធិបតីភាព ឯកឧត្តម ស៊ូ សុជាតិ ជាអគ្គនាយកនៃគ.ម.ក.និងជាសហប្រធាននៃក្រុមការងារអភិវឌ្ឍន៍ទីផ្សារមូលបត្រនៃវេទិកាទីផ្សារមូលធនអាស៊ាន( A-MDP)។
សិក្ខាសាលានេះមានរយៈពេលពីរថ្ងៃចាប់ពីថ្ងៃទី៦ដល់ថ្ងៃទី៧ខែកញ្ញាឆ្នាំ២០១៨ ដោយបានការអញ្ជើញចូលរួមជាសិក្ខាកាមសំខាន់ៗមកពីគណៈកម្មការមូលបត្រកម្ពុជា(គ.ម.ក.)នៃក្រសួងសេដ្ឋកិច្ចនិងហិរញ្ញវត្ថុធនាគារជាតិនៃកម្ពុជាក្រុមហ៊ុនផ្សារមូលបត្រកម្ពុជាដែលសុទ្ធតែជាស្ថាប័នមានតួនាទីចម្បងក្នុងការអភិវឌ្ឍវិស័យមូលបត្រ ជាពិសេសសិក្ខាកាមដែលជានិយ័តករសំខាន់ៗមកពីក្រុមហ៊ុនបោះផ្សាយសក្តានុពល និងវិនិយោគិនសក្តានុពល។
ថ្លែងបើកអង្គសិក្ខាសាលានេះ ឯកឧត្តម ស៊ូ សុជាតិ ជាអគ្គនាយកនៃ គណៈកម្មការមូលបត្រកម្ពុជា(គ.ម.ក.) មានប្រសាសន៍ថា៖ វិស័យមូលបត្រនៅកម្ពុជាបាននឹងកំពុងតែរីកចម្រើនជាលំដាប់ ដោយបានចុះបញ្ជីដំបូងនៃសិទ្ឋិមូលបត្រកម្មក្នុងឆ្នាំ២០១១មកម្ល៉េះ ដែល រហូតមកដល់ពេលនេះមានក្រុមហ៊ុន 5 បានចុះបញ្ជីជាផ្លូវការកំពុងបោះផ្សាយលក់មូលបត្រជាសាធារណៈ ហើយក្នុងពេលឆាប់ៗនេះនឹងមានក្រុមហ៊ុនចំនួនពីរទៀតត្រៀមធ្វើការចុះបញ្ជីបោះផ្សាយលក់មូលបត្រជាសាធារណៈ នៅលើផ្សារមូលបត្រកម្ពុជា ផងដែរ។ លើសពីនេះទៅទៀតយើងក៏បានអនុម័តនូវបទបញ្ជាទាក់ទងនឹងសញ្ញាប័ណ្ណសាជីវកម្មនៅឆ្នាំ 2017 ដែលជាព្រឹត្តិការណ៍សំខាន់មួយទៀតនៃការអភិវឌ្ឍទីផ្សារមូលធនកម្ពុជា។
ឯកឧត្តមបញ្ជាក់ថា៖សិក្ខាសាលានេះ ជាមូលដ្ឋានដ៏សំខាន់មួយដើម្បីបន្តគាំទ្រដល់ទីផ្សារមូលបត្រនៅក្នុងប្រទេសកម្ពុជា កម្មវិធីនេះនឹងត្រូវផ្តោតសំខាន់ទៅលើ វិនិយោគិនដែលមានសក្តានុពល និង អ្នកផ្តល់ប្រឹក្សាមូលបត្រហិរញ្ញវត្ថុក្រុមហ៊ុនធានាទិញមូលបត្រតំណាងក្រុមហ៊ុនសវនកម្ម ហើយតាមរយៈនៃសិក្ខាសាលានេះនឹងក្លាយជាបទពិសោធដ៏មានប្រយោជន៍មួយហើយអាចបំពេញនិង ជួយសម្រួលដល់ការអភិវឌ្ឍន៍ ទីផ្សារក្នុងស្រុក ដែលនេះជាឱកាសដ៏កម្រមួយសម្រាប់យើងដើម្បីរៀនពីអ្នកជំនាញល្អ ៗ មួយចំនួននៅក្នុងវិស័យមូលបត្របំណុលសាជីវកម្ម។
ឯកឧត្តម ថ្លែងដោយជឿជាក់ថា៖លទ្ឋផលក្រោយពីសិក្ខាសាលានេះ យើងនឹងទទួលបាន ការរីកចម្រើនបន្ថែមទៀតលើវិស័យ ទីផ្សារមូលបត្របំណុលនៅកម្ពុជា។
សូមបញ្ជាក់ថា៖សិក្ខាសាលានេះ រៀបចំឡើងក្នុងទិសដៅដើម្បីអភិវឌ្ឍទីផ្សារសញ្ញាបណ្ណសាជីវកម្ម និងលើកកម្ពស់ការយល់ដឹងពាក់ព័ន្ធនឹងជម្រើសហិរញ្ញប្បទានតាមរយៈការបោះផ្សាយលក់សញ្ញាបណ្ណសាជីវកម្ម ដោយបានផ្តោតសំខាន់ទៅលើ៖ ១). កំណើន និងការអភិវឌ្ឍទីផ្សារសញ្ញាបណ្ណក្នុងប្រទេសអាស៊ានក្នុងរយៈពេលពីរទស្សវត្សចុងក្រោយ
២). អត្ថប្រយោជន៍ និងដំណើរការនៃការបោះផ្សាយលក់សញ្ញាបណ្ណ
៣). អាថ៌កំបាំងនៃការកៀរគរវិនិយោគិនស្ថាប័ន
៤). តួនាទីនៃក្រុមការងារធានាឥណទាននិងវិនិយោគ និងនីតិវិធីនៃការយល់ព្រមធានាឥណទានសម្រាប់ក្រុមហ៊ុនបោះផ្សាយ និង៥). ការលើកឡើងពីករណីសិក្សាផ្សេងៗ ជាដើម ព្រមទាំងបានធ្វើបទបង្ហាញដោយវាគ្មិនជំនាញៗមកពីប្រទេសសិង្ហបុរី ប្រទេសម៉ាឡេស៊ី ប្រទេសថៃ ប្រទេសឥណ្ឌូនេស៊ី ក៏ដូចជាស្ថាប័នអន្តរជាតិនានា ដែលមានបទពិសោធន៍យូរឆ្នាំ។
