អគ្គនាយកពាណិជ្ជកម្មក្រៅប្រទេស នៃក្រសួងពាណិជ្ជកម្មឥណ្ឌូណេស៊ី លោក អុក ណូវាន(Oke Nuwan) បានប្រាប់សារព័ត៌មានថា ប្រទេសឥណ្ឌូណេស៊ីបានជូនដំណឹងរួចរាល់ហើយទៅដល់ប្រទេសចំនួន ១៥ ដែលជាប្រទេសនាំចេញសំខាន់ៗ អំពីគម្រោង នៃច្បាប់រឹតបន្តឹង ដើម្បីទប់ស្កាត់ការកើនឡើង នៃការនាំចូលកាកសំណល់ប្លាស្ទិក។
យោងតាមមន្ត្រីរូបនេះបានឱ្យដឹងទៀតថា ឥណ្ឌូណេស៊ីនឹងតម្រូវឱ្យមានការចុះបញ្ជីអ្នកនាំចេញសំរាម និងបង្កើនការត្រួតពិនិត្យនៅតាមព្រំដែនឱ្យកាន់តែតឹងរឹង ហើយលោកបានសន្យាថា នឹងដាក់ទណ្ឌកម្មយ៉ាងម៉ឹងម៉ាត់ ចំពោះរាល់ការរំលោភលើច្បាប់ថ្មីនេះ។
ប្រទេសឥណ្ឌូណេស៊ី គឺជាប្រទេសមានវិធានការណ៍តម្រង់ទៅលើសំណល់ប្លាស្ទិកអាចប្រើប្រាស់បានឡើងវិញ ដែលជាអនុសាសន៍ពីក្រសួងបរិស្ថាន និងភស្តុតាងនៃការត្រួតពិនិត្យរបស់អ្នកអង្កេត។ ទោះជាយ៉ាងណាមន្ត្រីគយបានរកឃើញការនាំចូលសំណល់ដែលអាចប្រើប្រាស់ឡើងវិញបាន បានលាយជាមួយកាកសំណល់មិនអាចប្រើបានផ្សេងៗទៀត ដូចជាកៅស៊ូ និងក្រណាត់កន្ទប ហើយប្រទេសនេះបានបញ្ជាក្រុមហ៊ុនដែលនាំចូលធ្វើការដឹកជញ្ជូនកាកសំណល់ទាំងនោះទៅប្រទេសដើមវិញ។
ទិន្នន័យបានពីទីភ្នាក់ងារស្ថិតិរបស់ឥណ្ឌូណេស៊ីបានបង្ហាញថា ការនាំចូលកាកសំណល់ប្លាស្ទិកមកប្រទេសខ្លួន បានកើនឡើងចំនួន ១៤១ភាគរយ បើធៀបទៅនឹងឆ្នាំមុន ដែលមានចំនួនដល់ទៅ ២៨៣ពាន់តោន បន្ទាប់ពីប្រទេសចិនបានសម្រេចបិទការនាំចូលកាកសំណល់ ដើម្បីសម្អាតបរិស្ថានរបស់ខ្លួនចាប់ពីតាំងខែមករា ឆ្នាំ ២០១៨ មក។
ប្រទេសឥណ្ឌូណេស៊ីកំពុងតស៊ូដោះស្រាយជាមួយកាកសំណល់របស់ខ្លួន ដែលជារឿយៗបានចាក់ទៅក្នុងរណ្តៅសំរាម រឺបង្ហូរទៅក្នុងទឹកទន្លេ។ ការសិក្សាមួយកាលពីឆ្នាំ ២០១៥ របស់ទស្សនាវដ្តីវិទ្យាសាស្ត្រមួយបានបង្ហាញថា ប្រទេសនេះ គឺជាប្រទេសធំលំដាប់ទី២ ដែលចូលរួមក្នុងការបំពុលប្លាស្ទិចនៅក្នុងមហាសមុទ្រ៕
(ប្រភព VNA បកប្រែដោយលោក យា ចិន្តាខន្តី)
កែសម្រួលអត្ថបទ៖ ដោយ លោក សេង ផល្លី
