អាល់ម៉ាស៊ីរ៉ា ធីវី (Al-Masirah TV) របស់ពួកហ៊ូធី រាយការណ៍ថា ពួកហ៊ូធី យេមែន បាននិយាយថា ពួកគេបានបាញ់ មីស៊ីលមួយគ្រាប់ ទៅលើទីបញ្ជាការក្រុមចម្រុះ ដឹកនាំដោយប្រទេសអារ៉ាប៊ីសាអូឌីត នៅក្នុងភាគនីរតីប្រទេសអារ៉ាប៊ីសាអូឌីត កាលពីព្រឹកថ្ងៃអាទិត្យម្សិលមិញនេះ ។
ដកស្រង់សេចក្តីថ្លែងការណ៍មួយ ធ្វើឡើងដោយអ្នកនាំពាក្យយោធាហ៊ូធី លោក យ៉ាយ៉ា សារៀ (Yahya Sarea) នោះ ទូរទស្សន៍នោះបាននិយាយថា មីស៊ីលនោះបានវាយប្រហារទីបញ្ជាការនៅខាងត្បូងតំបន់ សុខេម (Sukam) ក្នុងខេត្ត ណារ៉ាន (Najran) របស់ប្រទេសអារ៉ាប៊ីសាអូឌីត ដោយបំផ្លាញអគារ នឹងសម្លាប់ទាហានអារ៉ាប៊ីសាអូឌីត រាប់សិបនាក់ រួមទាំងពួកមេដឹកនាំយោធាផងដែរ ។
មិនមានការបញ្ជាក់អះអាងណាមួយពីប្រទេសអារ៉ាប៊ីសាអូឌីតស្តីពីការវាយប្រហារនេះនៅឡើយទេ។
កាលពីព្រឹកថ្ងៃអាទិត្យម្សិលមិញនេះពួកហ៊ូធី បានប្រកាសទទួលខុសត្រូវ ចំពោះការវាយប្រហារមួយទៀត ទៅលើព្រលានយន្តហោះ ណារ៉ាន (Najran) ដោយប្រើយន្តហោះដ្រូន ដែលផ្ទុកដោយគ្រាប់បែក ប៉ុន្តែប្រទេសអារ៉ាប៊ីសាអូឌីត មិនទាន់បានបញ្ជាក់អះអាងពីការវាយប្រហារនេះនៅឡើយទេ ។
ពួកហ៊ូធីកាលពីពេលថ្មីៗនេះ បានបង្កើនការវាយប្រហារដោយមីស៊ីល និងដ្រូន ទៅលើប្រទេស អារ៉ាប៊ីសាអូឌីត ប៉ុន្តែមីស៊ីល និងដ្រូនភាគច្រើនត្រូវបានស្ទាក់ចាប់នឹងបំផ្លាញដោយកងកម្លាំងអាកាសរបស់ព្រះរាជាណាចក្រមួយនេះ ។
ប្រទេសអារ៉ាប៊ីសាអូឌីត បាននឹងកំពុងដឹកនាំក្រុមចម្រុះយោធាអារ៉ាប់មួយប្រឆាំងនឹងពួកហ៊ូធី ដែលជាសម្ព័ន្ធមិត្តរបស់អ៊ីរ៉ង់ក្នុងប្រទេសយេមែនអស់ពេលជាង៤ឆ្នាំមកហើយ ក្នុងការគាំទ្រដល់រដ្ឋាភិបាលប្រធានាធិបតីយេមែន របស់ លោក អាប់ រ៉ាប់ប៊ូ ម៉ាន់សួរហាឌី ៕
( ប្រភព ស៊ីនហួ បកប្រែដោយលោក ប៉ិនមឿន )
