នៅថ្ងៃទី២៩ ខែកក្កដា ឆ្នាំ២០១៩ម្សិលមិញនេះ លោក ស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប តំណាងដ៏ខ្ពង់ខ្ពស់ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប និងក្រុមកាងារខេត្ត ព្រមទាំងក្រុមការងារអនុសាខាកាកបាទក្រហមកម្ពុជាស្រុកវ៉ារិន ដែលមានលោក ណេង ធូ អនុប្រធានកិត្តិយសអនុសាខាស្រុក បានចុះសួរសុខទុក្ខគ្រួសារ និងកុមាររងគ្រោះដោយសាររន្ទះបាញ់បណ្ដាលអោយស្លាប់ម្នាក់ និងរងរបួសចំនួន ៤នាក់កាលពីថ្ងៃទី២៨ ខែកក្ដដា ឆ្នាំ២០១៩ នៅភូមិគោកស្រុក ឃុំវ៉ារិន ស្រុកវ៉ារិន ខេត្តសៀមរាប។
មានប្រសាសន៍ចូលរួមមរណៈទុក្ខដ៏ក្រៀមក្រំ ក្នុងពេលនោះ លោក ស៊ុ សំអន ក៏បានពាំនាំនូវការចូលរួមរំលែកទុក្ខដ៏ក្រៀមក្រំ និងសោកស្តាយពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំពោះក្រុមគ្រួសារសពកុមាររងគ្រោះ និងសូមផ្តាំផ្ញើដល់ប្រជាពលរដ្ឋដែលជាអណាព្យាបាលទាំំងអស់ មេត្តាប្រុងប្រយ័ត្ននៅពេលដែលមានមេឃភ្លៀងត្រូវនាំកូនរកកន្លែងដែលមានសុវត្តិភាព ជាពិសេសកូនក្មេងតូចៗ មិនត្រូវឲ្យទៅលេងកន្លែងណាដែលអាមានគ្រោះថ្នាក់។
ក្នុងឱកាសនោះដែរ ក្រុមការងារបាននាំយកអំណោយរបស់សាខាកាកបាទក្រហមកម្ពុជាខេត្តសៀមរាប ជូនដល់គ្រួសារ និងកុមាររងគ្រោះ ក្នុងនោះរួមមានគ្រួសារដែលកូនស្លាប់ ទទួលបានអង្ករ ៥០គីឡូក្រាម ឃីត ១កញ្ចប់ ត្រីខ ១យួរ មី ១កេស និងថវិកាចំនួន ៥០ម៉ឺនរៀល ចំពោះកុមាររងគ្រោះ ៤នាក់ទៀតដែលរងរបួស ទទួលបានក្នុងម្នាក់ៗ អង្គរ ២៥គីឡូក្រោម ត្រីខ ១យួរ ឃីត ១កញ្ចប់ មី ១កេស និងថវិកាម្នាក់ ១០ម៉ឺនរៀល ។ ក្នុងនោះក្រុមយុវជនស្រុកក៏បានចូលរួមក្នុងពិធីបុណ្យសពចំនួន ២០ម៉ឺនរៀល រដ្ឋបាលឃុំចំនួន ២០ម៉ឺនរៀល និងក្រុមការងារចុះជួយឃុំវ៉ារិន ចំនួន ២០ម៉ឺនរៀល សរុបចំនួន ៦០ម៉ឺនរៀល ថវិកាទាំងនេះត្រូវបានបន្ថែមពីលើអំណោយរបស់សាខាខេត្តផងដែរ ៕
អត្តបទនិងរូបភាព៖សាខាកាកបាទក្រហមកម្ពុជាខេត្តសៀមរាប
កែសម្រួលអត្ថបទ៖ អ៊ុន ណារាជ្យ
