តាមរយៈការដាក់ចេញនូវគោលនយោបាយថែរក្សាបរិស្ថានសម្រាប់រមណីយដ្ឋានអង្គរ ឆ្នាំ២០០៤ អាជ្ញាធរជាតិអប្សរាបានទទួលវិញ្ញាបនបត្របញ្ជាក់ពីការគុណភាពគ្រប់គ្រងបរិស្ថាន ISO ១៤០០១ ចំនួន៥លើកផ្ទួនៗគ្នា ពីស្ថាប័នធានាគុណភាពជប៉ុន JQA តាំងពីឆ្នាំ២០០៦មក។
ជាការអនុវត្តជាក់ស្តែង ឯកឧត្តម យិត ចាន់ដារដ្ឋ អគ្គនាយករងអាជ្ញាធរជាតិអប្សរា បានឱ្យដឹងថា ក្នុងឆ្នាំ២០០៨ អាជ្ញាធរជាតិអប្សរាបានបង្កើតស្ថានីយកសិកម្មធម្មជាតិស្ពានអង្គរ ស្ថិតនៅខាងកើតប្រាសាទអង្គរវត្ត លើផ្ទៃដីទំហំជាង៧ហិកតា ដែលជាកន្លែងផលិតជីកំប៉ុស្ត៍យ៉ាងសកម្មសម្រាប់ផ្គត់ផ្គង់ដល់ការដាំដុះកសិកម្មក្នុងរមណីយដ្ឋានអង្គរ។
ព័ត៌មានជាតិ ថ្មីៗ
ឯកឧត្តម យិត ចាន់ដារដ្ឋ បានបញ្ជាក់ថា ធាតុផ្សំយកផលិតជីកំប៉ុសនេះ គឺជាសំរាម សំណល់ស្រស់ និងសំណល់ស្ងួតនៅក្នុងរមណីយដ្ឋានអង្គរ។ ក្នុងមួយឆ្នាំ ក្រុមការងារ នៃស្ថានីយកសិកម្មធម្មជាតិស្ពានអង្គរ ផលិតបានជីកំប៉ុសចំនួន ៨០តោន ហើយសម្រាប់ផែនការអនាគត ស្ថានីយនេះ នឹងបង្កើនការផលិតឱ្យបាន១៦០តោនក្នុងឆ្នាំ២០២០ លើសពីនោះ អាជ្ញាធរជាតិអប្សរា គ្រោងនឹងបង្កើតស្ថានីយផលិតជីកំប៉ុសនៅតាមកន្លែងផ្សេងៗទៀតដូចជា នៅស្ថានីយបណ្តុះកូនឈើ ភូមិធម្មជាតិរុនតាឯកជាដើម។ ទន្ទឹមគ្នានេះ គោលការណ៍គ្មានប្លាស្ទិច ក៏ត្រូវបានអនុវត្ត នៅក្នុងសួនគ្រឿងទេស និងស្ថានីយស្ពានអង្គរនេះផងដែរ។
ដើម្បីឲ្យមានការចូលរួមពី ប្រជាពលរដ្ឋរស់នៅក្នុងតំបន់រមណីដ្ឋានអង្គរ អាជ្ញាធរជាតិអប្សរា ក៏បានបញ្ជូនក្រុមការងារជាប្រចាំ ដើម្បីបញ្ជ្រៀបចំណេះដឹងអំពីផលប៉ះពាល់អវិជ្ជមាននៃសំរាមដល់ប្រជាពលរដ្ឋ ដោយបង្រៀនពួកគាត់ឱ្យមានការយល់ដឹងអំពីសារសំខាន់នៃភូមិស្អាត រមណីយដ្ឋានស្អាត រួមទាំងផលប្រយោជន៍នៃការបែងចែក វេចខ្ចប់ និងទុកដាក់សំរាមឲ្យបានត្រឹមត្រូវតាមទីកន្លែងកំណត់។
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
