គណៈកម្មាធិការគ្រប់គ្រងគ្រោះមហន្តរាយស្រុកពួក ខេត្តសៀមរាប បានប៉ាន់ស្មានថា ក្នុងរយៈពេល០៧ ទៅ១០ថ្ងៃទៀត ពុំមានរបាយទឹកភ្លៀងស្រោចស្រព និង ប្រភពទឹកជួយអន្តរាគមន៍ទេនោះ ស្រូវដែលរងផលប៉ះពាល់ទាំងនោះ និង ត្រូវខូចខាតទាំងស្រុង ដែលធ្វើឲ្យប៉ះពាល់ បញ្ហាការខ្វះខាតស្បៀងនៅឆ្នាំខាងមុខ។
តាមការឲ្យដឹងពី លោក ស៊ីន ចាន់ថុល អភិបាលស្រុកពួកស្តីទី ខេត្តសៀមរាប បានឲ្យដឹងថា ដោយស្ថានភាពធម្មជាតិនៃអាកាសធាតុនារដូវប្រាំងបានអូសបន្លាយវែង ធ្វើឲ្យការបង្កបង្កើនផលក្នុងឃុំខ្លះមានការប៉ះពាល់ខ្លាំង ឃុំខ្លះប៉ះពាល់តិច ដោយសាទទួលរបាយទឹកភ្លៀងមិនគ្រប់គ្រាន់ ទន្ទឹមនោះការប្រើប្រាស់ជី ការបាញ់ថ្នាំស្មៅ ក៏ពុំត្រូវពេលវេលា និង បច្ចេកទេស ដោយឡែកប្រភពទឹក ដែលផ្តល់ទឹកទៅតាមប្រព័ន្ធធារាសាស្ត្រ ក៏គ្មានទឹកគ្រប់គ្រាន់ផងដែរ ។
បើតាមរបាយការណ៍ កាលពីថ្ងៃទី២៩ ខែកក្កដា ឆ្នាំ២០១៩ របស់លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានបញ្ជាក់ថា ស្ថិតិប៉ះពាល់ ដំណាំស្រូវក្នុងស្រុកពួក មានចំនួន ៤,០៤០ហិចតា ក្នុងនោះស្រូវស្រាល ២,៧៥០ហិចតា និងស្រូវកណ្តាល ១,២៩០ហិចតា និងផ្ទៃដីដាំដុះ ដែលអាចឈានទៅដល់ការខូចខាតទាំងស្រុងមានចំនួន ចំនួន ១៦០ហិចតា ជាប្រភេទស្រូវស្រាល។
ក្នុងរបាយការណ៍ដដែលនោះ ឲ្យដឹងទៀតថា ចំពោះស្រូវកណ្តាល និងស្រូវធ្ងន់ មន្ត្រីជំនាញសង្កេតឃើញថា តំបន់ទាំងនោះមិនមានទឹកដក់ក្នុងស្រែទេ ហើយកន្លែងខ្លះរងការស្វិតដីប្រេះស្ងួត ប៉ុន្តែមិនទាន់ខូចខាតទាំងស្រុងទេ ព្រោះកន្លងមកតំបន់នោះធ្លាប់ទទួលទឹកភ្លៀងខ្លះៗ ជារួមតំបន់មួយចំនួន និងភាគច្រើនគ្មានប្រភពទឹកគ្រប់គ្រាន់ ដើម្បីស្រោចស្រពទេ។
ទន្ទឹមនោះ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នឹងរៀបចំធ្វើសំណើរសុំគ្រាប់ពូជស្រូវ ទៅក្រសួងកសិកម្ម រុក្ខាប្រមាញ់ និងនេសាទ ដើម្បីធ្វើការស្តារឡើងវិញ នៅតាមតំបន់រាំងស្ងួត និងមានប្រភពទឹកគ្រប់គ្រាន់ ។
សូមរំលឹកថា តាមរយៈការព្យាករណ៍របស់ក្រសួងធនធានទឹក និងឧតុនិយម កាលពីថ្ងៃទី១២ ខែមីនា ឆ្នាំ២០១៩កន្លងទៅ បានជូនដំណឹងថា ទឹកភ្លៀងប្រចាំឆ្នាំ ២០១៩ អាចនឹងមានបរិមាណតិចជាងមធ្យមភាគ ច្រើនឆ្នាំ រីឯកូនរដូវប្រាំង អាចកើតមានឡើងចាប់ពីចុងខែកក្កដា ដល់ដើម ខែសីហា ដែលអាចមានរយៈពេលប្រមាណពី ១៥-២០ ថ្ងៃ ។
អត្ថបទ ៖ លោក លីវ សាន្ត
រូបភាព ៖ មន្ត្រីមន្ទីរព័ត៌មាន
កែសម្រួលអត្ថបទ ៖ លោក សេង ផល្លី
