នៅព្រឹកថ្ងៃទី៣០ ខែកក្កដានេះ អភិបាលរងខេត្តសៀមរាប ប្រធានមន្ទីរកសិកម្មខេត្តសៀមរាប រួមនិងមន្ត្រីរាជការ និងប្រជាពលរដ្ឋក្នុងខេត្តសៀមរាបជាច្រើននាក់ បានទទួលទានសាច់ជ្រូក ដែលមានការចំអិនឆ្អិនល្អរួមគ្នា នៅខាងមុខផ្សារលើធំថ្មី ក្រុងសៀមរាប ដើម្បីបង្ហាញដល់សារធាណជនថា សាច់ជ្រូកដែលលក់នៅលើទីផ្សារក្នុងខេត្តសៀមរាប គឺមានសុវត្តិភាព និងទទួលទានបានដោយគ្មានជំងឺ។
ខណៈប្រទេសមួយចំនួន ក្នុងតំបន់អាស៊ីអាគ្នេយ៍ ក្នុងនោះមានប្រទេសកម្ពុជាផងដែរ បានផ្ទុះនូវជំងឺឆ្លងប៉េស្តជ្រូកអាហ្វ្រិកនាពេលថ្មីៗនេះ ដែលធ្វើឲ្យប្រជាពលរដ្ឋកម្ពុជាភាគច្រើន នៅមិនទាន់យល់ដឹងពីជំងឹនេះ និងមានការខ្លាចរអាក្នុងការទទួលសាច់ជ្រូក ទន្ទឹមនឹងនោះ កាលពីម្សិលមិញ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក៏បានអំពាវនាដល់ប្រជាពលរដ្ឋកម្ពុជាទាំងអស់ សូមទទួលទានសាច់ជ្រូកឡើងវិញ ព្រោះថាជំងឺនេះមិនឆ្លងមកមនុស្សនោះទេ ពោលឆ្លងតែជ្រូកដូចគ្នាតែប៉ុណ្ណោះ។
នៅក្នុងឱកាសទទួលទានសាច់ជ្រូកនោះ លោកទា គឹមសុទ្ធ ប្រធានមន្ទីរកសិកម្ម រុក្ខប្រមាញ់និងនេសាទខេត្ត បានបញ្ជាក់ថា អាជ្ញាធរខេត្តសៀមរាប បានសហការ និងខិតខំទប់ស្កាត់ការដឹកជញ្ជូនជ្រូក មិនឲ្យមានការនាំចូលសត្វជ្រូកដែលជំងឺប៉េសអាហ្វ្រិកឡើយ។ ជាមួយនោះ មន្ត្រីបសុពេទ្យ នៃមន្ទីរកសិកម្មខេត្ត បានចុះត្រួតពិនិត្យនៅតាមកសិដ្ឋានចិញ្ចឹមជ្រូក ដោយពិនិត្យទៅលើចំណី គុណភាពសាច់ និងអនាម័យនៃការពិឃាត ដោយការប្រុងប្រយ័ត្ន និងហ្មត់ចត់បំផុត។
បើតាមបញ្ជាក់ពី មន្ត្រីបសុពេទ្យនៃមន្ទីរកសិកម្មរុក្ខាប្រមាញ់និងនេសាទខេត្តសៀមរាប បានឲ្យដឹងថា កម្មវិធីពិសារសាច់ជ្រូកសុវត្ថិភាពនេះ រៀបចំដោយរដ្ឋបាលខេត្តសៀមរាប និងមន្ទីរកសិកម្មខេត្តសៀមរាប សហការជាមួយម្ចាស់សត្វឃាតដ្ឋាន ដើម្បីតបទៅតាមការទទូចសុំរបស់អាជីវករអ្នកលក់សាច់ជ្រូកត្អូញត្អែរថាការលក់ដូររបស់ពួកគាត់មានការថយចុះព្រោះអ្នកបរិភោគខ្លាចប៉ះពាល់ដល់សុខភាពរបស់ពួកគាត់។ ជាទូទៅ ក្នុងខេត្តសៀមរាប តម្រូវការសាច់ជ្រូកមួយថ្ងៃ ប្រមាណជា២៥០ ទៅ៣០០ក្បាល ដែលក្នុងមួយក្បាលៗ មានទំងន់ប្រហែលជាង១០០គ.ក្រ ប៉ុន្តែរយៈពេលចុងក្រោយនេះតម្រូវការថយមកត្រឹមតែពី២០០ទៅ២៥០ក្បាល។
អត្ថបទ និង រូបភាព ៖ លោក យូ វង្ស និង លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
